دواڕۆژ، کۆچەر عەلی
بەپێی ئامارێک لە ساڵی 2018 لە هەرێمی کوردستان 281 کەس کوژراون یان خۆیان کوشتووە.
بەپێی ئامارێکی #وەزارەتی ناوخۆ#ی حکومەتی هەرێم کە وێنەیەکی دەست دواڕۆژ کەوتووە ساڵی 2018 لە پارێزگاکانی #هەولێر#، #سلێمانی# و #دهۆک# 111 کەس کوژراون و 177 کەسیش خۆیان کوشتووە.
بەپێی ئامارەکە لە هەولێر 44 کەس کوژراون و 34 کەسیش خۆیان کوشتووە و لە سلێمانی 62 کەس کوژراون و 63 کەسیش خۆیان کوشتووە و لە پارێزگای دهۆکیش 55 کەس کوژراون و 47 کەسیش خۆیان کوشتووە.
ئەوەش لەکاتێکدایە دەستەی مافی مرۆڤی هەریم هەڵمەتێکی 15 ڕۆژەی بۆ داماڵینی چەک لە هەرێم دەستپێکردووە و داواش لە وەزارەتی ناوخۆ و ئەنجومەنی ئاسایش و حکومەتی هەرێم دەکات مۆڵەتی پێدانی چەک سنوردار بکرێت و ڕێگەش نەدرێت چەک لە ماڵان هەبێت.
زیا بترس، سەرۆکی دەستەی مافی مرۆڤی هەرێم بە دواڕۆژی ڕاگەیاند: زۆربەی حاڵەتەکانی کوشتن بەهۆی چەکی نایاسایی بووە و خەڵکانێک لە ماڵەکانیان چەک هەیە و کاتێک تووشی کێشەیەک دەبن پەنا بۆ بەکارهێنانی چەک دەبەن.
وتیشی: بەشێکی ئه و کوشتنانە پەیوەندی بە هەبوونی چەکەوە هەیە لەدەست کارمەندانی دەزگا ئەمنییەکان، کاتێک دەوامی ڕەسمییان تەواودەبێت چەک لەگەڵ خۆیان دەبەنە شوێنە گشتییەکان کە حکومەت پێشتر ئەم دیاردەیەی قەدەغەکردبوو بەڵام سەڕی هەڵداوەتەوە.
زیا بترس ئاماژەی بەوەشکرد: نابێت مۆڵەتی مامەڵەکردنی بازرگانی بە چەک بدرێتە خەڵک کە ئێستا لە سەرجەم پارێزگاکانی هەرێم شوێنی چەک فرۆشتن بوونی هەیە و بە ئاشکرا خەڵک چەک دەکڕێت و دەیفرۆشێت کە ئەمە بۆتە کێشەیەکی گەورە لەبەردەم داماڵینی چەک بە دەست هاووڵاتیانەوە.[1]
#22-01-2019#