کۆمەڵانی خەڵکی کوردستانی خوشەویست
لە مانگی 1ی 2007 پێنج کەس بوین، بڕیارماندا وەکو مینبەرێکی ئاشکرا لە پێناوی چاکسازی و بریاری سیاسی دروست، لەناو #یەکێتیی نیشتمانیی کوردستان#دا، پێکەوە کار بکەین. شوێنی کاریش سەر گردەکەی زەرگەتەی شاری #سلێمانی# بوو.
کە هەڵبژاردنی ساڵی 2009 بۆ پەرلەمانی کوردستان نزیک بۆوە ئاپورەی خەڵک بەرەو گردەکە وای لێ کردین بڕیار بدەین بە لیستێکی سەربەخۆ بەناوی لیستی گۆڕانەوە بەشداری هەڵبژاردن بکەین. بەڵێنمان بە خەڵک دا کە لە پێناوی هێنانەدی سیستمێکی دیموکراتی و گۆڕینی ئەم سیستمە و لە پێناوی عەدالەتی کۆمەڵایەتی و سەروەری یاسادا تێ بکۆشین.
سەدان هەزار کەس بۆ هێنانەدی ئەو دروشمانە دەنگیان بە گۆڕان دا. دەسەڵات هەمیشە داوای لە گۆڕان کردووە کە بەشداری لە حکومەتدا بکات و ئێمە ڕەفزمان کردووە چونکە گۆڕان بۆ گۆڕانکاری لە سیستم دا هاتۆتە کایەوە نەک بۆ بەشداری لە هەمان سیستم دا.
جا ئەگەر گۆڕان ئامانجەکەی چوونە ناو سیستمێکی وایە ئەوا با هەر لەناو یەکێتی دا کارمان بکردایە و ئەوکات سەنگ و قورساییمان لە بەرامبەر هێزەکانی تردا باڵاتر دەبو.. ڕاگەیاندنەکانی گۆڕانیش تا ئێستا لە گوێی کۆمەڵانی خەڵکدا دەزرنگێتەوە کە هەموی هێرشە لەسەر سیستم و حزبەکانی دەسەڵات بەتایبەتی بۆ سەر پارتی… بەڵام ئێستا حەملە تەنها لە دژی یەکێتی چڕ کراوەتەوە. لەگەڵ پارتی دا بونەتە (شەریک).
لە کاتێکدا ئەو حزبە لە جاران بەدەسەڵاتتر و بەهێزترەوهەموئەرکانەکانی بەرێوەبردنی.وڵات بەدەستی ئەوەوەیە.ئەبو لەباتی ئەم بادانەوە و خۆ بەدەستەوەدانە لەسەر هەمان ئەو سیاسەتەی کە لەدوای کۆبونەوەکەی دەباشانەوە بڕیارمان لێدا و بڕوامان وابو بۆ بەهێزکردنەوەی ئەم ناوچەیە و ڕاستکردنەوەی تەرازووی هێز لەگەڵ یەکێتیدابسازێین..بڕیارمانداکە بەهەستێکی بەرزی لێپرسراوییەوەوبەسەبرو تەحەمولێکی زۆرەوە، لەم هەلومەرجە سیاسییەی کوردستاندا دریژەبەم سیاسەتە بدەین، ژمارەیەکی زۆریش لەهە ڵسوراوانی گوڕان لەگەل ئەم سیاسەتە دروستەدابون.. کودەتا کتوپڕەکەی ڕێکخەری بزوتنەوەکە و خەنجەری ژەهراوی بۆ گیانی هاوڕێیان و جەستەی هەمو پرنسیپە دیموکراتی و ئەخلاقییەکانی ناو گۆڕان، بەدەستەوە گرتنی هەمو سەرەداوەکانی بڕیاری سیاسی و ئابووری و ڕێکخستن بەدەست تەنها یەک کەسەوە، زەمینەیەکی نوێی خوڵقاند بۆ پشت کردنە بەرنامە سیاسییەکەی گۆڕان و پیادەکردنی سیاسەتی میزاجی و حقد و تۆڵەسەندنەوە و بەرژەوەندیی تایبەت.
کە #مام جەلال# نەخۆش کەوت لەباتی ئەوەی وەک سەرکردەیەکی واقیعبین و میهرەبان و دڵگەورە و لێبوردە ڕەفتار بکات کەچی فکر و هۆشی خۆی لە ئومێدێکی بۆش و بێ بناغەدا، لە هەوڵدان بۆ هەڵوەرین و لێکترازانی ڕیزەکانی یەکێتی و هێزی پێشمەرگە و هێزی چەکداری یەکێتیدا چڕکردەوە.
ئەم سیاسەتە چەوتە کە سەرچاوەکەی تاکڕەوی و نائەقڵانییەتە و دوورە لە بیرو باوەڕ و بەرنامەی گۆڕان تەنها لە دوکانێکی ئیقتیسادی و بەرژەوەندی تایبەتەوە سەرچاوەی گرتووە. ئەمڕۆ بێ یا سبەی کۆمەڵانی خەڵکی کوردستان لێی بە ئاگا دەبنەوە. ئۆباڵەکەشی ئەکەوێتە ئەستۆی هەمو ئەوانەی ئەمە قبوڵ ئەکەن.
جا خوشک و برایان، پلانێک بۆ هەڵتەکاندن و نانەوەی ئاژاوەیەکی گەورە بۆ ئەم دەڤەرە بۆ سلێمانی سازکراوە. بۆ لاواز کردن و تێکدانی ئاشتی کۆمەڵایەتی و شکاندنی هەمو پیرۆزییەکان و تێک بەردانی یەکتر و لەبیرچونەوەی پێداگری لەسەر گەڕانەوەی دەستور و شکاندنی هەستی نەتەوایەتی و بەتایبەتی لێکترازان و هەڵوەشاندنەوەی هێزەکانی یەکێتیی نیشتمانیی کوردستان کە ئێستا یەکێتی ڕۆڵێکی گەورەی هەیە لە پشتیوانی کردنی ڕۆژئاوای کوردستان و باکوری کوردستاندا… گورزەکەی ڕێکخەری بزوتنەوەکە بۆ سەری یەکێتییە. بیەوێ و نەیەوێ لە خزمەتی ئەم پلانە گڵاوەدایە.لەدوارۆشدا خوشی ئەگریتەوە.
من یەکێتی نیم بەڵام وەک کەسێک کە لە مناڵیمەوە لەگەڵ گەلەکەی خۆمدا بوم و یەکێکم لە دامەزرێنەری کۆمەڵە و یەکێکم لە یەکەمین لێپرسراوی دەستە چەکدارەکانی هەڵگیرساندنەوەی شۆڕش و بە درێژایی تەمەنم کاری سیاسیم کردووە و لێپرسراوێتیم لەسەر شان بووە، هەرگیز چ لە شاخ یا لە شار بەرامبەر سیاسەتی هەڵە و لادان و خواروخێچییەکان بێدەنگ نەبوم تا ئێرەش بە پاک و بێگەردییم هێناوە.
بۆیە بە تاوانی ئەزانم بێدەنگی هەڵبژێرم و سەرئێشە بۆ خۆم دروست نەکەم. من چاوپۆشی لە هەڵەکانی یەکێتی ناکەم بەلام هیوا دارم بەخۆدا چوونەوەیەکی گەورە بکەن بەڵێنی ڕاست بە خەڵک بدەن کە لە پێناوی عەدالەت و یەکسانی و سیستمێکی دیموکراتی و دەستورێکی دیموکراتی سەروەری یاسادا خەبات بکەن.
من لەدوای خۆپیشاندانەکانی 17ی شوباتەوە گەیشتمە ئەو قەناعەتەی کە هەوڵ بدەین لەگەڵ یەکێتیدا لێک نزیک بکەوینەوە و هەرگیز جارێکی دی دژایەتی یەکتر نەکەین پشکێکی گەورەش لە پێکهێنان و ڕێکەوتننامەی دەباشاندا بەر من ئەکەوێت.
هەمو ئەزمونەکانی هەڵبژاردن، دەنگی زۆر و کەم، واقیعی ئەم وڵاتە بە پاشخان و ڕوداوەکانییەوە، بەو دەسەڵاتەی ئەم وڵاتە بەڕێوە ئەبات فێری کردمەوە کە چەند دەنگی خەڵک بەنرخ و جێگەی ڕێزە بەڵام لەم جۆرە سیستمەدا دەنگی هێز و باڵانسی هێز کاریگەریی سەرەکی گۆڕانکارییە. ئەوەی لە 4 سالدا یەک تەنها پرۆژەی پی نەچەسپا ئەوا مەنتیقی هێز لەچەند ساتێکدا ئەتوانی هەمو موعادەلەکان بگۆڕێ بۆیە بەکەمگرتنی یەکێتی نیشتمانی و هەڵسەنگاندنی بە دەنگی کەم کە ئەمەش لە ئان و ساتدا قابیلی گۆڕانە، تێنەگەیشتنە لە واقیعەکە. یەکێتی لە هاوکێشە سیاسییەکاندا ئەتوانێ دەورێکی گەورە بگێڕێ.
چەواشەکردن و ناڕاستی لەگەڵ خەڵک بە هەڵگرتنی دروشمی بەرەو دەسەڵات کە ماناکەی لە ڕووی سیاسی و زانستییەوە هەر تەنها مانای دەسەڵات گرتنە دەستە نەک چوونە ناو حکومەت، کەچی بۆ هەڵخەڵەتاندنی خەڵک بەوە ئەچوێنرێ کە ئەمەیە بەرەو دەسەڵات.
یەکێ لە پرنسیپەکانی گۆڕان، گەڕانەوەی کیانوشەخسیەتی ئینسانی کوردو پەروەردەکردنەوەیەتی کەچی درۆی لەگەل ئەکرێوئەخەلەتێینری. بەشداری لەمجۆرە حوکمڕانییەدا بەو هیوایەی کە بەشدار ئەبیت لە بڕیاری سیاسی دا و ئەتوانیت گۆڕانکاری لە حوکمدا بکەیت بەڕاستی بەدرۆ خستنەوەی گۆڕان و هەمو ئەو قسانەیە کە تا ئێستا ئەوە شەش ساڵە لە ڕاگەیاندنەکانی گۆڕانەوە ئەکرێ… بزوتنەوەکە لە دەستی یەک کەس دایە و بەپێی مەزاج و ئارەزووە ئیقتیسادی و سیاسی و نەفسییەکانی ئەو بەڕێوە ئەچێت.
دڵنیام کە بزوتنەوەکە بەرەو هەڵدێر ئەبات. بۆیە لێرەوە ڕایئەگەیەنم کە من هەمیشە لەگەڵ گۆڕانکارییدام بەڵام هیچ ئومێدێکم بە بەڕێوەبەرایەتییەکەی ئەو بزوتنەوەیەوەنیەو و هیچ پەیوەندی وئیلتیزامێکم لەگەلیاندا نەماوە.

برای دلسوزتان
#سالار عەزیز#