ئامادەکردنی: #زریان سەرچناری#
سلێمانی 2018
سافی هیرانی 1873-1942
دڵی بولبول لە دەوری باغی گوڵ یاری نەکا چ بکا؟
لە تاوی غونچە هەردەم، شیوەن و زاری نەکا چ بکا؟
زەمانی لەززەتی ڕۆیی و دەوری زیللەتی واهات
ئیتر یاران لەمەولا ڕوو لە دڵداری نەکا چ بکا؟
لە ئاهی گەرمەوە وا لیوبەبار و خیشکە ئیستێکە
لە عەینی چاوەکانی، خوێن و ئاو جاری نەکا چ بکا؟
شەوی هیجران خەیاڵی یار دەکا، ئەسڵا خەوی نایە
بەیادی ڕۆژی وەسڵی، حەز لە بێداری نەکا چ بکا؟
بە کوفری زولفی، ڕێی ئیسلامی بەستووە، بۆیە دڵی ئێستێ
وەکو سەنعانی دایم مەیلی زنناری نەکا چ بکا؟
دڵم عەیبی نییە، گەر ڕوی زەمین تەڕکا بەخوێنی ئەشک
بە ئاهی دودناکیش، ئاسمان تاری نەکا چ بکا؟
لەلایێ فیرقەتی یار و لە سوێی میحنەتی ئەغیار
لە هەردوولا دڵی مسکین، ڕەجاکاری نەکا چ بکا؟
هەوای یاری لەسەر دەرناچێ ئەسڵا لەو جەفای دووری
دڵی بێچارەکەم هەردەم وەفاداری نەکا چ بکا؟
ئەگەر چی بێوەفا یارم چەفایدا، ئەو دڵی مسکین
وەکو سافی لە بەدبەختی فیداکاری نەکا چ بکا؟
.......
کە ڕۆژی وەسڵی ئاوابوو بەچاو گریان نەکەم چبکەم؟
شەوی هیجرانی وا داهات کە دڵ بریان نەکەم چبکەم؟
بەکینەی من دووبارە چەرخی کەچ وا کەچ مەداری کرد
منی بێ تاڵعیش بەو نەوعە گەر دەوران نەکەم چبکەم؟
بەبێ یارم حەیات تەڵخ و ئەجەل شیرینە ئێستاکە
لە جەژنا گەر ڕوحی شیرینی خۆم قوربان نەکەم چبکەم؟
وەکوو دەوری فەلەک دائیم لە دەوری یار نەبم، یاران
فەرامۆشی بەکێ دێ دڵ کە سەر گەردان نەکەم چبکەم؟
ئەگەر دەرمان نەکا بێماربێ دڵ بێ وەفا یارم
لە دەردی بێ دەوا گەر چاوەڕێی لوقمان نەکەم چبکەم؟
وەکو یوسف لە زیندانی غەما حەپسی عەزیزێکم
لە بۆ تەسکینی جارێ ڕوو لەلای کەنعان نەکەم چبکەم؟
تەبیب نەیت و دەوای دەردت نەدا چارەم نییە(سافی)
بە مردن گەر عیلاجی دەردی بێ دەرمان نەکەم چبکەم؟ [1]