وەک دوێنێ بەڵێنم دابوو دامنابوو لەم ساڵیادەی مەرگی #عیرفان ئەحمەد#ی دا بەدرێژیی یادەوەرییەکانم بڵاوبکەمەوە بەڵام هەرچی تەماشام کرد ئەم هەموو نوسینە بۆ فەیسبوک گونجاو نییە مەگەر بەش بەش بڵاوی بکەمەوە بەڵام ئەوەشم هەر بەگونجاو نەزانی چونکە ڕەنگە ڕووداوی وابێتە پێشەوە ناچاربیت ئەویان بڵاوبکەیتەوە چونکە من ناتوانم یان نامەوێ ڕۆژی لەپۆستێک ئەو پەڕی دوو پۆست زیاتر بکەم.
لەگەڵ عیرفان یادەوەریم زۆرە لەناوەراستی نەوەدەکاندا پێکەوە کارمان دەکرد، لەگەڵیدا ژیاوم لەگەڵیدا پێکەنیووم و تەنانەت لەگەڵیدا گریاوم، پێکدا هەڵشاخاوین و بەزویی ئاشت بووینەوە، مرۆڤێکی لێبوردەو دڵپاک بەڵام پڕو خەیاڵێکی شیعری جوانی هەبوو، خاڵی هەرە بەهێزی ئەوەبوو پارەو سامان سەخیفترین شتێک بوون لەژیانی ئەودا.
عێرفان لە سەرەتاوە لە ڕێکخراوی شنەبای ئاشتی ژاپۆن گاردبوو ! ئیدی ڕۆژگاری ئێمە وابوو، دەبوو بۆ پەیداکردنی نان کارێکمان بکردایە جابا لەگەڵ ویستوو زەوقی ئێمەشدا نەهاتایەتەوە.. پێت سەیر نەبێت ڕۆژانێک ڕێکخراوەکان زۆربەی گاردو چێشتلێنەرو کارمەندەکانی هونەرمەند و شاعیر و ئەدیب و ئەندازیار و مامۆستا و خەڵکی تەکنۆکراتیش بوون، بەلای کەمەوە لە ڕێکخراوی (ئێم ئەی جی) مین هەڵگرتنەوە و ڕێکخراوەکەی ئێمە (پی دەبلیو جەی) وابوو.
لە ناوگاردەکاندا دوو محەمەدمان هەبوون، هەردوکیان مامۆستای ئینگلیزی بوون، کامەران ئەندازیاری بیناسازی بوو، #شوان عەتوف# و عیرفان ئەحمەد هونەرمەند و شاعیر بوون، بژار سەردار زمان زان و تەکنۆکراتێکی لێهاتوو بووو هاوڕێی زێدە ئازیز #عەلی مەولود# و من، هەموومان لە ڕێکخراوی شنەبای ئاشتی ژاپۆنیدا گارد بووین، چ دیمەنێکی سەیر بوو.. ! هیچ کام لەوانە نەیاندەزانی تاقم و تفەنگ باش ببەستن و هەمیشە خوار و خێچ و شل و شێواو بوون، هەرچیان دەکرد وەک ئەوانەی تر لێیان نەدەهات هەر بۆیە زۆرجار دەبوونە مایەی پێکەنین و هەندێکجاریش گاڵتەپێکردن. لەناو هەمووانیشدا عیرفانی شاعیر شل وشێواوترین بوو، تەنانەت نەیدەزانی تفەنگەکەی بکاتە شان. ئەو بەڕاستی نەفرەتی لە چەک و فیشەک کردبوو، بۆیە بەردەوام فشەی پێدەهات و ملکەچی هیچ ڕێنماییەکی سیستمی بەرێوەبردنی گاردەکان نەدەبوو..
عیرفان دەست ودڵفراوان بوو، ئەو مانگانە موچەیەکی باشی وەردەگرت، بەڵام کەم مانگ هەبووە داوای قەرزی لێنەکردبم لەکاتێکدا ئەو موچەکەی لەمن کەمتر نەبوو بگرە چەند دۆلارێکیشی لەمن زیاتربوو، ئەوە دوای ئەوەی بووە کارمەندی تەندروستی، چونکە لەکۆبوونەوەیەکدا کەسیستمی گاردەکان و سیکیوریتی ڕێکخراوەکەیان پێسپاردم، هەستم کرد ئەرکێکی زۆرگران و هەستیارە بۆیە منیش کۆمەڵێک مەرجم قوت کردەوە، یەکێک لەوانە لابردنی چەند گاردێک بوون لەسیستمی سیکیوریتیدا، بەڵام بەومەرجەی دەرنەکرێن و نان بڕاو نەبن بەڵکو هەریەکەو بەپێی بسپۆڕی خۆی کاری پێبدرێت، یەکەم کەس پێشنیارم کرد عیرفان بخرێتە سەربەشی تەندروستی، چونکە ئەو پسپۆڕییەکەی یاریدەدەری پزیشک (معاون توبی) بوو، ژاپۆنیەکانیش بە داواکەم ڕەزامەندبوون.
بەهەرحاڵ عیرفان هۆی قەرزکردن و پارە پێنەمانی ئەوەبوو زۆر بەخشندە بوو، بەتایبەتیش بەرانبەر بەهاوڕێ نزیکەکانی، جگە لەوەش هاوکاری هەر ڕۆژنامە و نوسەرێکی دەکرد، کە پێویستی بە هاوکاری بوایە، بەشداری هەموو ئەو هاوکارییانەی دەکرد کە لەناو ڕێکخراوەکەدا بۆ کەسانی نەخۆش و هەژار کۆدەکرایەوە، خۆشی یەکێک بوو لەوکەسانەی پێشنیاری دەکردو داوای هاوکاری دەکرد بۆ کەسانێک کە پێویستیان بەهاوکاری بوو.
یارۆی چلورە فرۆش
رۆژێک گاردێک بەکاک عیرفانی گوتبوو یارۆی چنورە فرۆش هاتبوو بۆلات، کاک عیرفانیش وا تێگەیشتبوو کە یارەکەی چنور هاتووە و هەواڵی پرسیوە، بۆیە کەچنوری بینی بوو، وتبوی کێ بووە ئەوەی هەواڵی منی پرسیوە چنوریش هیچ حاڵی نەببوو، دوایی کاک عیرفان وتبووی یارەکەت کێیە ؟ چنور وەڵامی دابووەوە کە من یارم نییە و هەشمبێ پەیوەندی بە تۆوە نییە. تومەس یارۆی (چنورەفرۆش) نەبووە بەڵکو چلورە فرۆش بووە، کەم و زۆر پەیوەندی بە چنورەوە نەبوو، بەڵکو یارۆی عیرفان بوو، عیرفان بەردەوام هاوکاری کوڕێکی کردبوو کە لەو گوزەرە چلورە و ئایسکریمی فرۆشتووە، بەڵام لە هاوینی داهاتوودا چلورە فرۆشەکە دیار نامێنێ لەپر ڕۆژێک لەتەلەفزیون دەردەکەوێ گۆرانی دەڵێ و تیپی موزیک و کۆمەڵێک ژەنیار لە دوایەوە دانیشتوون و ئامێرەکانیان دەژەنن و کوڕەش زۆر جوان گۆرانی دەڵێت، گاردێک بەدیار تەلەفزیۆنەوە دانیشتووەو لە پڕ هاوار دەکات ئەرێ ئەوە کابرای چلورە فرۆش نییە ؟ یەکێکی تریشیان دەڵێت بەرێوەڵا ئەوە یارۆی چلورەفرۆشە.. کاروان کەرکووکی چلورەفرۆشێکی زۆر ڕۆح سوک وگەنجێکی ئاوارە بوو، ئەویش بەناچاری کڵاوێکی لبادی لەسەرنابوو تەبەدۆرێکی بەکۆڵەوە چلورەی دەفرۆشت. بەڵام کە دەهات گوزەرەکەی ئاوەدان دەکردەوە بەجۆرێک بانگی دەکرد چلورەیە بە دەنگە بە سۆز و کۆمیدیەکەی ناچاری دەکردی کە چلورەی لێ بکریت.. ئەوە جگە لە هەڵسوکەوتە کۆمیدیەکەی.
نوکتە و قسە خۆشەکانی
عیرفان هەمیشە قسەی خۆش و نوکتەی نوێی پێ بوو، بەو حاڵەشەوە کە لە ئەرکی پاسەوانیەکەی خراپ بوو بەڵام هەر لەلای حەرەسەکانی تر خۆشەویست بوو، لە ڕێکخراوەکەمان دوو عەتا ناومان هەبوو یەکێکیان کارمەندی تەندروستی بوو یەکێکیشان بەرپرسی گاردەکان بوو جێگرەوەی من بوو. بەمیانی دەگوت عەتای چەتە و بەوی تریشیانی دەگوت عەتای سحە هەمیشە دەیگوت ئەم عەتایە بەباروت مەڵاشوی هەڵدراوەتەوە و بەتەقەی تفەنگ و ئاربیجی گوێی کراوەتەوە و لەبری شەق شەقە قەوانیان بۆ بە بێشکەکەیەوە هەڵواسیوە.
چاکەتەکە چەرمی مار بوو
چیرۆکێکیشی بۆ من و قەمسەڵە چەرمەکەم هۆنی بووەوە هەموو جارێک کە دەیگێرایەوە هەموومان لەسەر پشت دەکەوتین هێندە پێدەکەنین.. هەرجارێکیش دەیگێڕایەوە زیادەی دەخستەسەر.
چیرۆکەکە بەم شێوەیە بوو :
قەمسەڵەیەکی چەرمم لە بالە بازاری کۆنەفرۆشان کری بوو، ڕاستیەکەی زۆر جوان و چەرمەکەشی زۆر باش بوو، بیرمە ئەوکاتە بەکۆنیش 100 دیناری سویسریم پێدابوو، کاک عیرفان حەزی لێکردبوو داوای کرد پێی بفرۆشم منیش وتم نایفرۆشم بەڵام ئاوا پێشکەشت بێت، زۆر داوای کرد من قایل نەبووم پێی بفرۆشم، بەڵام لە دڵەوە ئامادەبووم پێی ببەخشم ئەویش ئاوا قایل نە دەبوو، ڕۆژێک نازانم کۆڕی شیعری هەبوو بۆنەکەی چی بوو خۆی گۆڕی بوو، ڕیشی تاشی بوو، داوای قەمسەڵەکەی کرد، منیش وتم فەرموو قەمسەڵەکەم داناو دامە دەستی ئەویش بەدەم قسەوە خستیە بن باڵی، وتم دە لەبەری بکە بزانە بۆت دەبێت؟ لێت دێت ؟ عیرفان هەر لەبەردەرگای ئۆفیسەکە لەبەری کرد، بەڵام چونکە تەسک بوو بن باڵەکەی هەڵتەقی و دڕا بە جۆرێک کەبەکەڵکی لەبەرکردنی نەما بۆ بۆنەیەکی فەرمی..دوایی وتی دەیبەم بۆ حەمەرەوف کەرکووکی بۆت بدورێتەوە قایل نەبووم وتم نا خۆم دەیبەم.. بەهەرحال ڕۆژان تێپەڕین و قەمسەڵەم چاککردبوو، عیرفان چیرۆکەکەی وا ترش وخوێ کردبوو کە دەیگێڕایەوە مرۆڤ خۆی نەدەگرت لەپێکەنیندا ئەوە بالەو لاوە بووەستێ، بەلام قەمسەڵەکەی وا سوک و تڕۆ کرد لەبەرچاوم کەوت، بۆخۆی تەسک بوو لە ناو حەرەسەکانیشدا کەس 10 دە دیناری پێ نەدەدا..ئەو بەم شێوەیە دەیگێرایەوە :
کاکە ئەوە کوڕی شیعریم هەیە، منیش بەحساب لە مونەزەمەم و لەسەر دۆلار دانیشتووم و هەموو چاوەروانن بەجوانترین جل بچم منیش وتوومە قەمسەڵەیەکم کریوە بۆ ئەم بۆنەیە و لەبەرم نەکردووە کابرای لێم کریوە سوێندو تەڵاقی خواردووە کە ئەمە چەرمی مارەو نادرێ و ناسوتێ و خەنجەر نایبڕێ کەچی کەلێم وەرگرتوو لەبەرم کرد بچم بۆ کۆڕ هەرئەوەندەی پژمیم قەمسەڵە بوو بەبێژنگ و لەسێ لاوە تڕڕڕڕ دادڕا هەرباش بوو لەکۆرەکە وام لێ نەهات هەزار سوێندم بخواردایە کەس نەیدەگوت هی قەمسەڵەیە وایان دەزانی دادڕینەکەی دەنگی تڕە... ئەمانەو هەزاران نوکتەو بەسەرهاتی خۆش. [1]
هۆمەر محەمەد
#05-08-2022#