نامەیەک بۆبەڕێزان:
یونامی /مافی مرۆڤ
قونسوڵخانەکانی وڵاتان لەعیراق
پەرلەمانی عیراق
سەرۆک وەزیرانی عیراق
پەرلەمانی وڵاتانی ئەوروپا
ڕێکخراوەکانی مافی مرۆڤی جیهان
دۆخی مافی مرۆڤ و ئازادیی ڕادەربڕین لە سنووری ڕاپەڕین ڕانییە و قەڵادزێ لە مەترسیدایە.
لەگەڵ دەستگرتن بەدەسەڵاتەوە لەلایەن دەسەڵاتدارانی ئێستا و ڕابردووی هەرێمی کوردستان ژیانی خەڵک کەوتووەتە سەختترین قۆناغ، لەبەر چەوساندنەوەو هیلاککردنی خەڵک لەلایەن ئەو دەسەڵاتەوە هاوڵاتییان مەرگ بەئاواتدەخوازن و بە هەزارانیان لە کوردستان ڕایان کردووە بۆ وڵاتانی تر تا ژیانێکی شایستەتر بژین. سەرڕای زیادبوونی دیاردەی خۆکوژی و کێشە کۆمەڵایەتییەکان.
بەڵام لەگەڵ دروستکردنی قەیرانە کەڵەکەبووەکانی کوردستان لە شەش ساڵی ڕابردووەوە، هاوڵاتییانی هەرێمی کوردستان لەخراپترین دۆخی حکومڕانی و کەڵەکەبوونی قەیرانەکان و ترس و بەرتەسککردنەوەی ئازادی وبرسییەتیدا ژیان دەکەن.
بەڕێزان
خەڵکی کوردستان تەواو بێ ئومێد کراوە، مووچە نیە، دامەزراوە سیاسی و یاساییەکان لەباربراون، بێکارییەکی قەبە هەیە، بازاڕ ناجێگر و سستە، هەموو چینوتوێژەکان لە نەهامەتیدا ژیان دەکەن و منداڵان ومێرمنداڵان وگەنجانیش لە گشت توێژەکان زیاتر بوونەتە قوربانیی ئەو دۆخەی کە لەلایەن دەسەڵاتەوە خولقێنراوە، کاتێکیش خەڵک دێتە سەرشەقام و گەنجان ڕووبەڕووی گەندەڵیی حکومڕانیەکی سەرکوتکەر و یاسابەزێن دەبنەوە، ئەوا ئەو دەنگە ناڕازییانە بە لێدان و ڕفاندن و هەڕەشەی جۆراوجۆر و هەتا ڕاددەی کوشتنیش وەڵامدەدرێنەوە.
لەڕانییە لەبەرواری 10ی ئابی 2020 لەبەرامبەر خراپی ژیان و گوزەرانیان گەنجان وچالاکوانان و خەڵکی برسی دوای ئەوەی هیچ کات وەڵام بەداخوازیەکانیان نەدەدرایەوە و زانیان ژیان لە دۆخێکی خراپدایە، هاتنەسەرشەقامەکان بۆناڕەزایەتی دەربڕین، بەڵام هێشتاش شارەکە بە سەرباز و هێزی ئەمنی تەوق کراوە و سوکایەتی بە گەنجان ومێرمنداڵانی تەمەن 15ساڵ وخوارئەوتەمەنە ئەنجامدرا و ڕێگای هاتوچۆیان لێ قەدەغە کراوە، بە دەیان هەرزەکاری خوارتەمەنی 18ساڵی و گەنجان بەبێ بڕیاری دادگا و مخالفی دەستووری عیراقی ماددە (37) بڕگەی یەکەم و دووەم بەشێوەی ڕەشبگیری زیندانیکراون، لەبەرواری 12ی ئاب تا19ی ئاب ئەوگەنجانەی دەستگیرکران ژمارەیان لە قەڵادزێ و ڕانییە دەگاتە نزیکەی (100) گەنج و بریندارکردنی زیاتر لە (15) گەنجی تر لەناویاندا ڕۆژنامەنووس هەیە.
ماددەی (37) بڕگەی یەکەمی دەستوور دەڵێت: هەموو هاوڵاتییەک مافی ئازادیی ڕادەربڕین و ناڕەزایی هەیە و بڕگەی دووەمی دەڵێت: هیچ کەسێک بەبێ بڕیاری قەزا نابێت دەستگیر بکرێت.
لە کوردستان و هەرێم، هیچ واتایەک بۆ ئازادیی مرۆڤ و ڕێزگرتنی کەرامەتی مرۆڤ نییە، لەبەرئەوەی خەڵک بەوشێوەیە کەوتووەتە ناو دۆزەخێکی خولقێندراوەوە، بەجۆرێک هەر دەسەڵاتە و لەسنووری خۆی بە بەرپرس دەزانین لەبەرامبەر ژیان و کەرامەتی خەڵک. بۆیە ئێمە دەنگی ناڕەزایەتی و بەهاناوەچوون دەگەیەنین بە جیهان بەتایبەت یونامی و پەرلەمانی ئەوروپا و ڕێکخراوەکانی مافی مرۆڤی جیهانی و ناوخۆیی لەو دۆخە مەترسیدارەی خەڵک ئاگادار دەکەینە، لەو سۆنگەیەوە داوا دەکەین:
1. تەوقی سەربازی کەلەپێشمەرگەوئاسایش وهەمووجۆرەکانی پۆلیس پێک هاتوە، ڕەشبگیری و سزادانی گەنجان بەزوویی لەڕانییە و شیلادزێ و ناوچەکانی تری هەرێمی کوردستان کۆتایی پێ بهێنرێت.
2. مافەکانی گەنجان، فەرمانبەران، مامۆستایان و توێژەکان بگێڕرێتەوە و پارە دزراوەکان بهێننەوە لای میللەت.
3 گێڕانەوەی سەروەری بۆ یاسا و دەرهێنانی لەژێر هەیمەنەی دەستەڵاتی سیاسی.
4 داوادەکەین بەزووترین کات ڕێکخراوەکانی مافی مرۆڤ، لەڕێی ناردنی نوێنەر و ڕاسپاردەوە بێنە کوردستان و لەنزیکەوە بە بەڵگە و داتا، ئاگاداری نەهامەتییەکانی خەڵک بن، بەدەست دەسەڵاتی حزبە حکومڕانەکانی هەرێمەوە.
کۆمەڵێک لە چالاکوانان، مامۆستایان و فەرمانبەرانی ناوچەی ڕاپەڕین.
30-08-2020