نوێنەرانی هەرێمی کوردستان لەبارەی پشکی هەرێم، #پێشمەرگە#، پارەی کۆمپانیا نەوتییەکان و چەند بابەتێکی دیکە، ڕەخنەیان لە پڕۆژەیاسای بودجەی 2019-ی عێراق هەیە و دەڵێن: بەپێی ئاماری وەزارەتی پلاندانانی عێراق، ڕێژەی دانیشتوانی هەرێمی کوردستان 13.9%-یە، بۆیە دەبێت پشکەکەشی بە هەمان ڕێژە بێت.
نوێنەرانی هەرێمی کوردستان لە ئەنجومەنی نوێنەرانی عێراق ڕوانینی خۆیان لەبارەی پڕۆژەیاسای بودجەی 2019 پێشکەش بە ئەنجومەنەکە و حکومەتی عێراق کردووە، ڕەخنەیان لە پشکی هەرێمی کوردستان و چەند بابەتێکی دیکە هەیە.
ئەحمەد حاجی ڕەشید ئەندامی ئەنجومەنی نوێنەرانی عێراق لە فراکسیۆنی کۆمەڵی ئیسلامی بە ڕۆژنیوزی وت، کە ڕەخنەیان لە پشکی هەرێمی کوردستان لە بودجەی 2019 هەیە کە 12.67% دیارییکراوە، بەو پێیەی بەپێی داتاکانی وەزارەتی پلاندانانی عێراق، ڕێژەی دانیشتوانی هەرێمی کوردستان 13.9%-یە، بۆیە پێویستە پشکی هەرێمی کوردستان بەرزبکرێتەوە بۆ ئەو ڕێژەیە.
ئەحمەد حاجی ڕەشید باسی لە ڕەخنەکانی دیکەی نوێنەرانی هەرێمی کوردستان کرد لەبارەی بودجەوە و وتی: لە بارەی مووچەی فەرمانبەران، پێشمەرگە، پارەی جووتیارانی هەرێم، شایستە داراییەکانی کۆمپانیا نەوتییەکان، نوێنەرانی هەرێمی کوردستان ڕەخنەیان هەیە و ئەو بۆچوونانەش پێشکەش بە ئەنجومەنی نوێنەران و حکومەتی عێراق کراون.
پەرلەمانتارەکەی کۆمەڵی ئیسلامی ئاشکرایکرد، لە بودجەی 2019دا تەنها بودجەی بەکاربردن (مووچە)بۆ پێشمەرگە دانراوە، بۆیە نوێنەرانی هەرێم داوایان کردووە بودجە بۆ پڕچەککردن و ڕاهێنانی پێشمەرگە دیارییبکرێت، هەروەها داواکراوە فەرمانبەرانی هەرێمی کوردستانیش شایستەییان پێبدرێت، پارەی جووتیارانی هەرێمی کوردستان بدرێت، کە چەند ساڵێکە بەغدا قەرزداری جووتیارانی هەرێمی کوردستانە، ئەمە جگە لەوەی داواکراوە بەغدا پارەی کۆمپانیا نەوتییەکانی هەرێمی کوردستان لەسەر بەغدا بێت.
چەند ڕۆژی ڕابردوو شاندی #وەزارەتی دارایی# هەرێم لە بەغدا بوون، لەو بارەیەوە ئەحمەد حاجی ڕەشید ڕایگەیاند: ئێمە لەگەڵ ئەو شاندەی دارایی هەرێم دانیشتوون و هەمان ئەو داواکارییانەمان پێشکەش کردوون، کە داومانە بە ئەنجومەنی نوێنەران و حکومەتی عێراق، دواتریش شاندی دارایی هەرێم لەگەڵ وەزارەتی دارایی حکومەتی عێراق کۆبوونەتەوە.
ئەو پەرلەمانتارەی عێراق پێی وایە، ڕازیبوونی بەغدا بە داواکارییەکانی هەرێمی کوردستان لە بودجەی 2019، پەیوەستە بەوەی تاچەند هەرێمی کوردستان پابەنددەبێت لەبارەی ڕادەستکردنی نەوت و داهاتی خاڵە سنوورییەکان بە حکومەتی عێراق.[1]
#14-11-2018#