خوشک وبرایانی بەرێز
گەلی تێکۆشەری کوردستان
سێ ساڵ لەمەوبەر و لە پایزێکی وەک ئەمرۆدا، گەلی کوردستان و سەرجەم عیراقییەکان، پرۆسەی دیموکراسی و ئاشتی و پێکەوەژیان لەوڵاتەکەمان ڕابەرێکی هەڵکەوتوو، تێکۆشەر و پێشمەرگەی زیاتر لە نیو سەدە خەباتی ڕزگاریخوازی و دیموکراسیان لە دەست دا، عیراقی دیموکرات و فیدرالیش یەکەمین سەرکۆماری هەڵبژێراوی گەلپەسەندی بەرەو کاروانی جاودیدانی و نەمری بەرێکرد.
لە ڕێکەوتی (3/10/2017) دڵە گەورە و میهرەبانەکەی سەرۆک مام جەلال ڕابەری شۆڕشی نوێ و سکرتێری گشتی یەکێتیی نیشتمانیی کوردستان لە وڵاتی یٔەڵمانیا، لە وێستگەی چارەسەری و پشوی جەنگاوەرێکی ماندوونەناس، لە لێدانکەوت و بۆ یەکجاری ماڵئاوایی لێکردین.
کۆچی دوایی سەرۆک مام جەلال، سەرانسەر کوردستان بەهەموو بەشەکانی و گەلانی عێراق و بگرە تێکرای یٔازادیخواز و دیموکراسیخواز و ئاشتیخوازانی دونیای خەمبار و نیگەران کرد.
سەرۆک مام جەلال لە ماوەی زیاتر لە نیو سەدە بێوچان، خەباتی هەمەلایەنەی کرد بۆ سەڵماندن و بەدیهێنانی مافە ڕەوا نەتەوەیی و دیموکراسیەکانی گەلی کورد و پیادەکردنی بژاردەی دیموکراسی و دادپەروەری و پێکەوە ژیان لە عێراقی فرە پێکهاتەدا.
لە شۆڕش و بزوتنەوەی پێشمەرگایەتیدا، مام جەلال نموونەی گەورە و باڵای ڕابەری شۆڕشگێر و وردبین و ورەبەرز و پتەو بوو. یٔەزموونی کەڵەکەبووی مام جەلال لەم کایەدا هەر لە قۆناغی سەختی دەستپێکی شۆڕش تا داستان و نەبەردییەکان بۆ دانوستاندنی سیاسیی و دیبلۆماسی و دواجاریش بەرەنگاربوونەوەی مەرگەساتەکانی بەسەر گەلەکەمان هات و گۆڕینی بەرەو ڕێی هەڵسانەوە و ڕاپەرینی ئاداری (1991) و قۆناغەکانی کوردستانی ڕزگار، یٔەزموونێکە ناوازە و دەگمەن. لەهەمووشیانا خاوەن ئاکار و ڕەوشتی بەرزی نیشتمانیی و نەتەوەیی بوو، مام بوو.
لە خەباتی دیپلۆماتیدا، وێنەی مام جەلال لە مێژووی کوردایەتی هاوچەرخ و هەتا خەباتی ئازادیخوازانەی گەلانی ناوچەکەشدا دەگمەنە.پەیوەندییەکانی لە ئاستی میللەتانی ڕۆژهەڵات و دونیای عەرەبی و یٔاسیا و ڕۆژیٔاوادا، بنەغای پتەوی ئەو دەستکەوتە دیپلۆماتیانە بوون کە ڕەوایی و ڕەسەنایەتی مەسەلەی کوردی لە ڕۆژهەڵاتی ناوەڕاست دووپات دەکردەوە.
گەلانی ستەمدیدەی عێراق
تێکۆشانی سیاسیی و شۆڕشگێری سەرۆک مام جەلال هەمیشە لەسەر دینگەی پتەوی دیموکراتیزەکردنی وڵات و مسۆگەرکردنی ویستە نەتەوەییەکانی گەلی کورد بیناکرابوو بۆیە سەرەنجام هەر یٔەو نەخشە ڕێگا دیموکراتییە فرەییە سەرکەوت کە نەخشە ڕێگای عێراقێکی دیموکرات و فیدڕاڵیی بوو.
لە دوا وێستگەی ژیانی سیاسییشیدا سەرۆک مام جەلال لە پێگەی پارێزەری دەستوورەوە لە پێناوی نزیک کردنەوەی لایەنە سیاسییەکان و پێکهاتەکان و چەسپاندنی سازان و تەبایی لە نێوانیاندا، هەموو هەولێکی دا و هەمیشە خاڵی کۆکەرەو و ڕاگرتنی هاوسەنگی بوو، هەر بۆیە بە (سەمام یٔەمان)ی عێراق ناوزەد کرا.
گەلی کوردستانی سەرتاسەر
نەخشە ڕێگەی وڵاتێکی دیموکرات و فیدرال کە مافە نەتەوەییەکانی کوردی لە عێراق تێدا مسۆگەر کرا، بووە نموونەی شایان بۆ سەرتاسەری کوردستانی کە یٔیلهامبەخشی بەشەکانی تری کوردستانیش بێت لە خەباتی دیموکراسی و ئاشتیخوازی و مافخوازیاندا. بەمەش، لە پاڵ پشتیوانی لە مێژینەی لە خەباتی سەرتاسەری گەلەکەمان، ڕەهەندی کوردستانیی بەکرداری سەرۆک مام جەلال چاکترو بەرچاوتر درەوشایەوە.
هەڤاڵانی یەکێتی، پێشمەرگە قارەمانەکانی ڕێبازی ئاوەدانی مام جەلال، تێکۆشەرانی ژنان و لاوان و بیررۆشنانی ڕێگای ئازادی بیرورا و ڕێگای مافی چارەنووس یٔەمڕۆ لە هەموو ڕۆژێک زیاتر یەکێتیەکەمان، گەلەکەمان و ڕێبازی دیموکراسی ناوچەکەش، پێویستی بە حیکمەت و ئەزموون و دونیابینی سەرۆک مام جەلالە، دونیابینییەک کە کەلتورێکی سیاسی و میراتێکی شۆرشگێرانەی دەوڵەمەندە و هەموو لایەک دەتوانن دەرس و وانەی لێ وەر بگرن. بەڵام بۆ یەکێتییەکان ماف و یٔەرکێکی سەنگینی یەکێتیانە، کوردستانیانەو دیموکراتیانەیە کە پێوەی پەیوەست بن و لەسەری بڕۆن و بگرە دەوڵەمەنتریشی بکەن.
سەرکردایەتی نوێی یەکێتیش لە دوای کۆنگرەی نوێبوونەوەوە وەفاداری ئەو ڕێباز و ڕێگا ئاوەدانەیە کە سەرۆک مام جەلال نەخشەی بۆ کێشاوە. بۆیە جێی خۆیەتی لەم یادەدا بەڵێنی یەکێتیانە دووپات بکەینەوە کە فەلسەفەی مام جەلال قبلەنمای خەباتمان بێت،
ڕێ و ڕێبازی مام و هەموو شەهیدان و تێکۆشەرانی یەکێتی هەمیشە یٔاوەدان و درێژەی دەبێت تا بەدیهێنانی هەموو یٔاوات و یٔامانجە نەتەوەیی و دیموکراسیەکانی گەلی کوردستان.
سڵاو لە ڕۆحی پاکی ڕابەر و سەرۆکی مێژووییمان مام جەلال
نەمری بۆ هەموو شەهیدانی یەکێتی و گەلی کوردستان
مەکتەبی سیاسی
یەکێتیی نیشتمانیی کوردستان
3/10/2020[1]