#خانەقین# هاوشێوەی #کەرکووک# و #خورماتوو# کەوتە بەر ئەو هێرشەی هێزە عێراقییەکان کە کردیانە سەر ئەو ناوچانە و لەدوای 16ی ئۆکتۆبەریشەوە، 25 کەس لە خانەقین کوژراون و گوندە کوردنشینەکانی دەروبەری ئەو شارەش چۆڵکراون.
لە دوای 16ی ئۆکتۆبەر، پرۆسەی بەعەربکردنی گوند و ناوچە کوردنشینەکانی دەورووبەری پارێزگای دیالە بەشێوەیەکی تووندتر و خێراتر دەستیپێکردووە، هەرچەندە ئەوانەی هەڵاتوون و ناوچەکانیان جێهێشتووە ئاماژە بەبوون و دەرکەوتنی چالاکییەکانی چەکدارانی #داعش# دەکەن، بەڵام هۆکاری دیکەشی لە پشتەوە هەن.
بۆشاییە ئەمنییەکان دانیشتووانی گوندەکانی گەڵابات لە سنووری قەرەته و، مەردان لە سنووری خانەقین و زیاتر لە 11گوندی دیکەی سنووری شارۆچکەی سەعدیەی ئاوارەی #کەلار#، #کفری# و خانەقین کردووە.
لە گوندی مەردانی کوردنشین لەلایەن گرووپە چەکدارییەکانەوە پێنج کەس کوژراون، کەسیش نازانێیت ئه و گرووپانە داعشن یان کروییەکانن، یان چەکدارنی #حەشدی شەعبی#ن.
دوای نەمانی #پێشمەرگە# و باڵادەستی سوپای عێراق لە سنوورەکه، عەرەبە هاوردەکراوەکانی ساڵی 1975 گەڕاونەتەوە و داوای زەوییەکانیان دەکەن، کە حکومەتی بەعس پێشتر لە کوردی وەرگرتەوە و لەسەر ئەوانی تاپۆکرد، ئێستا ئەوان خاوەن ماڵن و کورد ئاوارە.
پۆلیسی خانەقین سەر بەدیالەیە، بەرپرسی یەکەمیان کوردە و دانیشتووی خانەقینە، ئه و بەردەوامە لە ناردنی هێز بۆ ئه و گوندانەی ڕۆژانە کێشه و گرفتیان بۆ دروستدەبێت.
لە دوای ڕووداوەکانی 16ی ئۆکتۆبەرەوە، 14 حاڵەتی تەقینەوە، کوشتن و ڕفاندن، 23 حاڵەتی دزیکردن لە سنووری خانەقین و چواردەوری ڕوویان داوە، زیاتر لە 25 کەسیش کوژراون جگە لە بریندار. ئەوە لە کاتێکدایە ئه و کاتەی پێشمەرگە له و سنوورەبوون، تەنها دووحاڵەتی تەقینەوە ڕوویاندا، ئەمەش وایکردووە دانیشتووانی خانەقین وەک جاران دڵیان بە شارۆچەکەکەیان خۆش نەبێت.[1]
#17-10-2018#