دیدار و بەرهەڤکرن: درباس مستەفا
– نوکە (10) پرتووکێن دی ژ پرۆژەیێ چاپ و وەشانێ ل بەر گەڕا چاپێ نە، لێ چاڤەڕێینە هندەک گوهۆڕین دێ هێنە کرن
نڤیسەر و ڕۆژنامەڤان ئیسماعیل بادی ژ وان کەسانە یێ هەردەم بکار و براڤ و قەلەمێ پڕ ب بەرهەم ژ بۆ خزمەتکرنا پەیڤ و ڕەوشەنبیریا کوردی. ئیسماعیل یێ نڤیسەر چەندین پرتووک گەهاندینە چاپێ کەتینە د ناڤ کاروانێ ڕەوشەنبیریا کوردی دا، د ئەڤ سالە دا ژی ئه و کۆمەکا پرتووکێن نوو چاپکرینە، و نوکە ژی کۆمەکا دی یا پرتووکان ل بەر دەستێن وی نە ل هیڤیا چریسکەکا ڕۆناهیێنە ژ ئالیەکی کو خوە ب چاپێ ڕا بگەهینن. ژ بۆ ڤێ چەندێ و ل دۆر بەرهەمێ وی و کا چ پرۆژە ل بەر دەستن، هەروەسا پرۆژێ چاپکرنا پرتووکان ل ناڤەندا خانی یا ڕەوشەنبیری و ڕاگەهاندنێ، و چاوانیا هلبژارتن و هەلسەنگاندنا پرتووکان ل ناڤەندێ و چەندین پرسیارێن دی، مە ئەڤ دیدارە ل گەل کریە..
ل دۆر پرۆژێ چاپکرنا پرتووکان و کا کەنگی دەستپێکریە، نڤیسەر ئیسماعیل بادی گۆت: ئەڤ سالە پرۆژەیی دەست پێکریە، هەتا نوکە (24) بیست و چار پرتووک هاتینە چاپکرن، بابەتێن هەمە جۆرن، لێ پشتی هینگێ ل دووڤ ڕێنمایان گرنگی ب هندەک بابەتان دهێتەدان. ژ بەر کو وەکو دیار ناڤەندا خانی پشکەکە ژ دەزگایێ ڕەوشەنبیری و ڕاگەهاندنا پارتی، ئه و پشتەڤانا پرۆژەیە، لەوما پتر گرنگیێ ب بزاڤ و چالاکی و بیرەوەری یێن پێشمەرگەیی ددەت، هەروەسا دیرۆکا دەڤەرێ و هەر مژارەکا گرێدایی بابەتێن نەتەوەیی و دۆزا کوردی بن.
ژ بۆ چاونیا هەلبژارتن و هەلسەنگاندن پرتووکا نڤیسەری گۆت: ل سەری مە گۆت چ جۆرە پەرتووکان چاپ دکەین، ئانکو ئەڤێن ئەم وەردگرین، دڤێت د وان مژاران دا دەرنەکەڤن، نوکە مە پتر گرنگی دایە وان مژاران، ژ بۆ هەلسەنگاندنێ ژی، مە لژنەیەکا ڕەوشەنبیری ل ناڤەندێ هەیە و هەر پرتووکەکێ ژ لایێ ناڤەرۆکێ و ڕێنڤیسێ ڤە پێدا دچین، هەکە تێبینیەک ژی مە هەبیت، ب ڕێیا پەیوەندیێ ل گەل نڤیسەرێ وی ڕاستڤەکرن تێدا دهێتە کرن و چاپ دەین.
هندەک کتێبێن وی ئەڤە دو جاران هاتنە چاپکرن، ل دۆر ئەگەرێن چاپکرنا دویێ گۆت: ڕاستە دبیت ئه و پرتووک نەمابنە ل ناڤ بازاری، هەروەسا گرنگیا زێدەکرنا هندەک مژارێن دیترە ل سەر ناڤەرۆکا وێ، ئانکو ئه و پرتووکا دهێتە چاپکرنەڤە، نە پرتووکا چاپا ئێکێ یە، لێ کۆمەکا پێزانین و بابەتان ل سەر زێدە دبن، ئه و پرتووکێن دوبارە هاتینە چاپکرن وەکو (حەیرانۆک) ژ لایێ ئەنستیتۆیا کەلەپورێ کوردی ڤە، ڤەکۆلینەکا ئەکادیمی یا بەرفرەه مە ل سەر حەیرانۆکێ ل سەر زێدەکریە. هەروەسا سەرجەمێ بەرهەمێ شەهید سەعدوللا ئاڤدەل ئه و ژی ڤێ دووماهیێ چاپبوویە، مە کۆمەکا وێنەیێن نوو کرینە تێدا، هەروەسا پشکەکا دیتر کو جارا ئێکێ وەسا گرنگی مە پێدایە، ئەدەبێ نامە نڤیسینێ یە، پتر ژ 15 نامەیێن هۆزانڤانی ب دەستخەتێ وی تێدانە کو د چاپا ئێکێ دا نەبوون، ئەڤە ژی وەکو ژانڕەکی ئەدەبی (نامەنڤیسین) گەلەکا گرنگە و دچیتە د خانا پەخشان نڤیسینێ دا. لێ مخابن وەکو پێدڤی هێشتا د ناڤ ئەدەبێ کرمانجی دا گرنگی پێ نەهاتیەدان.
دیسا بادی ژ بۆ بەرهەمێن وی یێن ئەڤ سالە چاپ بووین دبیژت: هەتا نوکە د گەل ئەوێن دوبارە چاپبووین د ئەڤ سالەدا دبنە (7) حەفت پرتووک هاتینە چاپکرن، ئه و ژی (حەیرانۆک، مەدرەسەیا قوبەهان، د. محەمەد نووری دێرسمی و بانگینا وەلاتپارێزێن کورد، مەدرەسەیا مایێ، ڕەمەزان عیسا د ناڤبەرا گریێ و گرنژینێ دا، سەعدوللا ئاڤدەل.. شاعر و پێشمەرگەه و شەهید، ئەحمەدێ نالبەند.. کۆمەکا ڤەکۆلین و گۆتار و دیداران)، یا دووماهیێ هێشتا نەگەهشتیە دەستێ من و من نەدیتیە کو ل بەغدا چاپبوویە.
ل دۆر پرۆژێ چاپکرنێ و کا دێ هەر یێ بەردەوام بت ڕۆژنامەڤانی گۆت: نوکە (10) پرتووکێن دی ل بەر گەڕا چاپێ نە، دبیت ئه و ژی چاپ ببن کو مژارێن ژێکجودانە. لێ بەردەوامیا پرۆژەی، چاڤەڕێینە هندەک گوهۆرٍین بهێنە کرن و پرۆژە ببیتە تشتەک دیتر..!!
ئسماعیل نڤیسەر ژ بۆ وان پرتووک یان ئه و پرۆژەیێن ل بەر دەستێ وی دبێژت: ب دیتنا من هەکە مرۆڤی کارەک وەکو پیشە وەرگرت، دڤێت بەرهەم هەبیت، یان ژی دەست ژ وی کاری بەردەت و مەیدانێ بۆ هندەکێن دی بهێلیت. هەکە ئەز نڤیسەربم، دڤێت من بەرهەم هەبیت!! نڤیسەر ب بەرهەمێ خوە نڤیسەرە. ئەوێن هەتا نوکە مە گەهاندینە چاپێ نێزیکی (28) پرتووکانە، چ یێن مە ب تنێ بن، یان ژی پشکداری د گەل هندەک نڤیسەرێن دیتر، هەروەسا نوکە نێزیکی (10) پرتووکێن دیتر د بەرهەڤن بۆ چاپێ، ب تنێ هندەکان پێداچوونەکا سڤک پێ دڤێت، دێ چاڤەرێی چاپێ بن و جهەک هەبیت خوە لێ بکەتە خودان.
نڤیسەر و ڕۆژنامەڤان ئیسماعیل بادی:
ل سالا 1963ێ ل باژێرێ دهۆکێ ژ دایکبوویە، بەرهمەمَ خوە یێ ئێکێ ل سالا 1982ێ ل ڕۆژناما (هاوکاری) ل بەغدا بەلاڤکریە. گۆڤارا (دەنگێ مە) ل سالا 1985ێ د گەل چەند هەڤالا دەرئێخستی یە. ل 1993 – 1996ێ، چەندین بەرنامە بۆ ئێزگێ دەنگێ کوردستان (رادیۆیا دهۆک) بەرهەڤکرینە.ل سالا 1998ێ، بەرنامێ (دەنگێن نەمر) ل دۆر سترانبێژێن کورد بۆ تەلەفزیۆنا کوردستان، کەنالێ ئاسمانی بەرهەڤ و پێکێش دکر. ئەندامێ دەستەکا ڕۆژنامەیا (پەیمان) و کۆڤارێن (نوخازی، گازی، پەیڤ، ڕۆژنامەڤانی) بوویە. هەروەسا سکرتێرێ نڤیسینێ و جێگرێ سەرنڤیسکارێ ڕۆژناما (ئەڤرۆ) بوو. سەرنڤیسەرێ گۆڤارا (بزاڤا پالا) یا سەندیکا کرێکارێن کوردستانێ/ لقێ دهۆک بوویە. بەرپرسێ سەندیکا ڕۆژنامەنڤیسێن کوردستانێ / لقێ دهۆک بوویە بۆ ماوێ دو خولا 2001 – 2008. نوکە بەرپرسێ پەرتووکخانا ناڤەندا خانی یا ڕەوشەنبیری و ڕاگەهاندنێ یە. ل سالا
2016- 2017 کۆلیژا پەروەردا بنیات/ پشکا زمانێ کوردی ل زانکۆیا دهۆکێ ب دوماهی ئینایە. دیسان چەندین بەرهەمێن چاپکری یێن هەین.[1]