ناو:مستەفا
ناوی باوک: سەلیم
رۆژی کۆچی دوایی: #09-09-2021#
شوێنی لەدایکبوون: شاری #ڕانیە#
شوێنی کۆچی دوایی: شاری سلێمانی

$ژیاننامە$
مستەفا سەلیم مە حمود ئەحمەد
لە #01-07-1960# لە شاری ڕانیە لە گەرەکی قولە، لە بنەماڵەیەکی نیشتیمانپەروەر لەدایک بووە.
بەپێی ئەو دەستنووسانەی خۆی و یاداشتەکانی کە لەبەردەستن باسی لەوە کردوە کە بەرواری لەدایکبوونی دەگەرێتەوە بۆ پایزیی ساڵی 1958، بەڵام بەهۆی بارودۆخی ئەوکاتە لەسەر ناسنامە ساڵی 1960 ی بۆ دەنوسرێ.
بەهۆی ئەوەی لە بنەماڵەیەکی جوتیار لەدایک بووە هەر لە منداڵیەوە تێکەڵ بە کاری کشتوکاڵی دەبێت و لە پاڵیشیدا درێژە بە خوێندن دەدات، پێش تەمەنی چونە قوتابخانە دایکی کۆچی دوایی دەکات.
قۆناغەکانی سەرەتای و ناوەندی لە قوتابخانەی ڕانیە تەواو کردوە و قۆناغی 4 و 5 ی ئامادەیشی هەر لە ئامادەیی ڕانیە تەواو کردوە و قۆناغی 6ی ئامادەیی لە کۆیە تەواو دەکات.
لە دوای پەیماننامەی 11ی ئازار و لەبەر بارودۆخی هەڵگیرسانەوەی شۆرش وەکو هەموو بنەماڵەیەکی ئەوکاتەی پێشمەرگە لەو سەردەمەدا توشی ئاوارەی و دەربەدەری بوون، ئەو کاتە باوکی پێشمەرگەی پارتی دیموکراتی کوردستان بووە لە ناوچەکانی خەلەکان و چیای ماکۆک، ئەو لەگەڵ خێزانەکەی دەرۆن بەرەو ناوچەی مەرگە و لەلای خزمەکانی باوکی دەمێننەوە، هەر لەو تەمەنەوە سەرباری هیلاکەتی و کاری زۆر، متمانەی زۆر بەخۆی هەبووە و سەرپەرشتی کردنی خیزانەکەی دەگرێتە ئەستۆ، ئەو کاتە پۆلی دووی ناوەندی بووە بۆ درێژەدان بە خوێندن و کردنی تاقیکردنەوەکانی بڕیار دەدات بڕوات بۆ کوردستانی ڕۆژهەڵات و لەوێشەوە بەرەو پێنجوێن و تەوێڵە بۆ تەواوکردنی تاقیکردنەوەکانی.
لە 13/7/1974 لەگەڵ دوو هاوڕێی دەچن بۆ کرمانشان و دواتریش بەرەو تەوێڵە دەڕۆن و لە (معسکر طلبة)ی تەوێڵە تاقیکردنەوەکانی دەکات، لەوکاتەشدا کە سەرقاڵی تاقیکردنەوەن لە تەوێڵە، فەرماندەی شۆڕش لەو ناوچەیە چەند کارێکیان پیدەکات لەوانەش گواستنەوەی چەک و تەقەمەنی بۆ ئەو شوێنانەی تەوێڵە کە پێویستیان پێبووە دژی فرۆکە.
لە مانگی 10ی 1974 دەگەڕێتەوە سنوری مەرگە بۆ لای خیزانەکەی، دواتر لە کۆتایی مانگی 10 ی هەمان ساڵ بۆ درێژەدان بە خوێندن دەچێت بۆ ئێران، لە شاری سەردەشت دەست بە خوێندنی پۆلی سێی ناوەندی دەکات.
لە ساڵی 1980 -1981، لە کۆلێجی زانست بەشی زەویناسی (جیۆلۆجی) لە زانکۆی بەغدا وەردەگیرێت و دەست دەکات بە خوێندن، سەرباری قورسی ژیانی ئەوکاتەو دۆخی ئابوری بەردەوام دەبێت لە خویندن لە بەشەکەی، لەو کاتەشدا بە نهێنی دەبێتە ئەندامی کۆمەڵەی ڕەنجدەرانی کوردستان.
لەساڵی 1982 بەشداری بەرچاو و کاریگەری دەبێت لە خۆپیشاندانە جەماوەریەکەی شاری ڕانیە دژی ڕژێمی ئەوکاتە، دواتر بەهۆی بەشداری کردنی لە خۆپیشاندانەکان فەرمانی دەسگیرکردنی بۆ دەردەچێت و ناچار دەبێت بەهۆی ئەم فەرمانەوە لە ساڵی خویندنی 1982-1983 دەست لە خوێندن هەڵگرێت، دواتر لە بەرواری 12/10/1982 لەڕێگای هەندێک لە خزم و هاوڕێیانیەوە پەیوەندی دەکات بە شۆڕش و دەبێت بە پێشمەرگە.
لە ژیانی پیشمەرگایەتی دا لە ڕیزەکانی کۆمەڵەی ڕەنجدەرانی کوردستان و یەکێتی نیشتیمانی کوردستان، بەهۆی کارامەیی و لیهاتووی و چالاکیەوە توانیویەتی پلە و بەرپرسیارەتیەکانی ئەوکاتە بە سەرکەوتووی ببرێت و تا پلەی سەرتیپ لە ڕیزەکانی پیشمەرگە دەروات.
لەماوەی پێشمەرگایەتی دا بەشداری چەندین شەر و چالاکی و داستانی دژی ڕژێمی بەعس کردوە لەوانەش داستانی قەیوان-ماوەت و داستانی ڕزگاری و هتد..
هەر لەو ماوەیەدا لەگەڵ چەند هاوڕییەکی بەشداری خولێکی سەربازی ئەکادیمی دەکەن لە وڵاتی ئێران.
دوای پرۆسەی ئەنفالەکان و لە سالانی 1990-1992 لەلایەن سەرکردایەتی ئەوکاتەی شۆرش دەنێردرێتە دەرەوەی ولات و ماوەی دوو ساڵ لە وڵاتی سوید دەژیات و سەردانی چەندین وڵاتی تر دەکات زیاتر خۆی بەکاری ڕۆژنامەوانیەوە سەرقاڵ دەکات.
دواتر لەبەر بارودۆخی ئەوکاتەی دوای ڕاپەڕین و لەسەر داوای خێزانەکەی و هاوڕێیانی دەگەڕێتەوە کوردستان و ساڵی 1993 وەکو بەرپرسی کۆمیتەی بیتوێنی یەکێتی نیشتیمانی کوردستان دەستبەکار دەبێت.
لە ساڵی 1994 ژیانی هاوسەرگیری لەگەڵ (ئاواز عەزیز سدیق) کچی (عەزیز بەگ) پێشمەرگەی دێرین و کەسایەتی دیاری ناوچەکە پیکدەهێنێت.
لە ساڵی 1995 لەگەڵ ئەوەی خۆی زیاتر ئارەزووی مانەوە لە کاری حزبی و ڕێکخراوەیدا دەکات بەڵام لەسەر پیشنیاری هاوڕێیان و مەکتەبی سیاسی ئەوکاتەی ی.ن.ک ئەرکی قائیمقامی ڕانیە وەردەگرێت.
لە 14/4/1995 فەرمانی دەستبەکاربوونی بۆ دەردەچێت و لە 22/4/1995 وەکو قائیمقامی ڕانیە دەستبەکار دەبێت، سەرباری خراپی دۆخی ئابوری هەرێم و حکومەتی هەرێم و ململانێ سیاسیەکانی ئەوکاتە، توانیویەتی بە شێوەیەکی دڵسۆزانە و ڕێک کارەکانی هاوڵاتیانی دەڤەرەکە بەڕێوەبەرێت و خزمەتی شارەکە بکات.
لەدوای پێشکەش کردنی نامەی دەستلەکارکێشانەوە لە 13/9/1998 دەست لە ئەرکی قائیمقامی ڕانیە دەکێشێتەوە و دەستدەکاتەوە بە کاری حزبی و ڕێکخراوەیی، وەکو کارگێڕی مەڵبەندی 8ی ڕاپەڕین دەستبەکار دەبێت و دوای ماوەیەک دەبێت بە جێگری لێپرسراوی مەڵبەند، لەگەڵ دەستپێکردنی پرۆسەی ئازادی عیراق وەکو سەرپەرشتیاری کۆنترۆڵ کردنەوەی ناوچەیەکی کەرکووک دادەنرێت.
لەدوای پرۆسەی ئازادی عیراق بریار دەدات دەست بکاتەوە بەخوێندن و لە بەشی مێژووی کۆلیجی زانستە مرۆڤایەتیەکانی زانکۆی کۆیە وەردەگیرێت و توانی بروانامەی بەکالۆریۆس لە مێژوو بە پلەی سێهەم بەدەست بێنێت.
لەدوای وازهێنانی وەکو جیگری لێپرسراوی مەڵبەند، دەبێت بە ئەندامی مەکتەبی چاودێری (ی.ن.ک) بۆ ماوەیەک بەردەوام دەبێت و دواتر دەست لەکاری ڕێکخراوەیی هەڵدەگرێت لە ڕیزەکانی (ی.ن.ک).
لەسەرەتاکانی دروستبوونی کۆمپانیای وشە لەگەڵ ڕەوانشاد نەوشیروان مستەفا کاردەکات و دواتر دەبێت بە یەکێک لە دامەزرێنەرانی بزوتنەوەی گۆڕان، لەگەڵ دروستبوونی بزوتنەوەکە بە سەرپەرشتیاری مەکۆی ڕانیە دەستنیشان دەکرێت و ڕۆڵێکی کاریگەری دەبێت لەڕووی جەماوەریەوە بۆ بزوتنەوەکە لە ناوچەکانی بیتوێن و پشدەر بە گشتی، لەگەڵ ڕێکخستنی هەیکەلی ڕێکخراوەیی بزوتنەوەی گۆڕان دەبێت بە باژێروانی مەکۆی گۆڕان لە ڕانیە و ئەندامی جڤاتی نیشتیمانی بزوتنەوەکە، لە هەریەکە لە هەڵبژاردنەکانی پەرلەمانی کوردستان و ئەنجومەنی نوێنەرانی عیراق سەرپەرشتی جەماوەری گۆڕانخوازی کردوە لە ناوچەکە و پێگەی بەهێز و کاریگەریان هەبوە.
مستەفا سەلیم لەناو هاوڕێ و هەڤاڵانی پێشمەرگایەتی و هاوڕێانی کاری مەدەنی و ڕیکخراوەیی بەوە ناسراو بوو کەسێکی دڵسۆز بوو، هەمیشە بە دڵسۆزی و لەخۆبردووی کاروبارەکانی کردووە، هێمن و لەسەرخۆ بوو، گوێگر و قسەکەرێکی باش بوو، خۆراگر بوو بەرامبەر ناخۆشی وململانێکان و گەشبینانە مامەلەی کردوە، هەمیشە پاڵپشتی گەنجان بووە کاری کردووە بۆ هێنانە پیشەوەی گەنجان لە کاروباری ڕێکخراوەیی و میری، لە و ئەرک و بەرپرسیارەتیانەی هەیبووە کەسێکی پاک و لەخۆبردوو بوو، لەهەرشوێنێک و کاتێک بووبێت دژی گەندەڵی و ناعەدالەتیبووە، کەسایەتیەکی سادە و خاکی بوو، لەهەر پلەو پۆستێکدا بووبێت بە باشی بەکاری هێناوە هەرگیز چاوی نەبڕیوەتە مافی خەلک و پەنای بۆ داگیرکاری نەبردووە.
کەسێکی نیشتیمانپەروەر و تێکۆشەر بوو، بە ڕۆحیەتێکی کوردانە لەهەر کات و جێگایەک پێویست بووبێت لەخۆبردوانە کاری کردووە و تێکۆشاوە بۆ پاراستنی بەرژەوندی و مافەکانی گەلەکەمان.
جگە لەکاری سیاسی و پێشمەرگایەتی، کەسێکی ڕۆشنبیر و خوێنەرێکی باش بووە خاوەنی کتێبخانەیەکی دەوڵەمەندە و تا ڕادەیەکی باش شارەزای زمان و ئەدەب و مێژووی کورد بووە.
لەڕووی کۆمەڵایەتیەوە، کەسایەتیەکی کاریگەری ناوچەکە وکەسێکی کۆمەڵایەتی بوو، لەخەڵکەوە نزیک بوو، کەسێکی سادە و تێکەڵاو و خزمدۆست بوو، لەگەڵ هاوڕێ و هەڤاڵانیدا بەوەفا و دڵسۆزو بەئەمەک بوو، هەر ئەمەشبوو وایکردبوو لەناو خەڵکدا کەسایەتیەکی باش و خۆشەویست بێت.
خاوەنی 4 منداڵە، کوڕێک و سێ کچ بەناوەکانی (ڕامیار، ڕەز، ناز، ساز)، لەڕووی خێزانیەوە پەوەندیەکی زۆر باش و پتەوی لەگەڵ منداڵەکانی و هاوسەرەکەی هەبووە هاوڕێیانە مامەلەی کردووە، سەرباری سەرقاڵی و هیلاکی و کەمی کات بەهۆی کاروباری حیزبی و حکومیەوە خێزانەکەی زۆر بەلاوە گرنگ بووە و لەهەموو بارودۆخەکانی ناو خێزانەکەی وەکو کۆڵەکەیەکی پتەو وابووە، بایەخی زۆری داوە بە خوێندن و ئاستی ڕۆشنبیری منداڵەکانی.
لەگەڵ پێکهێنانی کابینەی نۆیەمی حکومەتی هەرێمی کوردستان و بەشداری بزوتنەوەی گۆڕان لەگەڵ هەریەک لە (پ.د.ک) و (ی.ن.ک) بۆ پێکهێنانی کابینەکە، دوای ئەوەی پۆستی بریکاری وەزارەتی ناوخۆ دەدرێت بە بزوتنەوەی گۆڕان، داوای لیدەکرێت ئەم ئەرکە وەربگرێت، لە 9/3/2021 وەکو بریکاری وەزارەتی ناوخۆ دەستبەکار دەبێت.
لەماوەی کارکردنیدا دڵسۆزانە و بێ گوێدانە جیاوازی بیر و ڕای حیزبی کارەکانی دەکات، لەو ماوە کەمەی کارکردنیدا چەندین کاری گرنگ دەکات و یەکێک لەوانەش سەرپەرشتی لیژنەی پلە بەرزکردنەوەی ئەفسەرانی ناوخۆ دەکات کە بۆ ماوەی چەندین ساڵ کاری بۆ نەکرابوو و دواخرابوو، بێ گویدانە دۆخی تەندروستی ئەم کارە گرنگە جێبەجی دەکات و کارەکان تەواو دەکات.
لەرۆژی 4/8/2021 بەهۆی سستی لەکارکردنی سییەکانی نەخۆشدەکەوێت و لە شەوی 9/9/2021 لە نەخۆشخانە کۆچی دوایی دەکات. [1]