دوێنێ، تورکیا لە پارێزگای #دهۆک# لە هەرێم، کۆمەڵێ هاوڵاتی شەهید کردوو دەیانی تری بریندارکرد، تۆماری تورکیا پڕیەتی لە سنوور بەزاندن، تەڕاتێنو مانەوە لە هەرێمدا.
لە هەموو حورمەت شەکاندنەکاندا، هەردوو حکومەتی ناوەندو هەرێم، شەرمنانە بەیاننامە دەردەکەن، گازندە دەکەن و پاشان نوێنەرانی تورکیا دەبینن بەبێ ئەوەی سەنگیان بۆ دابنرێت و دۆخەکە گۆڕانێکی بەسەردا بێ!
ئەم ئیهانەو سووکایەتیانەو هی تر ڕوویان نەدەدا ئەگەر لە #عیراق# یان لە هەرێمدا حوکمێکی تەنانەت کەمێ ڕەشید هەبوایە! تورکیا، سور دەزانێ کە حزبە دەسەڵاتدارە حوکمڕانەکان لە چ جۆرە گەندەڵییەکەوە ئاڵاون، بۆیە نە ویست و نە توانای دژایەتی کردنی خۆیان و ئێرانیان نیە! بۆیە بێباکانە، لێکدانەوەی ساویلکانە بۆ ڕووداوەکە دەکا یا بە کاری تیرۆریستی نەیارەکانی لە قەڵەمی دەدا!
تورکیا، کە هەلێ نیە و هەڵپەی قۆستنەوەی نەکا، لە کاتێکدا ئەمە دەکا کە خۆی و ڕوسیا و ئێران سەرگەرمی تاوتوێی قوڵ و گشت لایەنی تێهاویشتە جیهانی و ناوچەییەکانن! ڕووداوەکان ئەوە هەڵدەگرن زۆر بە جددی لێیان بڕوانین و پێگەی خۆمان لە هاوکێشە ناوخۆیی، ناوچەیی و جیهانیەکاندا ببینینەوە!
بە داگیرکردنی خاکی سوریا و دەستەمۆکردنی گروپی ئایینیە توندڕەوەکانی وابەستەی خۆی، دەسەڵاتدارانی تورکیا بەبیانووی داکۆکیکردن لە ئەمنی قەومی وڵاتەکەیان، پشتێنە ئەمنییەکی 30کم پانی و 840 کم درێژەکەی ئەمن و ئاساییشی کوردستانی ڕۆژئاوای شڵەژاندووە، جارێ بە پرۆسەی قەڵغانی فورات، جارێکی تر بەناوی چڵە زەیتون و ئینجا بە چاوگەی ئاشتی و هی تریش، خەریکە بەتەواوی تەونی کۆمەڵایەتی و باری دیمۆگرافی ڕۆژئاوا بگۆڕێت.
کەواتە، نابێ ئەم کردەوە تێرۆریستیانەی تورکیا لە باشوری کوردستاندا غافڵمان بکات لە مەرامی سەرەکی ڕژێمەکەی #ڕەجەب تەییب ئەردۆگان# لە ڕۆژئاوای کوردستاندا!
کێ زات دەکا نکۆڵی لە کردەوە نەگریسەکانی تورکیا بکا! بەڵام ئەگەر لە عێراق بەگشتی و هەرێمی کوردستان بەتایبەتی دەسەڵاتداران ستەمکارانە حکومیان نەکردبایە و قووتی خەڵکیان نەدزیبایە و سەروەریەکانی وڵاتیان ئەتک نەکردبایە، ئەم هەموو ناسەقامگیری و پێشێلکاریە نێودەوڵەتیانەی وڵاتانی ناوچەکەمان ڕوویان نەدەدا. ڕاستە ئەوە تورکیایە دێتە سەرمان؛ لێ ئەگەر خۆمان (حکومەت و خەڵک) تەواوکەری یەکتری ببووینایە، بەلایەنی کەم، ئەم کارەساتانە بەم ئەندازە ئابڕووبەرانە ڕوویان نەدەدا!
بێشک، لەلایەک حزبە دەسەڵاتدارەکان ڕاستەوخۆبو ئەوانەی خۆیان بە ئۆپۆزسیۆن ناو دەبەن ناڕاستەوخۆ لە دۆخەکە بەرپرسن! لەلاکەی ترەوە، ئەوانەی خۆیان بە ناڕازی دەبینن بەتایبەتی، خەڵکیش بەگشتی، لە گەیشتنی دۆخی باشوری کوردستان بەگیانەڵڵابو نزیکبوونەوەیان لە لێواری مەرگ بەرپرسن. بەهۆی کەمتەرخەمی خۆمانەوە، کەس نیە ئیرەیی ببات بەهەرێمێکی ناو زڕاو لەسەر ئاستی جیهاندا!
ناڕازیەکان ڕەخنە دەگرن؛ بەڵام لە یەکتر دوورن و بەڕووی یەکدا ناکرێنەوە! بۆ؟ بۆ ناڕازین؟ لەچی ناڕاین؟ چی دەگۆڕن؟ چۆن دەیگۆڕن؟ بۆ یەکڕیزی خۆتان نابەستن؟ چاوەڕێی چ نەکبەیەکی تر دەکەن!!!
وا خەڵک دەیانەوێ بچنەوە ژێر حوکمی مەرکەزیی عیراقەوە بێ ئەوەی بزانن کە بەهای گۆڕانکاریەکان لە عیراقدا بە سەدان شەهید و هەزاران بریندار کەوتۆتە سەر ڕێچکەی خۆی. هەروەها، لە کاتێکدا خۆپیشاندەرانی عەرەب لە ناوەڕاست و باشوردا چالاکن، کەچی ناڕازیەکانمان و خەڵکی لە هەرێمدا سڕ و خامۆشن! خەڵکی هەرێم پاڵیان داوەتەوەو هەر داوای پارە و موچە و دامەزراندن دەکەن؛ لەسەر شاشەکانی تەلەفزیۆنەکاندا دەکڕوزێنەوە و لەناو تۆڕە کۆمەڵایەتیەکانیشدا پاڵەوانی بێهاوتا و بگۆڕن. لێ لە ڕاستی دا زەلیلی دەستی دەسەڵاتدارانن! خۆیان لەوە دەدزنەوە کە تا هەڵوێستی بەردەوام وەرنەگرن بۆ گەیشتن بە مافە سەرەتاییەکانی مرۆیی خۆیان و زامنکردنی بژێوی ژیانی کۆرپەکانیان!!!
بە کورتی و بە کوردی پەتی: ڕانەپەڕن و فریای خۆتان نەکەون، هەروا بە کۆیلەیی دەمێننەوە و هەموو ڕۆژێکیش لە کەرامەت و حەیسییەتیان دەدرێت. دەی باشە، هەتا کەی پرسی گۆڕینی ئەم سیستەمە هیچ و پووچ و کەرامەت ڕووشێنەرەی هەرێم قبوڵدەکەن؟!!
لە ئێستادا، تۆپی گۆڕانکاریی بنەڕەتی لە گۆڕەپانی ناڕازیەکان و خەڵکەکەدایە، تکایە ئەم دەرفەتە مەزنە لەدەستی خۆتان مەدەن، چونکە دەسەڵاتی کوردی هەر لە خودی حزبە سیاسیە دەسەڵاتدارەکاندا، هەر یەکەو بە ڕێژەی خۆی، لەمێژە لە دۆزەخی خیانەتدا دەسووتێن!
دروود بۆ ئەو دەستە و کەسانەی قۆڵی لێ هەڵدەماڵن بۆ پڕکردنەوەی ئەم بۆشاییە بە پێشەنگێکی بە کۆمەڵ و بەرابوونێکی ڕێکخراو! هەنگیش بە هەموو تواناکانیەوە لە خزمەتی خەڵک و لایەنە بە هەڵوێستەکاندایە![1].
دەستەی سەرپەرشتیاری هەوڵی ناڕازیەکانی گۆڕەپانەکە (هەنگ)
2022/7/21