ئامادەکرن: بەرزان ئەبوبەکر
وەرگێڕان: کارزان ڕەشید عەلی
د کەڤندا شەهزادەیەک هەبوو د ڤییا ژیانا هەڤژینیێ پێک بینیت، بو ڤێ مەبەستێ ژی د ڤییا پرس و ڕاوێژا خۆ ب حەکیم و کەسێن خودان ئەزموون بکەت، داکو هاریکارییا وی بکەن د هەلبژارتنا هەڤژینا ژیانا وی دا..
ل دووماهیێ باشترین بۆچوون هەلبژارت کو هەڤژینیێ دگەل ڕاستگۆترین کچا باژێری دا پێک بینیت، چونکی کەسێ ڕاستگۆ چ جاران خیانەتێ دگەل تە ناکەت، دزیێ ژ سەروەت و سامانێ تە ناکەت، چ جاران درەوان د گەل تە ناکەت، هەمی تشتان ب شێوەیەکێ ئاشکەرا دێ بووتە بەحسکەت..
ب ڤێ چەندێ بڕیار دا ئاهەنگەکێ ژ بو کچێن باژێری سازبکەت و ڕاستگۆترین کچ د ناڤ واندا بکەتە هەڤژینا خۆ یا پاشەڕۆژێ، دەمێ ئاهەنگێ د ناڤ باژێری دا هاتە ڕاگەهاندن، ڕۆژ و دەمێ ئاهەنگێ نێزیک بوو، کچێن باژێری هەمی ب شێوەیکێ بلەز و دەستە دەستە بەرەڤ مەیدان و گۆڕەپانا ئاهەنگێ کەفتنە ڕێ، د ناڤ واندا کچا خزمەتکارەکێ هەژار هەبوو، گەلەک حەز دکر بەشداریێ د ئاهەنگێ دا بکەت و ببیتە هەڤژینا پاشەڕۆژێ یا شەهزادەی و ببیتە خاتینا ئێکێ یا وەڵاتی، بو ڤێ مەبەستێ بڕیار دا بهێت و بەشداریێ د ڤێ ئاهەنگێ دا بکەت، بەلێ دەیکا وێ د تڕسیا کو بچیت و بەشداریێ بکەت و دلێ وێ بهێتە شکاندن و کارتێکرنەکا خراب لسەر وێ دروست ببیت، چونکی بێگۆمان شەهزادە دێ د گەل کچێن خودان پلە و پایە هەڤژینیێ پێک ئینیت، ژ بەر ڤێ چەندێ دەیکا وێ د ڤییا ڕێگریێ ژ کچا خۆ بکەت و ڕێکێ نەدەتێ بەشداریێ د ئاهەنگێ دا بکەت..
بەلێ کچا وێ کەسەکا ژیر و ب ئەزموون بوو و گۆتێ: دەیکا من یا خۆشتڤی، خو خەمگین نەکە، خو ئەگەر ئەز بەشداریێ بکەم، چ زیان ب من ناکەڤن، ب تنێ دێ بەشداریێ د ئاهەنگێ دا کەم، و ژبلی وێ چەندێ، کی دبێژیت د ئەزموونا شەهزادەی دا ئەز سەرکەفتنێ ب دەستڤەنائینم؟ ب ڤی شێوەی شیا دەیکا خۆ ڕازیبکەت و ئەو ژی وەکی کچێن باژێری بەرەڤ ئاهەنگێ ب ڕێککەفت..
د ڕێکێ دا کۆمەکا کچێن خوپەرست دیتن، هەمی ب دیتنا وێ کچا خزمەتکار کەفتنە سەرنج و تڕانەپێکرنێ ب وێ، ئێکێ دگۆت: دێ بوچی خۆ وەستینی؟ ئێکا دی دگۆت: تو بێژی شەهزادە د ناڤ ڤان هەمی کچێن خانەدان و جوان و بەژن بلند، کچا خزمەتکارەکی ب کەتە هەڤژینا خۆ..
ب ڤی شێوەی هەر ئێک ژ وان و ب شێوەیەکی ئاخفتن گۆتنە وێ کچا خزمەتکار، لێ خو ئاخفتنەکێ ژ وان ئەو سار نەکر، بەلکو ب وی ئاستێ باوەری ب خوبوونێ بەرسڤا وان دا و گۆت: ب بەشداریکرنا من د ئاهەنگێ دا نە زیانێ ب خۆ دگەهینم، نە ژی زیانێ ب هەوە یێن خانەدان دگەهینم، گەلی خاتینان..
دەمێ هەمی گەهشتینە جهێ ئاهەنگێ، شەهزادەی پشتی کو ب خێرهاتن ل وان کری و مەبەستا ئاهەنگێ بو دایە دیارکرن، فەرمانەک دەرکر کو هەر پشکدارەک ددەمێ چونا خۆ دا بو ژ دەرڤە تۆڤێ گولان وەربگریت، شەهزادەی گۆت: من دڤێت هوین ڤان تۆڤان بچینن، پشتی شەش هەیڤێن دی ڤەگەڕنەڤە بو هەمان جه، دا کو بزانم کا کی ژ هەوە شیایە جوانترین گول پەروەردەبکەت، بێگۆمان خودانا جوانترین گول دێ هێتە هەلبژارتن و دێ بیتە خاتینا ئێکێ یا وەڵاتی!
هەر ئێک ژ پشکداران تۆڤێن خو وەرگرتن و ڤەگەڕیانە ماڵ و دەست ب چاندنا تۆڤان کرن، کچا خزمەتکار کو ئەو ژی ئێک بوو ژ پشکداران تۆڤێ خۆ وەرگرت و ڤەگەڕیاڤە ماڵ، گەلەک هەوڵدان، بەلێ تۆڤێ وێ شین نەبوو، هەر چەندە ئاخا وێ گۆهوڕی، قافکێ وێ گۆهوڕی، جهێ وێ گۆهوڕی، بەلێ چ مفایێ خۆ نەبوو، تۆڤ کەسک نە دبوون. ڕۆژ هاتن و چوون، شەش هەیڤ ب دووماهیک هاتن، بەلێ کا وێ چەوا ئەو تۆڤ وەرگرتبوون هەر ب وی شێوەی بوون و چ گۆهوڕین تێدا نەهاتبوونەکرن، دگەل وێ چەندێ ژی دا بڕیار دا ڤەگەڕیتەڤە بو ئاهەنگێ و د دەمێ دیاریکری دا ئامادەببیت و ل شوینا دەستکەکێ گولان، تۆڤی وەکی بەرێ بو ب زڤڕینتەڤە، هەر چەندە دەیکا وێ گەلەک هەوڵدان کو ڕێکێ لێ بگریت نەچیتە ئاهەنگێ، بەلێ ئەو شییا دەیکا خۆ ڕازیبکەت و گۆتێ: دەیکا من یا خۆشتڤی، خو چ زیان ب من ناکەڤن، بەلکو ب تنێ دێ پشکداریێ کەم و د ڕێورەسمان دا ئامادەبم.. د ڕێکێ دا دووبارە چاڤێ وێ ب وێ دەستەیا کچێن باژێڕی کەفتەڤە، کو هەر ئێک ژ وان گولەکا جوان د دەستان دا بوو، دووبارە تڕانە و یاری ب وێ کچا خزمەتکار کرن و گۆتنێ: سڵاڤ ل وێ گولا جوان یا ددەستێ خاتینێ دا، گەلەک یا جوانە، ئەڤە تە چاوا و ل کیژ ئاخێ هوسا مەزن کرییە؟
بەلێ ڤان ئاخفتنان چ کارتێکرن ل کچا خزمەتکار نەکرن و نەشیان ببنە ئەگەر کو پەشێمان ببیت ژ پشکداریکرنێ د ئاهەنگێ دا!
هەمی گەهشتنە مەیدانا ئاهەنگێ، شەهزادەی ئێک ئێکە بەرێ خۆ ددا گولێن وان و دەست خۆشی ل وان دکر، دەمێ گەهشتییە لایێ کچا خزمەتکار ب مەندەهۆشیڤە پرسیار ژێ کر و گۆتێ: کانێ یە گولا تە، بوچی تۆڤێن تە هەر وەکی خونە؟
کچا خزمەتکار د بەرسڤا شەهزادەی دا گۆت: هێژایێ من، من گەلەک هەوڵدا بەلێ تۆڤ شین نەبوون. هوین دزانن چ ڕوویدا؟
شەهزادەی گۆت: پیرۆزبیت، دێ هەڤژینیێ دگەل تە پێک ئینم!
ڤێ ئاخفتنێ هەمی کچێن ئامادەبووییێن ئاهەنگێ مەندەهۆشکرن، هەمییان گۆتی مە جوانترین گول یێن ئیناین، شەهزادەی کەسەک هەلبژارت کو هەتا گولا وێ شین ژی نەبوویە!
شەهزادەی د بەرسڤا وان دا گۆت: هەمی ئەو تۆڤێن ب هەوە هاتینە دان تۆڤێن نەزۆک بوون و شین نە دبوون، هوین د ڕاستگۆ نەبوون د گەل من دا، هەوە هەمییان تۆڤێن خۆ یێن گۆهوڕین، ب تنێ ئەڤ کچە یا ڕاستگۆ بوو، من ژی دڤێت شاهژنەکا ڕاستگۆ ب هەلبژێرم. ئێدی شەهزادەی هەڤژینی دگەل وێ کچا خزمەتکار دا پێک ئینا و بو خاتینا ئێکێ یا وەڵاتی!
پوختە:
 ڕزگاربوون، سەرفەرازی، بەختەوەری، سەرکەفتن یا د ڕاستگۆییێ دا، ژ بەر ڤێ چەندێ هەردەم د ڕاستگۆبن و چجاران درەوان نەکەن.
 ئەو تشتێ کو کچا خزمەتکار کرییە خاتینا ئێکێ یا وەڵاتی و گەهاندییە کۆچکا پاشای ڕاستگۆیی بوو، ژ بەر ڤێ چەندێ یێ ڕاستگۆبە دێ گەهییە هیڤییێن خۆ.
 باوەری ب خوبوون و وێرەکی، خالەکا مەزنە کو دڤێت چجاران ژ بیرنەکەین، چەند کەسان دڤیان تڕانا ب ڤێ کچێ بکەن و پەشێمان بکەن و نەهێلن بەشداریێ د ئاهەنگێ دا بکەت، بەلێ کەس ژ وان نەشییا وێ پەشێمان بکەت چونکی وێ باوەری ب خو هەبوو![1]