نووسەر: مەلا بەختیار
2019 [1]
هەڵبژاردن و پۆپۆلیزم، زادەی 15 کۆڕی ناوبراوە کە لەسەروبەندی بانگەشەی هەڵبژاردنی پەرلەمانی عێراق 2018، لەزۆربەی شار و شارۆچکەکانی کوردستان ئەنجامی دا. کە تێیدا لەڕوی زانستی سیاسی و فکری سیاسی، تەواوی چەمکەکانی هەڵبژاردن و دیموکراسی و دەساودەستکردنی دەسەڵات و حزبی پاشخان پۆپۆلیزم و حزبی خاوەن ستراتیژ و چەندین چەمک و ڕوداو و پێشهاتی سیاسی باس دەکات.
لەدوای هەڵبژاردنەکانی کوردستان لەساڵی 1992، ئەمە یەکەمینجارە بە شێوازێکی مۆدێرن، بانگشەی هەڵبژاردن لەرێگەی کۆڕی فکری و سیاسی ئەنجام بدرێت، کە ئەویش داهێنانەکەی دەگەڕێتەوە بۆ مەلا بەختیار، دەنا زۆربەی بانگەشەکان هەمیشە دروشمبازی و هوتاف و فێستیڤاڵی گۆرانی و هەڵپەڕکێ و شەڕە پەڕۆ بووە. بەڵام لەکتێبی (هەڵبژاردن و پۆپۆلیزمدا) ڕوداوەکان، ئامانج و هەڵوێستی حزبەکان، سیاسەتی حزبەکان، موزایەدەی بەر لە هەڵبژاردن، هەموویان بە شێوازێکی فکری و زانستیانە خوێندنەوەیان بۆ دەکرێت.
هەر لەوبارەیەوە، مەلا بەختیار، لەپێشەکیەکدا بۆ کتێبەکە، ڕونکردنەوەیەکی کورت لەسەر ئەو جۆرە بانگەشەیە و خودی کتێبەکە دەدات. ناوبراو لەو پێشەکیەدا ئاماژە بەوەدەکات: ئەم کتێبە، وەکو کۆبەندی (15) کۆڕ کە لە(7/2/2018) لەزانکۆی گەرمیان، دەستمپێکردو دوا کۆڕیش لە (9/5/2018) لەشاری کۆیە، کۆتاییم پێهێنا، بابەتگەلی کۆڕەکان، سەرجەم پەیوەندییان بەو کێشە سیاسی و ململانێی ناو هاوکێشە کۆن و نوێ سەرهەڵداوەکەی، ناو کوردستان و عیراق و یەکێتییەوە هەیە. پێمخۆشە، دوو ڕاستی، لەم پەیڤەدا، وەکو کورتە پەیامێک ڕونبکەمەوە:
یەکەمیان : یەکەمینجار بوو، لەمێژووی هەڵبژاردنی کوردستان و عیراقدا، هێندەی زانیاریشم هەبێ، لەناوچەکەشدا، بەشێک لەهەڵمەتی هەڵبژاردن، دوور کەوتنەوەبێ لەفێستیڤاڵ و چەپڵەڕێزان و هۆڵ پڕکردن بە ئۆتۆمبێل و بەناردنی فەرمانبەران بۆ ناو هۆڵەکان. بەمیتۆدێکی نوێ چەشن، کە ئەویش کۆڕی سیاسی-شیکاری- هزرییە، ئەنجامبدرێ.. خەسڵەتی ئەم کۆڕانە، کە ئێمە لەگەرمەی هەڵبژاردندا دامانهێناوە، دوورکەوتنەوەیە لەدروشمبازیی و ڕق و کاردانەوە. زۆرتر، شیکردنەوەی ڕووداوەکان و، لێکدانەوەی سیاسەتی نەیاران و، تاڕادەیەکیش، توێژینەوەی دەرونشیکاریش تێهەڵدەکێشرێتە دووتوێی ئەم بابەتەی ململانێکان.
دووەمیشیان: کەمجار لەمێژووی ڕەخنە لەسیاسەتەکان و پێشبینی ڕووداوەکان، بە ئەندازەی چاوەڕوانییەکانی ناو بابەتگەلی ئەم کتێبە، لەگەرمەی ناکۆکییەکان و کێشمەکێش و جیابوونەکاندا، بۆچوونەکان لەماوەیەکی کورتدا، ڕاست و دروست دەرچون. جارێ، فریانەکەوتین بابەتی کۆڕەکان بۆ ئەم کتێبە چاک و چاپ بکەین، بۆچوونەکانمان دەربارەی سەرهەڵدان و هەڵدێران، سەبارەت بەگەلێ ڕاستی، هاتنەدی..! بۆئەوەی ئەم ڕووداوانەو هەڵبەزو دابەزی ڕەوتە سیاسییەکان، بەکۆبەندی بخرێنە کتێبخانەکانی کوردستان و، ڕاستییە مێژوویەکان نەکرێنە قوربانی پیلانگێڕیو، لەناو ویژدان زیندوواندا بمێنێتەوە، پێمانباشبوو کۆڕەکان لەم کۆبەندەدا چاپ بکەین، بۆ ئەوەی ئەم بۆچوونەشمان، بەدەردی سەدان بۆچوونی دیکەمان لەشۆڕش و ڕاپەڕین و سایەی حکومەت، نەبرێن..! ئیدی ئەو کەسە کەسە، حەرفێکی بەسە!