تۆڕی میدیایی ڕووداو لە 9یەمین ساڵیادی دامەزراندنیدا ڕاگەیێنراوێکی بڵاوکردەوە
ئەمڕۆ 9 ساڵ بە سەر دەستپێکردنی پەخشی تۆڕی میدیایی ڕووداودا تێدەپەڕێت. ڕووداو وەک هەمیشە پیشەییبوون لە کارکردن وەک ڕێڕەوی کاری خۆی و، پاراستنی متمانە و باوەڕی خەڵک بە کار و بەرهەمی بە ئامانجی خۆی دادەنێت و لێی لانادات.
گواستنەوەی زانیارییەکان بە دروستی و هەمەلایەنە، شێوەی کارکردنی ڕووداوە بۆ هەموو ڕووداوەکانی کوردستان و ناوچەکە و جیهان. ئەمە لە 9 ساڵی ڕابردووی کارکردنی ڕووداودا لە ڕووداوەکانی ناوخۆی کوردستانەوە تاوەکو شەڕی ڕووسیا و ئۆکراینا ڕەنگیداوەتەوە. بەداخەوە لە ساڵی ڕابردووشدا بەربەست و قەدەخەکارییەکان زۆربوون لەبەردەم کاری میدیایی ڕووداو دا، بەڵام بە ژیری و لێزانی هاوکارانی، هەموو ئەو بەربەستانەش نەیانتوانیوە خزمەتگوزاری گەیاندنی زانیارییەکان و شرۆڤەکردنیان لە ڕووداودا بوەستێنن.
تۆڕی میدیایی ڕووداو، بەردەوامە لە زیادکردنی کاری هاوبەش لەگەڵ ناوەند و ئاژانسە گەورە جیهانی و ناوچەییەکان. لە ساڵی ڕابردووش دا سێ ڕێککەوتنی هاوکاری و کاری هاوبەشی لەگەڵ سێ ئاژانس و ناوەندی گرنگی میدیایی واژۆکردوون لە ئەوروپا و ئاسیا، هەروەها هاوبەشییەکانمان لەگەڵ کۆمپانیا گەورەکانی وەک گووگڵ و مێتا فراوانکردووە. لە ساڵی ڕابردوودا ڕۆژانە بەرهەمەکانی ڕووداو لەلایەن چەندین ئاژانس و دەیان دەزگا و تەلەڤزیۆنی جیهانی بڵاوکراونەتەوە.
رووداو لە ساڵی تازەی کارکردنیدا بایەخێکی تایبەت بە گۆڕانی کەشوهەوا دەدات و، پێشکێشکارێک و تیمێکی تایبەت بە شێوەی مەیدانی بەردەوام کاری لەسەر دەکەن. هەروەها دوای نەمانی داخستن و ڕێکارەکانی پەتای کۆڤید 19، بایەخێکی زیاتر بە کاری مەیدانی دەدات.
لە ساڵیادی دەستپێکردنی پەخشی تەلەڤزیۆن، ڕادیۆ و دیجیتاڵمیدیای ڕووداودا، دەستخۆشی لە هەموو هاوکارانی ڕووداو دەکەین و، شەهید شیفا گەردی و پەیامنێری ڕفێندراومان لەلایەن داعشەوە فەرهاد حەمۆ بە بیر دەهێنینەوە.
[1]
تۆڕی میدیایی ڕووداو
29-05-2022