#هەپەگە# ڕایگەیاند لە ساڵی ڕابردوودا 946 سەربازی تورکیایان کوشتووە، ئەو وڵاتەش 1275 ئۆپراسیۆنی ئاسمانی ئەنجامداوە، هەر لەو ماوەیەشدا 227 گەریلا شەهیدبوون.
ناوەندی ڕاگەیاندن و چاپەمەنی هێزەکانی پاراستنی گەل (هەپەگە) ئامارەکانی ساڵی ڕابردووی چالاکیەکانی خۆیان و هێرشەکانی سوپای تورکیا بڵاو کردەوە و ڕایگەیاند لەم ساڵدا 946 سەربازی سوپای تورکیایان کوشتووە و 227 گەریلاش شەهید کراون.
هەپەگە ڕاشیگەیاندووە سوپای تورکیا 1275 ئۆپراسیۆنی ئاسمانی و 120 هێرشی زەمینی ئەنجامداوە، لەبەرامبەردا گەریلاکانیان 393 چالاکیی سەربازییان ئەنجامداوە.
باڵی سەربازی #پەکەکە# ئاماژەی بەوەکردووە لەو ماوەیەدا بەهۆی هێرشی تورکیاوە دوو فەرماندەی سەربازی سوپای عێراق و 24 هاوڵاتی سڤیل گیانیان لەدەستداوە کە چوار منداڵ و دوو ژنیان تێدا بووە.
ناوەندی ڕاگەیاندنی هەپەگە ئاشکراشیکردووە کۆی ژمارەی ئەو هاوڵاتیە سڤیلانەی کە بەهۆی هێرش و بۆردومانەکانی تورکیاوە شەهیدبوون لەساڵی 2017وە گەیشتووەتە 173 هاوڵاتی لە هەرێمی کوردستاندا.[1]