عبدالرحمن بامەرنی
ئەز ناڤەشێرم، کو ئێک ژوان چیرۆکنڤیسێن ل دەڤەرا مە و هەر گاڤا چیرۆکەکا وان ب بەرچاڤێن من بکەڤیت، ئەز خواندنا وێ ژخوە ناکەم و ئەز دخوینم، خواندنەک نە دگەل دووماهی هاتنا وێ پشت بدەمێ. من گوت ئەز، ژبەرکو چیرۆکێ و هەر تێکستێ نڤیسەر سنعەتکاریێ تێدا بکەت، ئه و تێکست من رادکێشیتە خوە، دناڤ تێکستێ ژی دا هند ناڤەرۆک و روودان بۆ من گرنگ نینە، هندی یاریپێکرنێن نڤیسەری، ئایا تا چەند یێ سەرکەفتی بوویە و تا چەند شیایە منەکێ خواندەڤا، ببەتە ناڤ کووراتیا تێکستێ خوە دا.
ئاخر تێکست ژی هەر هۆسانە، ئه و نڤیسەرێ نەشیا بۆ چەند ڕۆژان، خواندەڤایی دناڤ قولاچێن تێکستێ خوە دا بگێرینیت و جیهانا خوە نیشان بدەت، هینگێ کەنگی ئه و تێکستەکێ ئەدەبیە.؟!

ئه و نڤیسەرێ من ژێ بەحس کری، کیە؟ گرنگ نینە من بەحسا کاک (ئەمجەد)ی وەک خودانێ ڤێ پەرتووکێ بیت، هەر چەندە ئه و ئێک ژوان چیرۆکنڤیسێن کێمە ل دەڤەرا مە، کو ئەز ب قەلەمێ وان داخبار، تایبەت د بوارێ چیرۆک نڤیسینێ دا و پرانیا جاران ژی دەما ئەز چیرۆکەکا وی دخوینم، ئەز پەیوەندیێ بۆ دکەم و ب تنێ دەست خۆشیێ لێ ناکەم، ژبەرکو پەیڤا دەستخۆشیێ ب خوە دکەڤیتە سەر لێڤان، لێ ئەم دان و ستاندنێ دکەین و دان و ستاندنا مە ناچیتە د قالیێ کی بلند و کی کولند یان ئێک و دوو بکەینە د قەفەسا تاوانێ دا، بەلکو پرۆسا نڤیسینێ ب خوە هۆسانە، نڤیسین تا درست و تەندروست بگەهیتە بەر دەستێ خواندەڤانی، دڤێت د چەند قۆناغان را دەرباس ببیت و ژوان قۆناغان ژی، رەخنە گرتن و رەخنە وەرگرتنە.
ئاخر چیرۆکنڤیسی ژی هەمان تاس و هەمان مەبەستە و گەلەک جاران پێشگۆتنا کۆمەلە چیرۆکەکێ، تێرا هەیە خواندەڤانی دو جاران راکێشیتە خواندنا چیرۆکێن تێدا هاتینە بلاڤکرن، جارەکێ چیرۆک نڤیس ب خوە و جارا دی ژی کا ئەوێ پێشگۆتن نڤیسی، چەند شیایە رێخۆشکرنێ بۆ ڤێ جیهانا هاتیە ئافراندن بکەت.

من ئافراندن ئینا سەر زمان، ئها من مەبەست پێ ئەڤ خالەیە بگەهمێ، ئەز وەسفەکێ بدەمە ڤێ پەرتووکێ و جوانیەکێ ل سەر جوانیا تێکستێن وی زێدە بکەم، هەر چنە بیت ژ نڤیسینێن من یێن رەخنەیی و سەرراڤکرنا تشتێن جوان، جوان مەبەستا من زیندی، کو هەر دەم د نڤیسینێن خوە یێن رەخنەیی دا، ل تێکستێن نڤیسەرێن دی ئەز ل زیندیبوونێ دگەرم و دڤێت خواندەڤا هەست ب ڤێ زیندیبوونێ بکەت، ژبەرکو چیرۆکنڤیس ژی خوداوەندەکە و ئالاڤێن وی پەیڤن و ژ پەیڤان تشتەکی د ئافرینیت، کو ئه و تشت دگەل مرۆڤی باخڤیت.
ئاخر ئەگەر بەشەکێ ئافراندنێ ل نک نڤیسەری و خودانێ تێکستی نەبیت، دێ چاوا شێت لڤینەکێ دەتە تشتەکێ ئەز ل سەر راهاتیم و بۆ من کەتە تشتەکی زیندی، من زیندیبوون دڤێت و نڤیسینا پێشگوتنا من ژی هەمان سەراڤکرنە، کو تەیەکێ خواندەڤا راکێشمە خواندنا وێ زیندبوونا من دڤان چیرۆکان دا دیتی.

زێمارا دلی، کورتە چیرۆک، د. ئەمجەد عوبەید، 2022 دهوک.[1]