#ئاسۆی قومری# لەنێو حیزبی سۆسیالیستی کوردستاندا (#حسک#)

چۆن لە خەباتی گەلاندا پاڵەوانی ئەفسووناوی سەر هەڵدەدەن و لە پێناوی شۆڕش و بەرخودانەکاندا گەردن لە چەقۆ دەسوون، ئاواش لەبەرامبەر خائین و خۆفرۆشاندا دەبنە مەزەی مێژوویەکی ڕەش و وەکوو کەسانێکی قێزەوەن و بوودەڵە؛ ناوبانگ دەردەکەن. لێرەوە بە پێویستی دەزانم وەکوو مشتێک لە خەرواری خیانەتی بەکرێگیراواندا، ئاماژە بە یەکێک لە داردەستە پیاوکوژەکانی ڕژێمی بەعس بدەم کە ئەویش ئاسۆی قومرییە.
ئاسۆی قومری، ئەو ئەڵقەلەگوێیەی بێ دەستپاراستن لە نامەردایەتی، هاوڵاتییانی شاری #سلێمانی#ی هەراسان کردبوو. چاوساغی دوژمن و هەڵکوتانە سەر ماڵان و دەستدرێژیکردنە سەر گەنجان و داوێنپیسی و باج و سەرانە وەرگرتن بووە سیمایەکی دیاری کەسایەتیی ناپاکی و سیخوڕی و نەفسنزم و چۆکدادەری خیانەتکار بوو. لەوانەشە ئێستا لای هەندێک مێژووی پڕخیانەتی فۆرمات کرابێ و بە جوامێرانە ناسرابێت و دوور نییە مووچەی شەهیدانەی پێشمەرگەشی بۆ بڕابێتەوە! ئاسۆ لە گەڕەکی باخی شێخ لەتیف لە شاری سلێمانی، لە داوێنی ئافرەتێکی لەڕ و لاواز کە ناوی قومری بوو، هاتە دونیا وە. لە کۆشی خێزانێکی هەژار و نەدار، کە زۆر جار هاوکاری و یارمەتیی خەڵکی فریایان دەکەوتن و کەلێنێکی بۆ ژیان پڕ دەکردەوە. ئاسۆ وەک مناڵێک هاتە دنیاوە، وەکوو خەسڵەتی هەر مناڵێکی تر، نە تاوانی دەزانی و نە لە چەمکی تاوانیش تێدەگەیشت و لەنێو ژیانێکی پڕ لە گیروگرفت و کێشمەکێشدا ئاسۆ گەورە بوو. لاوێکی پێچەوانەی دایکی، کەڵەگەت و باڵابەرز و گەنمڕەنگ. لە کاتی سەربازیدا بوو بە ئینزیبات و بە کڵاوێکی سوورەوە؛ خۆی و تفەنگەکەی زۆر جار لەبەردەم مزگەوتی گەورەی سلێمانی ڕادەوەستا، لەوێ ئەرک و فەرمانی سەربازیی بەجێ دەگەیاند و بە تێپەڕبوونی ڕۆژگار، ئاسۆی لاو بە ناوی دایکیەوە بانگ دەکرا، هەر بۆیە بە ئاسۆی قومری ناسرابوو.
پاش ئەوەی مام ئاراس چەند ساڵێکی کەمی دوای پێشمەرگەی مەفرەزە سەرەتاییەکانی شاخ؛ پەیوەندیی بە شۆڕشی نوێی #یەکێتیی نیشتمانیی کوردستان# باڵی بزووتنەوەی سۆسیالیست دەکات، واتە لە ساڵی 1978دا تفەنگی پێشمەرگایەتی لە شان دەکات و دواتر وەک هێزێکی سەرەکی جیا دەبنەوە لە یەکێتی و دەبێتە حیزبی سۆسیالیستی یەکگرتووی کوردستان (حسیک) و دواتر دەبنەوە بە حیزبی سۆسیالیستی کوردستان (حسک). ئاسۆی قومرییش کاتێک سۆسیالیست دروست دەبێت، ڕوو لە شاخ دەکات و لەنێو حسکدا دەبێتە پێشمەرگە.
وەک پێشتر ئاماژەم پێ دا، ئاسۆی قومری لەنێو هێزەکەی مام ئاراسدا وەک پێشمەرگە ڕۆڵی خۆی دەبینی، تاوەکوو ئەو کاتەی لەلایەن هێزەکەی وەهابەوە چەک دەکرێن. ئاسۆی قومری لە کۆتایی ساڵی 1980دا خۆی ڕادەستی دوژمن کردەوە و بوو بە گەورەسیخوڕێکی گوێلەمشتی بەڕێوەبەڕی ئاسایشی بەعس (مودیر ئەمن)ی سلێمانی و ڕەنگە بۆ ڕادەستبوونی بە ڕژێمەوە، پاساوی خۆی هەبووبێت، بەڵام هێشتا ئەمە ناکاتە ئەوەی کە لە هەموو کارێکی نامرۆڤانەی خۆیدا و بێ گوێدانە هیچ بەهایەکی ئەخلاقی بکەوێتە پەلاماردانی سەدان ڕۆڵەی شار و ڕادەستی ڕژێمی بەعسیان بکات. نەک هەر ئەوە، بەڵکوو بە جۆرێک تاوان بخاتە ئەستۆی هەندێک لە هاوڵاتییانی سڤیل و ڕەوانەی پەتی سێدارە بکرێن. خیانەتی ئاسۆی قومری هێندە سنووری بەزاندبوو کە پتر لە بیست و پێنج لاوی خوێنگەرم و دڵسۆزی شارەکەمانی بە دەستی خۆی خەڵتانی خوێن کردبوو و شەهیدی کردبوون، جگە لەوانەی بەنهێنی شەهیدی دەکردن و تەرمەکانی سەرەونگوم دەکردن. لەبەر ئەوە ئاسۆی قومری بووە جێی باوەڕ و متمانەی گەورەی مودیر ئەمن و پیاوکوژانی بەعس و زۆر جاریش ڕۆڵی ئەفسەر و دادوەری لێکۆڵینەوەی دەبینی لە کاتی لێکۆڵینەوە و ئەشکەنجەدانی زیندانیانی ئەمن و لە چۆنێتیی ئەشکەنجەداندا سەرپشک کرابوو. ئاسۆی قومری سەرانەوەرگرتنی لە بازرگانان و دەوڵەمەند و دووکانداران و کاسبکاران و قوتابیانی قوتابخانەکان فەرمانبەران ببووە خەسڵەتی نامەردانەی، هەر کەسێکیش سەرپێچیی ویست و حەز و ئارەزووەکانی ئەوی بکردایە، بەئاسانی تۆمەت و تاوانی ئەوتۆی بۆ دەخوڵقاند، دەبووە مایەی سەرخواردنی، یان دەبووە دەردەسەری و ملکەچی و سەرئێشەیەکی گەورە، دواجار ئه و کەسە ناچار دەبوو بە سەرانەیەکی زۆر لەوەی داوای دەکرد، لە تەونی جاڵجاڵۆکەیی ئاسۆی قومریی سیخوڕ ڕزگاری بێت. لەو کرداری خیانەتکارانەیەی قێزەوەنتر ئەوە بوو گەلێک جار دەمانچە و نارنجۆک (ڕومانە) و بەیاننامەی سیاسیی حیزبەکانی کوردستانی دەکرد بە ماڵ بەسەر گەنجانەوە و بە تۆمەتی کاری ڕێکخراوەیی ڕادەستی ئاغاکانی ئاسایشی (ئەمن)ی سلێمانی دەکردن، پاشان بە پارەیەکی خەیاڵی ئازادی دەکردن. ئاسۆی قومری لە کۆتایی ساڵی 1980دا تەسلیم بە ڕژێم بووەوە و بەتەواوی کەوتە کاری خراپە. ئاسۆی قومری یەکەم تاوان و یەکەم دیاری کە پێشکەشی ڕژێمی کرد و یەکەم کەسیش لە سلێمانیدا منی دەستگیر کرد و ڕەوانەی زیندانی ئەمنی سلێمانیی کردم.
بە کوردی و بەکورتی: غەدر و خیانەت لای ئاسۆی قومری ببووە کاسپی بۆ خۆدەوڵەمەندکردن. هەموو ئەو سەروەت و پارانەی پەیدای دەکردن، لە ڕێگای سەرسەرێتی و داوێنپیسی و بەدڕەوشتیدا خەرجی دەکرد و هەندێک جار شەوانی سووری بۆ ئەمنەکانیش دەسازاند. یەکێک لە ئاکارەکانی، وریاییەکی لەڕادەبەدەری هەبوو و لە ئاکامی ڕەفتارە دزێوەکانیدا متمانەی بە کەس نەبوو، گومانی لە هەموو کەس دەکرد، هەمیشە گوێقوڵاخ و بەهەست بوو، ئەمەش ببووە هۆکاری ئەوەی کە ساڵانێکی زۆری خزمەتی لە دیوەخانی غەدر و خیانەتدا درێژە بکێشێت.
یەکێک لە کەسە نزیک و جێی متمانەکانی ئاسۆی قومری، هاوڕێکەی (نوورە کۆپە) بوو کە بڕوای تەواوی پێی هەبوو. نوورە کۆپە بە ڕاستی و دروستی نازانم باوکی ناوی چی بوو، گەنجێکی کورتەباڵای سمێڵ شۆڕی دەمبەخەندە و پێکەنین بوو. بەبەردەوامی و لە ناڕەحەتترین کاتەکانی ژیانیدا، تەنها بۆ ساتێکی کەمیش ڕووخساری گرژ نەدەبوو، هەمیشە دڵخۆش و دەستبڵاو بوو.
لە بەشەکانی پێشووی لاپەڕەکانی ئەم پەرتووکەمدا، باسم لە هەندێک کەسایەتی و پێشمەرگایەتیی نێو حیزبی سۆسیالیست (حسک) کردووە، کە سەرکردایەتییەکەیان لە دۆڵەتوو بوو، نزیک سەرکردایەتیی یەکێتیی نیشتمانیی کوردستان لە ناوزەنگ، ئەو دەمەش نوورە کۆپە لەگەڵ ئاسۆی قومریدا پێشمەرگەی سۆسیالیست (حسک) بوون و هەندێک زانیاریم لەسەر ژیانیان هەیە. نوورە کۆپە بە هیچ شێوەیەک گوێی بە پارە و ماڵی دنیا نەدەدا، هەمیشە ڕەنگی ڕەشی هەڵدەبژارد و تەنانەت لە ماوەی ژیانی سیخوڕیدا لەگەڵ ئاسۆی قومری، هەمیشە سەرتاپای جلوبەرگی ڕەشی لەبەر دەکرد، بەڵام کاتێک مرۆڤێک بەو جۆرە بەبێ گوێدانە سەروەت و سامان و هیچ گیروگرفتێک و هەمیشە لە ساتەکانی ژیانیدا بەو شێوەیە دڵخۆش بێت و پێچەوانەی ڕاستییەکان و دژ بە گەلەکەی ببێت بە سیخوڕ و مرۆڤکوژ و خوێنڕێژ، ئەوە دەردەخات ئەم زاتە تەواو گەمژە و گێل و نەفامە، دەنا بۆچی دەبێت کار و کردەوەی لەو جۆرە هەڵبژێرێت کە مەترسیدارترین ڕەفتاری دڕندانەی مرۆڤە بەرامبەر مرۆڤەکانی دەوروبەری. نوورە کۆپە و ئاسۆی قومری هاوڕێی گیانیبەگیانیی یەکتر بوون، ئاسۆی قومری زۆر زۆری خۆش دەویست و جگە لەوەی هاوڕێی منداڵیی یەکتر بوون، لە سەردەمی پێشمەرگایەتیشدا تاوەکوو ئەو کاتەی من وەک میوانێک و هاوکارێکی بریندارەکانیان و دوای چەککردنی هێزەکەی مام ئاراس و گەڕانەوەیان لە شارباژێڕەوە و دواتر بۆ بلەکێ و سەرکردایەتییان لە دۆڵەتوو لەگەڵیاندا بووم، هەردووکیان هەمیشە پێکەوە دەگەڕان و پێکەوە لەژێر خێمەیەکدا دەخەوتن.
لەیادمە ئەو کاتەی لەلای هاوڕێی دێرینم مام ئاراس لە دۆڵەتوو میوان بووم، شەوێک بە ڕادیۆیەکی مام ئاراس گوێم لە گۆرانییەکی فارسی دەگرت و نوورە کۆپەش نەخەوتبوو، هاتە لامەوە و لەخۆیەوە پێدەکەنی. منیش پرسیارم لێ کرد بەوەی من سەیری فیلمێکی کۆمێدی ناکەم و ئەم گۆرانییە فارسییەش ئاوازێکی ناخهەژێنە، دەبێت هۆکاری ئەم پێکەنینەی تۆ چی بێت؟ لە وەڵامدا گوتی: خۆشم نازانم پێکەنینم بە چی دێت! ئەرێ ئێمە بۆچی هاتووین لەم شاخەدا دەژیین؟ منیش لە وەڵامدا گوتم: من دەزانم بۆچی هاتووم بۆ ئەم شاخە، ئەی تۆ بۆ نازانیت بۆچی هاتوویت بۆ نێو ئەم ژیانە ترسناک و ژیانە زەحمەتە؟ بەپێکەنینەوە بەتەنها بەجێی هێشتم و دوور کەوتەوە و خۆی کرد بە خێمەکەیدا و منیش بەتەنها گوێبیستی ئاوازەکە بووم و ئیرەج گۆرانیی دەچڕی. ئێستەش نەمزانی مەبەستی پێکەنین و پرسیارەکەی نوورە کۆپە چی بوو! ئاسۆی قومری و نوورە کۆپەی هاوڕێی منداڵی و پێشمەرگایەتیی هێندە بەتین و متمانەپێکراوی یەکتر بوون، تەنانەت هەردووکیان بەیەکیشەوە گەڕانەوە بۆ ناو ڕژێمی بەعسی فاشی و هەردووکیان هاوخیانەت و هاوبکوژ و هاوجەللاد و هاوجاش بوون. هاوشێوەی ئاسۆی قومریی هاوڕێی، ئەویش دەستی لە غەدر و خیانەتکاری نەدەپاراست. یەکێکی تر لە هاوڕێکانیان فەرەجە شەل بوو، ئەویش یەکێک بوو لەوانەی پاسەوانێکی گوێڕایەڵ و متمانەپێکراوی ئاسۆی قومری بوو. فەرەج لە سەرەتاوە شەل نەبوو، دوای ئەوەی خۆی و نوورە کۆپە و ئاسۆی قومری کەوتبوونە بۆسەی هێزی پێشمەرگەوە و دەستڕێژیی گوللەیان لێ کرابوو، فەرەج قاچی بریندار ببوو. چەندین جاری تر لە شەڕ و بۆسەی پێشمەرگەدا بریندار و دەرباز بووبوون. ملشۆڕیی فەرەج، متمانەی لەلای پیاوانی ئاسایشی (ئەمن)ی سلێمانی بۆ پەیدا کرابوو، لەبەر ئەوە گەلێک جار پاسەوانێتیی ئەوانیشی پێ دەسپێردرا و بە هیچ شێوەیەک کەمتەرخەمیی نەنواند لە خیانەتکردن و گرتن و ئازاردانی خەڵکی بێتاوانی شارەکە و زیندانیکردنیان لە ئاسایشی سلێمانی. لە ساڵی1991دا و لە کاتی ڕاپەڕینی گەلەکەمان و ڕزگارکردنی سەرتاسەریی کوردستان، ناوبراو لە ئاسایشی سلێمانی لەلایەن جەماوەر و هێزی پێشمەرگە و بەرەی گەلەوە زیندانی کرابوو، پاشان ڕەوانەی زیندانی قەڵاچوالان کرابوو. پێشتر لەلایەن خەڵکییەوە لایەکی برۆ و سمێڵی تاشرابوو. بەداخەوە ئەو هەموو ڕەفتارە ناشرینانە و خیانەتانەی فەرەج دەرهەق بە خەڵکی کوردستان کردبوونی، فەرەج ئازاد کرابوو، ناشزانم هۆی ئازادبوونەکەی لەبەر چی و چۆن بوو! بەهەرحاڵ، دوای ڕاماڵینی دامودەزگا سەرکوتکەرەکانی ڕژێمی بەعس و پڕۆسەی ئازادکردنی کوردستان، شەقامی بۆ تەخت دەبێت و خۆی دەخزێنێتە نێو یەکێک لە هێزەکانی پێشمەرگەی حیزبەکانی کوردستان و من بۆخۆم لە ساڵی 1995دا لە کاتی سەفەرکردنم بۆ هەندەران و لە سەردانێکمدا بۆ شاری #دهۆک#، لەوێ چاوم پێی کەوت...


#شەهاب کەریم#
#مێژوویەک لە لوولەی تفەنگەوە؛ ڕۆژگارە سەختەکانی شاخ 1979-1991# [1]