ڕاگەیەندراوی پارتەکانی تورکیا:
“لە بەرواری 25ی ئەیلولی 2020دا بووین بە شاهیدی ئۆپڕاسیۆنێکی دوور لە پێوانە یاسایی و دیموکراسیەکان کە لە دژی 82 کەسایەتی سیاسەتمەدار بەڕێوەچوو، کە زۆربەیان سیاسەتمەداری هەدەپەن.
سیاسەت و سیستمی فەرمی لە تورکیا ڕۆژ بە ڕۆژ دوور دەکەوێتەوە لە دیموکراسی و ماف و ئازادی مرۆڤ و وابەستەبوون بە یاساکانەوە، لە تورکیا هۆشمەندی سیاسەتی تاکەکەسی و ئەو زوڵم و زۆرداریەی لە دژی ئۆپۆزیسیۆن و بە تایبەتی لە دژی کورد بەڕێوە دەچێت، ڕۆژ بە ڕۆژ لە زیادبووندایە و گەیشتووەتە بەرزترین ئاست، ئەم ڕووداوانە تاکڕەوی تورکیامان دێنێتەوە یاد.
نزیکەی 100 ساڵی بەسەردا تێپەڕی، بەڵام لە تورکیا تا ئێستاش ئەم هەڵوێستە بەردەوامە، ئەم سیاسەتە دەیەوێت دژایەتی و دوژمنایەتی ناو کۆمەڵگای قوڵتر بکاتەوە، چونکە خاوەنی ئەو هۆشمەندیەیە کە هەبوون و مانەوەی خۆی لەسەر دژایەتیکردنی لایەنەکان و دروستکردنی ئاڵۆزیی دەبینێت، بەڵام ئیدی ڕای گشتی و کەس و لایەنە دیموکراسیەکان لە تورکیا و زۆربەی کوردەکان هۆشیار بوونەتەوە و دەزانن ڕاستیەکە چیە و بچوکترین دەرفەت لەدەست نادەن.
گومان لەوەدا نییە، کە کوردی هەر چوار پارچەی کوردستان دەگەن بە مافەکانیان، مێژوو شاهیدە و جیهانیش ئەوە دەزانێت کە گەلی کورد لە مێژووی خۆیدا هیچ کات دوژمنایەتی نەتەوەیەک یان گەلێکی نەکردووە و ناشیکات، هەروەها مرۆڤ دەتوانێت ئەوەش بڵێت کە، لە قۆناغێکی وەها گرنگدا دەبێت هەست و ڕامانە نەتەوەییەکانی گەلی کورد لە هەموو کات زیاتر پەرە بسەنێت، ئێستا ئێمە لە سەردەمێکی وەهادا تێدەپەڕین.
ئێمە وەکو هێز و لایەنە کوردیەکان تەنها داوای مافە ڕەواکانی خۆمان دەکەین و پشتیوانی ئەو کەس و لایەنانەش کە مافەکانیان پێشێل کراون، ئێمە هیوادارین کە حکومەت و دەسەڵاتی دادوەری لە تورکیا واز لەم هەنگاوانەیان بهێنن.
بانگەوازیەکیش ئاڕاستەی هەموو بەرپرسانی تورکیا دەکەین کە، دوور نەکەونەوە لە دیموکراسی و ڕێگای دیالۆگ ئاستەنگ نەکەن و ڕێگای دانووستانەکان بە کراوەیی بهێڵنەوە و ڕێگاچارەی مەدەنیانە و ئاشتیانە بگرنەبەر، بە توندوتیژیی و بە فشار و تیرۆریزەکردن، دۆز و داواکا کۆمەڵایەتی و سیاسیەکان چارەسەر ناکرێن، ڕووداو و بەسەرهاتەکانی سەد ساڵی ڕابردووش ئەمەیان سەلماندووە.
داواکارین لە هەموو لایەنەکان بە دوای ڕێگاچارەی ئاشتیانە و مەدەنیانەدا بگەڕێن و یاسا نێودەوڵەتیەکان بە بنەما وەربگرن”.[1]