جێگری بەرپرسی کۆمەڵەی کێڵگە پەلەوەرییەکان ڕایدەگەیەنێت، کێڵگە پەلەوەرییەکانی هەرێم زیاتر لە دانیشتوان مریشکیان هەیە، بەڵام حکومەت بە هێنانی مریشکی بەستوو لە تورکیاوە بەرهەمی ناوخۆی لاواز کردووە، دەشڵێت، ڕێباز حەملان وەزیری دارایی پێی وتوین، کە ناتوانن ڕێگری بکەن لە هاوردەکردنی مریشکی تورکی، چونکە ئەردۆغان بەشدارە تێیدا.
بەپێی وتەی بەرپرسانی پەلەوەریی، لە ناوخۆی هەرێمدا بەڕێژەی زیاتر لە پێیوست کێڵگەکان مریشک بەرهەم دەهێنن، بەڵام هێشتا لە تورکیاوە مریشکی بەستوو هاوردەی بازاڕەکانی هەرێم دەکرێت، بۆ ئەوەش شەریکبوونی ئەردۆغان لەو بازرگانییەدا بە هۆکاری قەدەغەنەکردنی هاوردەکردنی مریشکی بەستوو دەزاندرێت.
دەوڵەتی تورک جیاواز لە دەستێوەردان و داگیرکارییە سەربازییەکانی لە باشوری کوردستاندا، بەشێکی زۆری ئابوری باشوری کوردستانیشی داگیرکردووە، هاوکات هەموو هەوڵەکانی بۆ ئەوەیە کە لە ناوخۆی هەرێمدا ئابوری پێش نەکەوێت، بە شێوازێک هەرچی توانای هەیە دەیخاتەگەڕ بۆ لەناوبردنی ئەو بەرهەمانەشی کە لەناخۆدا بەرهەم دەهێندرێن، کە هەناردەکردنی مریشە بەستووەکان یەکێکە لەو سیاسەتانەی دەوڵەتی تورک دژی ئابوری باشوری کوردستان.
لەوبارەیەوە نازم عەبدوڵا جێگری بەرپرسی کۆمەڵەی کێڵگە پەلەوەرییەکان، بۆ ڕۆژنیوز دواو وتی: لە هەرێمی کوردستاندا، 3هەزار کێڵگەی پەلەوەریی هەیە، بەوەش لە هەرێمی کوردستان بەشی 15ملیۆن هاوڵاتی مریشک هەیە، لە کاتێکدا پێنج ملیۆن دانیشتوانییەتی، بۆیە حکومەتی هەرێمی کوردستان دەبێت ڕێگا چارە بدۆزێتەوە و چوار وەرزەکە یەک نرخ دیاری بکات، نەک هەر ماوەیەک و بە نرخێکەوە بێت.
جێگری بەرپرسی کۆمەڵەی کێڵگە پەلەوەرییەکان نیگەران بوو لە هاوردەکردنی مریشکی بەستوو لە تورکیاوە و ئاماژەی بەوەشکرد، کە ئەمساڵ بەهۆی بێ پلانی حکومەت و هاوردەکردنی مریشکی بەستووەوە، ئەوەی لەبەردەستی ئەواندایە 100 ملیارد دینار بە کێڵگە پەلەوەرییەکانی هەرێمی کوردستان کەوتووە، دەشڵێت: ئەگەر لیژنەیەک لێکۆڵینەوە بە وردی بکات، دەگاتە 300 ملیارد دینار زیانەکان.
دەربارەی ڕێکارەکانیان بۆ ڕێگریکردن لە هاوردەکردنی مریشکی بەستوو، نازم ئاماژەی بەوە کرد، که سەردانی پێنج لایەنی سیاسییان کردووە و هەر پێیان وتوون بەسەرچاو، لەگەڵ ئەوەشدا چەندجارێک لە گەڵ ڕێباز حەملان وەزیری دارایی قسەیکردووە و نامەشی بۆ نێچیرڤان بارزانینێچیرڤان بارزانی سەرۆکی حکومەتی هەرێمی کوردستان ناردووە، هەروەها لە گەڵ قائیمقامی سلێمانیسلێمانی قسەی کردووە.
نازم عەبدوڵا جێگری بەرپرسی کۆمەڵەی کێڵگە پەلەوەرییەکان دەربارەی وەڵامی لایەنی حکومەتی هەرێم بۆ ڕێگریکردن لە هاوردەکردنی مریشکی بەستوو لە تورکیاوە، دەڵێت: ڕێباز حەملان وەزیری دارایی حکومەتی هەرێم پێی وتین ئێمە ناتوانین هاوردەکردنی مریشکی بەستوو لە تورکیاوە قەدەغە بکەین، چونکە ئەو بازرگانییە ڕاستەوخۆ دەستی ئەردۆغانی تێیدایە.[1]
31-12-201831-12-2018