(33) ساڵ لەمەوبەر لە ڕۆژی 12-12، حزبی زەحمەتکێشانی کوردستان لە ڕۆژگارە سەختەکانی خەبات، لە مەیدانی شۆڕش دامەزرا، (33) ساڵە سەرەڕای کەندوکۆسپەکانی سەر ڕێگا٬ پابەند بە بنەما چەسپاوە دیموکراسی و نەتەوەیی و نیشتمانییەکان. حزبی زەحمەتکێشانی کوردستان لە پێناو ئازادی و یەکسانی و بەدیهێنانی مافەکانی خەڵکی کوردستان بێ وچان پەرە بە تێکۆشان دەدا. لەو ڕۆژە مێژووییەدا، سڵاوی ئەمەکداری بۆ هاوڕێ شەهیدەکانمان کە گیانی خۆیان بە گەل و نیشتمان بەخشی٬ سڵاو بۆ خانەوادەی سەربەرزی شەهیدانی کوردستان، سڵاو بۆ خەڵکی کوردستان ٬ سڵاو بۆ خۆڕاگری کادیر و ئەندامانی حزبەکەمان کە خۆنەویستانە درێژە بە تێکۆشان دەدەن.
ئێستا کە بەشکۆوە ئەم یادە دەکەینەوە٬ لە ڕووی سیاسی کوردستان بە دۆخێکی جیاواز لە ساڵی ڕابردوو گوزەر دەکا ٬ ئەگەرچی زۆر دەرفەت لە دەست دراوە ٬ زۆر کات بە هەدەر دراوە٬ بەڵام بە هۆی خاوبوونەوەی ململانێی سیاسی نێوان هەرێم و بەغدا لە لایەک و لە نێوەخۆی هەرێم لە لایەکی دیکە زەمینە بۆ دەستپێکی قۆناغێکی نوێ لەبارە.
- لە ئاستی کوردستان:
حزبی زەحمەتکێشانی کوردستان هەبوونی گەڵاڵەنامەکی نیشتمانی هاوبەش لە نێوان لایەنە سیاسییەکان و پێکهێنانی کابینەی نۆیەم بە پێویستیەکی هەنووکەیی دەزانێ٬ کە شەفافیەت ٬ چاکسازی ٬ عەدالەتی کۆمەلایەتی ٬ باشکردنی ژیان وگوزەرانی هاوڵاتیان و نەهێشتنی بێکاری لە ئەولەویاتی کارەکانی دابنێ.
- لە ئاستی عێراق:
دەبێ کێبڕکێ لە سەر وەرگرتنی پۆست و ئیمتیازاتی حزبی لە بەغدا بە لاوە بنرێ لە جێگەی ئەوە پێویستە لە سەر دەستەبەرکردنی مافە دەستووریەکانی خەڵک و هەرێمی کوردستان کێبڕکێ بکرێ ٬ هاوکات پێویستە فراکسیۆنە کوردستانیەکان لە پەرلەمانی عێراق پێکەوە کار بکەن بۆ کۆتایی هێنان بە دۆخی داسەپاو بە سەر شاری #کەرکووک# و هەموو ناوچە کوردستانیەکان.
- لە ئاستی کوردستانی:
حزبی زەحمەتکێشانی کوردستان لە هەڵسەنگاندنی واقیعی ناوچەکە و دۆخی بەشەکانی کوردستان ڕاستییەک هەڵدەهێنجێ ٬ کە هەم بۆ چەسپاندنی مافە نەتەوەییەکانمان و هەم بۆ بەرەنگاربونەوەی پیلانگێری داگیرکەرانی کوردستان لە ئێستا پێویستمان بە دیالۆگی کوردستانی و هاریکاری نێوان حزبە کوردستانیەکان و پرۆژەی کاری هاوبەشی نەتەوەیی هەیە.
- لە ئاستی خەباتی چینایەتی:
حزبی زەحمەتکێشانی کوردستان لە سۆنگەی پێویستی بەرەو پێشبردنی خەباتی چینایەتی و بەهێزکردنی پێگەی چەپ لە کوردستان و داکۆکی کردن لە ماف و داخوازیەکانی کرێکاران و زەحمەتکێشان ٬ پێشوازی لە میکانیزمێکی کارای کاری هاوبەشی چەپەکان دەکات.
هاوکات لە گەڵ ئەم یادەدا٬ لە (10) ی کانوونی یەکەم٬ جیهان بە شکۆوە یادی (70) ساڵەی جاڕی گەردوونی مافەکانی مرۆڤ دەکاتەوە٬ حزبی زەحمەتکێشانی کوردستان لەو بۆنە مرۆڤایەتیەدا جەخت دەکات لە چەسپاندنی بنەماکانی مافی مرۆڤ و نەهێشتنی جیاکاری و توندوتیژی دژ بە ژنان و هەموو شێوەکانی چەوساندنەوەی مرۆڤ لە لایەن مرۆڤەوە.
هەر شەکاوەبێ ئاڵای حزبی زەحمەتکێشانی کوردستان لە یادی (33) ساڵەی دامەزراندنی دا.
مەکتەبی سیاسیی
حزبی زەحمەتکێشانی کوردستان
#10-12-2018#