راگەیەنراوێک لە فراکسیۆنی کۆمەڵ لەبارەی بڕیارەکەی دادگای فیدراڵییەوە
بەناوی خوای بەخشندەی میهرەبان
ڕاگەیەنراوی فراکسیۆنی کۆمەڵ لە پەرلەمانی کوردستان
سەبارەت بە بڕیاری دادگای فیدراڵی تایبەت بە دۆسێی نەوتی هەرێمی کوردستان، ئێمە لە فراکسیۆنی کۆمەڵ پێمانوایە بەرلەوەی دەسەڵاتی سیاسیی لە هەرێمی کوردستان چاوەڕێی بکردایە بزانێت دادگای فیدراڵی چی دەڵێت و چ بڕیارێک دەدات لەسەر پسی نەوت، دەبوو گوێی لە هێزەکانی ئۆپۆزسیۆن و خەڵکی کوردستان بگرتایە کە چەندین ساڵە داوای شەفافیەت دەکەین، ئەوەش بە جێبەجێکردنی یاسای نەوت و گاز و ئاشکراکردنی داهاتەکان و هێنانی گرێبەستەکان بۆ پەرلەمانی کوردستان و ئاشکراکردنی ڕێککەوتنە نهێنیە ژێربەژێرەکان و دامەزراندنی سندوقی کوردستان بۆ داهاتە نەوتیەکان.
بەداخەوە، لە 10 ساڵی ڕابردوودا دەسەڵات و کابینە یەک لە دوای یەکەکانی حکومەتی هەرێمی کوردستان، ئامادەنەبوون کەمترین شەفافیەت لە دۆسیەی نەوتدا بەرقەراربکەن و، گوێ لە دڵسۆزانی ناوخۆ بگرن کە ئامانجمان بوو نەوت ببێتە خێر و خۆشی بۆ خەڵک نەک ببێتە هۆی نانبڕین و قەرزارکردنی خەڵکی کوردستان و دەوڵەمەندکردنی کۆمپانیا حزبی و بیانییەکان.
سەبارەت بە چۆنیەتی مامەڵەکردن لەگەڵ بڕیارەکە، ئێمە پێمانوایە ئینکاریی و تۆمەتبارکردن و ڕقەبەرایەتی بە قازانج بۆ هیچ لایەک ناشکێتەوە و، پێویستە حکومەتی هەرێمی کوردستان ئەم بڕیارە بکاتە سەرەتای شەفافیەت لە نەوت و کردنەوەی دەرگای گفتوگۆ و ڕێککەوتنی ڕاستەقینە لەگەڵ بەغدا و کۆتایهێنان بە کۆمپانیای حزبی و بە نهێنی هێشتنەوەی دۆسیەی نەوت و ڕێککەوتنە ژێربەژێرەکان، چونکە مافە دەستورییەکان لە دەستوری عێراقی فیدراڵدا کە خەڵکی کوردستانیش دەنگی پێداوە، دەرفەتی باشی تیایە بۆ ڕێککەوتن لەسەر نەوت و داهات و ئەرک و دەسەڵات لە بواری داهات و خەرجی و سامانە سروشتییەکان لە نێوان بەغداو هەرێمی کوردستاندا.
هەروەها بە پێی دەستور، هەرێمی کوردستان و خەڵکەکەی دەتوانن سود لە تەواوی نەوتی عێراق و داهات و دەسەڵاتە فیدراڵیەکان وەرگرێت و، نەوت و سەرجەم داهاتەکان بۆ خێر و خۆشی خەڵکی کوردستان و گەلانی عێراق خەرج بکرێن، ئەمە جگە لە چەسپاوی مافە نەتەوەیی و مێژویی و خواکردەکان بۆ ڕێزگرتن لە گەلی کورد وەک پێکهاتەیەکی نەتەوەیی لە چوارچێوەی عێراقی فیدراڵدا.
پێشمانوایە تەنها چارەسەر بۆ هەردوو حکومەتی هەرێمی کوردستان و حکومەتی فیدراڵ لە یەک تێگەیشتن و پێکەوە کارکردن و ڕێککەوتنە لەسەر بنەمای پاراستنی بەرژەوەندی خەڵکی هەرێمی کوردستان و تێکڕای هاووڵاتیانی عێراقی فیدراڵ، هوشداریش دەدەین لەوەی ڕەتکردنەوەی گفتوگۆ و لێکتێگەیشتن و خۆدزینەوەی لایەنەکانی دەسەڵاتی سیاسیی هەرێم لەگەڵ بەغدا زیانی بۆ هەموو خەڵکی عێراق و هەرێمی کوردستانیش هەیە و ئەنجامی خراپتر بەدوای خۆیدا دەهێنێت و دواجار دەبێ ئەو لایەنانە تەحەمولی دەرەنجام و دەرهاویشتە نەخوازراوەکانی بکەن و بەرپرسیاریەتی هەڵبگرن.[1]
فراکسیۆنی کۆمەڵی دادگەریی
لە پەڕلەمانی کوردستان
#16-02-2022#