لە 4ی تشرینی دووەمی 2016 دەوڵەتی تورک کودەتایەکی سیاسی دژ بە پارتی دیموکراتی گەلان (#هەدەپە#) دەستپێکرد و هاوسەرۆکی گشتیی، پەرلەمانتار و ژمارەیەکی زۆری بەڕێوەبەرانی هەدەپەی دەستگیر کرد و تا ئێستاش لە زینداندان. ئەمڕۆ بەبۆنەی ساڵڕۆژی ئه و کودەتایەدا بەرپرسە بەدیلگیراوەکان لە زیندانەوە پەیامیان بڵاوکردەوە.
$ئۆزکان: قەیرانی کۆمەڵایەتی دژوارتر دەکەن$
پەرلەمانتار بوورجوو چەلیک ئۆزکان لە پەیامەکەیدا ئاماژەی بۆ ئەوە کردووە، ئه و سیاسەتانەی کە لە 2014 بەدواوە لە دژی بزووتنەوەی سیاسیی کورد و گەلی کورد خرانەگەڕ، قەیرانی ئابووری، سیاسی، کولتووری و کۆمەڵایەتی لە تورکیا دژوارتر کرد. ناوبراو باسی لەوەش کردووە، ئەگەر سەیری مێژووی نزیک بکرێت دەردەکەوێت هەوڵ دەدرێت ئه و سیاسەتە وەک چارەسەری بسەپێنرێت. ئەمە لە کاتێکدا لای هەر کەس ڕوونە کە ئه و سیاسەتە پەرەی بە چارەسەرنەکردن داوە نەک چارەسەرکردن. ئه و پەرلەمانتارە ئاماژەی بۆ ئەوە کردووە کە پێویستە ئامانجی گەلانی تورکیا یەکگرتن و پێکەوەژیان بێت.
بوورجوو چەلیک لە درێژەی پەیامەکەیدا ڕایگەیاندووە، پێویستە ڕێ لە بەردەم سیاسەتی دیموکراتیک بکرێتەوە. هێمای بۆ ئەوەش کردووە کە ئەوان باش و بەورەن.
$یوکسەکداغ: بە بەرخۆدان سەردەکەوین$
هاوسەرۆکی گشتیی پێشووتری هەدەپە فیگەن یوکسەکداغ لە پەیامەکەیدا ئاماژەی بە تێکۆشانی 2 ساڵی ڕابردووی هەدەپە کردووە دژ بە زەخت، زۆرداری، زوڵم و ناحەقی.
(ئەوانەی کە پێیان وابوو به زیندانەکان بەندمان دەکەن، بینییان کە خۆیان هەڵخەڵەتاندووە. بەڵام لەبەرئەوەی نازانن پەند لە هەڵە وەرگرن، ئێمە دیسان فێریان دەکەین. ئەمە ئەرکی ئێوە، ئێمە و هەموومانە. لە دژی ئه و دەسەڵاتدارەتییەی کە وەڵاتی داڕزاندووە، ئێمە تاکە ئالتەرناتیڤین. هیچ هێرش، گرتن و گەمارۆدانێک ناتوانێت ڕێگری لە ئاپۆڕای هەدەپە بکات.)
یوکسەکداغ بەم بیروباوەڕەوە سڵاوی کردووە و ڕایگەیاندووە، بە بەرخۆدان سەرکەوتین و بە بەرخۆدانیش دیسان سەردەکەوین.
$کشاناک: کودەتا لە دژی ئه و کەسانە کراوە کە بۆ مرۆڤایەتی تێکۆشاون$
هاوسەرۆکی شارەوانیی گەورەی #ئامەد# گوڵتان کشاناک ڕایگەیاند، 4ی تشرینی دووەم\14ی گەڵاڕێزان گەورەترین ئۆپەراسیۆنی قڕکردنی سیاسیی مێژووی تورکیا بوو. هەوڵێک بوو بۆ چاوترساندنی ئۆپۆزسیۆن و سیاسەتی گشتی و ژنان، بەتایبەتی لەنێو گەلی کورد.
(کودەتایەکی سیاسی بوو لە دژی هەموو کەسانەی بۆ مرۆڤایەتی تێکۆشاون. خۆیان لە بەرانبەر تاکەقسەیەکیش ڕانەگرت. بەڵام کات بەڕوونی پیشان دا کە کەس پاشەکشە ناکات لە ئایندەی دیموکراتیک، ئازادیپارێز و ئاشتییانە. ئێمە له ناوەوە؛ گەلەکەمان و هەموو هێزە دیموکراتییەکان خۆڕادەگرین و سەردەکەوین. ئیرادەی گەل لەنێو چوار دیواردا بەند ناکرێت و ڕێی لێ ناگیرێت. وەک چەمێکی بەخووڕ هەمیشە دەڕوات.)
$بالووکەن: بینیان کە ناتوانن ئەنجام بەدەستبێنن$
پەرلەمانتاری پێشووی هەدەپە لە ئامەد ئیدریس بالووکەن لە پەیامەکەیدا ئاماژەی بە قەیرانی سیاسی، ئابووری، کۆمەڵایەتی و قانوونی کردووە. ناوبراو ڕایگەیاند، ئەم قەیرانە پەیوەندی بە بەرتەسک کردنەوەی مەیدانی سیاسەتی دیموکراتیک و کودەتای 4ی تشرینی دووەمەوە هەیە. سەرەڕای ئەمەش نە پارتەکەمان هەڵوەشاوە، نە توانیویشیانە ئیرادەی گەلەکەمان بشکێنن.
(لە ماوەی 2 ساڵی ڕابردوودا هەم لە ناوەوە (زیندان) هەم لە دەرەوە، هیوا، باوەڕی و پێداگریی پارتەکەمان و گەلەکەمان گەورە بووە. هەلومەرج بە هەر شێوەیەک بێت، به و هێزەی لە ڕەوایەتی و مافداریی خۆمان وەریدەگرین، خاوەندارەتی لە ئاشتی، دیموکراتی و ئیرادەی ئازادی خۆمان دەکەین. ئێمە جارێکی دیکە بەڵێن بە گەلەکەمان دەدەین کە لەم ڕێگەیەدا تێبکۆشین.)
$دەمیرتاش و زەیدان: دەوڵەت بەردەوام دەڕزێت$
هاوسەرۆکی گشتیی پێشووتری هەدەپە #سەڵاحەدین دەمیرتاش# و پەرلەمانتاری پێشووی هەدەپە عەبدوڵا زەیدان ئاماژەیان بۆ ئەوە کرد، بە گرتنی ئەوان هەوڵدراوە کێشەکە چارەسەر بکرێت، بەڵام لە ماوەی 2 ساڵدا لە هەموو شوێنێک کێشەکان قوڵتر کراونەتەوە. ڕاشیانگەیاند، ئێمە لەسەر هێڵی دیموکراتی، ئازادی و ئاشتین. بەسەربەرزی بەردەوام دەبین لە تێکۆشان.)
(ئه و کودەتا سیاسییەی لە 4ی تشرینی دووەم لە دژی هەدەپە کرا سەرنەکەوت و سەریشناکەوێت. سەرەڕای زەخت و زۆردارییەکان هەدەپە لە دوێنێ بەهێزترە.)
دەمیرتاش و زەیدان ڕوو لە کۆمەڵگەی تورکیاش گوتیان: بە بێدەنگبوون لە بەرانبەر بەدیلگرتنی سیاسیی ئێمە مەبنە هاوبەشی ئەم زیانە گەورەیەی لە وەڵات و کۆمەڵگە دەدرێت. هێمایان بۆ ئەوەش کردووە کە له و شوێنەی کە دادپەروەری تێکچووە، تەنیا ئەوان زیانمەند نین، بەڵکو کۆمەڵگە و دەوڵەت لە هەمووو کات زیاتر دەڕزێت.
دەمیرتاش و زەیدان دەستنیشانیان کردووە، زوو یان درەنگ پێوانەکانی دیموکراتی، ئاشتی، دادپەروەری و یەکسانی لە وەڵات جێگیر دەبن. بۆ ئه و مەبەسته بەپێداگرییەوە بەردەوام دەبین لە تێکۆشانی خۆمان.
$دەمیرەل و ئرماک: پێویستە گۆشەگیری هەڵگیرێت$
پەرلەمانتارانی پێشووی هەدەپە چاغلار دەمیرەل و سەلما ئرماک لە پەیامەکەیاندا، ڕایانگەیاند: ئه و ئۆپەراسیۆنەی کە وەک کودەتای دەستگیرکردنی ئیرادەی گەل 4ی تشرینی دووەمی 2016 دەستی پێکرد، هێشتا بەردەوامە. لە ڕێی ئۆپەڕاسیۆنەکانی قڕکردنی سیاسی دەیانەوێت گەلی کورد و گەلانی تورکیا نەگەنە یەکتر.
(ڕێ و ڕێبازی زەخت و چەوساندنەوە سەرنەکەوت. وەڵات زیاتر بەره و هەڵدێر برا. بۆ ئەوەی لە هەڵدێر نەکەوێتە خوارەوە، پێویستە بەپەلە دەست له و ڕێبازە بەردەن. بە کۆتایی هێنانی گۆشەگیریی سەر ئۆجالان پێویستە هەلومەرجی ئازادی و ئەمنی بۆ ئامادە بکرێت و بگەڕێنەوە سەر پڕۆسەی دانوستان و چارەسەریی دیموکراتیک.)
ئرماک و دەمیرەل ئەم بانگەیان ئاراستەی ژن و لاوان کردووە: (هەتا ئه و کاتەی دەست لە بەرخۆدان بەرنەدرێت، سەرکەوتن مومکینە. ئێمە بەرخۆدان دەکەین و سەردەکەوین.)
$یڵدرم: پێویستە یەکێتیی خۆمان بەهێز بکەین$
پەرلەمانتاری پێشووی هەدەپە لە مێردین گولسەر یڵدرم-یش لە پەیامەکەیدا سەرەتا پیرۆزبایی 1ی نۆڤەمبەر ڕۆژی جیهانیی کۆبانێی کردووە و ڕایگەیاند، لە هەموو هەلومەرجێکدا خۆڕادەگرین.
یڵدرم دەربارەی کودەتای 4ی تشرینی دووەم-ی دژ بە پارتەکەی ڕایگەیاند، ئەم هێرشە هێشتا بەردەوامە و پارچەیەکە لە زیهنیەتی لەناوبردن و نکۆڵیکردنی دژ بە کورد کە هاوپەیمانەتیی فاشیستی ئاکەپە - مەهەپە سەرکێشی دەکەن.
گولسەر یڵدرم هێمای بۆ گرینگی یەکێتیی و ڕێککەوتن کردووه و ڕایگەیاندووە: (پێویستە یەکێتیی و ڕێککەوتن لەگەڵ گەلەکەمان و هەموو گەلانی دیکە بەهێز بکەین. ئه و زیهنیەتەی کە شێرپەنجەی نەژادپەرستییە و دوژمنایەتی گەلان دەکات، تێکدەشکێنین. بە بیروباوەڕی تێکۆشانی بەهادار و پرەنسیپەکانی پارتەکەمان (هەدەپە)، سەردەکەوین و ژیانی گەلان بە ڕووناکیی ڕۆژی خۆش گەش دەبێت.)[1]
#04-11-2018#