دوێنێ لە ماڵی پوورم
لەگەڵ بانو و شاد و یاد
کاتی خۆشمان بەسەربرد
بە ئێکسبۆکس و ئایپاد
ئینجا (بانو) بردینی
بۆلای حەوزی ماسییەکان
زانیاری زۆری پێداین
لەسەر ژیان و جۆریان
ڕەنگیان پرتەقاڵی و سوور
زۆر دڵگیربوو دیمەنیان
وادیاربوو یاری دەکەن
بە کلک و باڵ و سەریان
بەڵام من نیگەران بووم
بە ژینی ئەم ماسییانە
هەستمکرد دیلکراون
وان لەناو بەندیخانە
بۆیە چوومە لای پوورم
پێمووت چۆن لات ڕەوایە؟
خۆت بە ئازادی بژی و
گیانداری دیلت لایە
پوورم وتی زۆر ڕاستە
باش نییە ئەو جێگایە
چونکە ماڵی ماسییەکان
ناو ڕووبار و دەریایە
02 – 03 – 2018 هەینی
پەرتووکی #خەیاڵی کۆترەکان#
#فەرهاد ئەحمەد بەرزنجی# [1]