محەمەد ئەمین عەسری، (1910-1974ز)
ئەو کەسەی چاپخانەی هێنایە شاری #کەرکووک#
دامەزرێنەری یەکەم چاپخانەی کوردی لە کەرکووک. (محەمەد ئەمین عەسری) لە خانەوادەیەکی کەرکووکی عەشیرەتی #زەنگەنە#یە، یەکێکە لەو کەسایەتییانەی گەورەترین خزمەتی بزاڤی چاپەمەنی و بڵاوکردنەوەی کوردیی لە کەرکووکدا کردووە.
شەیدابوونی عەسری بۆ ڕۆشنبیریی و کتێب وای لێ دەکات واز لە ژیانی مامۆستایی بهێنێ و بۆ پەیداکردنی کتێب بکەوێتە گەڕان لە شارەکانی ئەستەمبوڵ و تاران و قاهیرە و ژمارەیەکی زۆر کتێبی بکڕێ و ڕەوانەی کەرکووکیان بکات.
لە کۆتایی سییەکانی سەدەی ڕابردوودا عەسری دوو ئامێری چاپی فەڕەنسی لە جۆری (مارینۆ) و (جۆن مۆنۆپۆڵ) هێنایە کەرکووک کە بە دەستکاریان دەکرد. ساڵی 1935ز بۆ یەکەمجار لە مێژووی کەرکووکدا چاپخانەیەکی بەردین و کتێبخانەیەکی کوردی دامەزراند.
یەکەم کەس بووە چاپخانەی چاپی ڕەنگاوڕەنگی هێناوەتە کوردستان، ساڵی 1935ز چاپخانەی (تەرەقی) دامەزراند، لە ڕێگای ئەم چاپخانەیەوە دەیان کتێبی کوردی چاپ و بڵاوکردووەتەوە (ئەحمەدی، حیکایەتی دز و قازی، خورشید و خاوەر، شیرین و فەرهاد، ڕۆستەم و زۆراب، یوسف و زولەیخا، گوڵستانی شێخی سەعدی، حەکایەتی مەلای مەشهور، شیرین و خەسرەو، ئەمیر ئەرسەلان، حیکایەتی چل تووتی، دەزگیرانی ئایشەخان، ڕۆستەم و جیهانگیر، گرنگی هەتاو، حەیدەرنامە، ئیسماعیلنامە و ناگەهان، وەفاتنامەی ڕەسوڵی نازدار، میعراجنامە، فەتحی قەڵای خەیبەر).