یادەوەری مورافەعە گەورەکە..
ساڵانێکی زۆر تێپەڕی و ئێستاش دیمەنەکانی مورافەعە گەورەکەی مامی هەمووان لەیادەوەریدا ماوەتەوە، ئه و جوڵە سیاسیەی #مام جەلال# لەسەر خوانی بیناکردنەوەی عیراق و لەدانیشتنی ئەنجومەنی حوکم بە بەرچاوی (پۆل بریمەر)ی حاکمی مەدەنی عیراقەوە، کوردستانیبوونی #کەرکووک#ی لەرێگەی نەخشه و دۆکۆمێنتە مێژووییەکان جارێکی تر سەلماندەوە و بە هەمووانی ووت، کە چەندی ستەم بەردەوام بێت، چەندە تەعریب و پاکتاوی ڕەگەزیی درێژەی هەبێت، چەندەش دیمۆگرافیای ئه و شارە بگۆڕێت، کەرکووک بە کوردستانی دەمێنێتەوە.
مورافەعە گەورەکەی مام، ڕێک ڕەنگدانەوەی شعرەکەی باوکمە، ”لە پێش ئاگر پرستیدا، لە دیلی و لە سەربەستیدا هەر کورد بووین و هەر کوردیش دەبین، هەر به و لۆژیکەش مامی گەورە کوردبوونەوەی خۆی و یەکێتی دوپاتکردەوه و لەبەرچاوی هەمووان دژ بە لۆژیکی نکۆڵیکردن و سڕینەوەی ناسنامەی کوردستانیبوونی کەرکووک وەستایەوه و لەرێگەی خستنەڕووی دۆکۆمێنتی ئەوانی دیکەوە، بەئیمپراتۆریەتی عوسمانیشەوە جارێکی تر سەلماندی، کەرکووک دوێنێ هی ئێمە بووه و ئێستاش هەر ئێمە خاوەنین و سبەینێش دەبێت هەر لەژێر قەڵەمڕەوی کوردستانیبوون و جوگرافیای هەرێم بمێنێتەوە، بەدڵنیاییشەوە، کەس بە ئەندازەی مام جەلال وەک مامۆستا ئیبراهیم ئەحمەدی باوکم کە لەپەرەگرافێکی دیکەدا دەڵێت ”گەلان هەموو برای منن، بە ئەندازەی برایەتی گەلانی دیکەوە نەبووە تەنانەت ڕەهەندەکانی پرۆسەی مورافەعە گەورەکەش هەر ڕەنگدانەوەی باوەڕی پتەوی مام جەلال بووە بە مافی ئه و نەتەوه و پێکهاتانەی کەرکووک کە مێژوویەکە هاوشان لەگەڵ کورد له و جوگرافیایە دەژین.
کوردایەتی هاوچەرخ، کە مام جەلال ڕابەرایەتی دەکرد، تەنها پەیوەست نییە بە زەمەنی مورافەعەوە، هەروەک پرۆسەی مورافەعەش بۆ کێشکردنی ڕای گشتی ئەوانی دیکە نەبووە، بەڵکو ئەوەی لەلۆژیکی مام و لە مێژووی یەکێتیشدا ڕەنگیداوەتەوە، بەکردەوە ستراتیژێکی ڕاست و دروست بووە دەرهەق بە ئەوانی تر، کەسیش ناتوانێ نکۆڵی لە ڕۆڵی مام بکات لە پشتیوانی پێکهاتە جیاوازەکانی کەرکووک، بەعەرەب و تورکمان و ئاشوری و تەواوی پێکهاتە ئیتنی و ئاینی و ئاینزاکان، ئەوەش ڕێک ئه و لۆژیکەیە کە دەبێت لەدوای کۆچی ئەبەدی مامی گەورە، یەکێتییەکان درێژەی پێبدەن و نەیەڵن ئه و شاڕێیەی کوردایەتی و ئه و کوردایەتیە هاوچەرخ و مرۆییە بپوکێتەوە.
ئێستا یەکێتی لە غیابی مام جەلالدا، گرنگە لەسەر کۆی ڕەهەندە سیاسی و ئابوری و مرۆییەکان شوێن پێی هەنگاوەکانی مام جەلال بکەوێت، دەبێت هەوڵبدات لەبارەی کۆی پرس و دۆسیە ناوخۆیی و هەرێمیی و نێودەوڵەتییەکان هەمان ڕێباز پەیڕه و بکات`و کوردستانی و یەکێتی بوونی خۆی لەدەست نەدات، دەبێت یەکێتی ببێتەوە یەکێتییەک، لۆژیکی سزاو پاداشت، وەفاداری و پشت لێکردن، نەرمو نیانی و هەڵشاخان لە یەکتر جیا بکاتەوه و نە کەسی لێ زیاد بێت و نە بەتۆبزیش کەس بکاتەوە خاوەن، چونکە ئه و سیاسەتی جیاکاریی و دابەشبوون و پێشێلکردنی بنەما و پاش و پێش خستنی بەرژەوەندیانە دواجار هەم پێچەوانەی فەرمایشتی مام جەلاله و هەمیش پێچەوانەی ئاراستە مێژووییەکانی یەکێتی نیشتمانی کوردستانیشە، ئەوەی دەتوانێ ئه و لاڕێبوونەش ڕابگرێ و نەیەڵێت یەکێتی لە ڕاڕەوی مێژوویی خۆی دووربکەوێتەوە، تەنها کۆنگرەیە، کۆنگرەیەک کە دەشێت ببێتە مورافەعەیەکی نوێ لەمێژووی یەکێتیدا کە لەپێناو خۆڕاستکردنەوەدا ببەسترێت.
#شاناز ئیبراهیم ئەحمەد#
#09-02-2019#