مەترانێ #زاخۆ# و #ئامێدیێ# ل پارێزگەها دهۆکێ ڕاگەهاند، پشتی ئازادکرنا عیراقێ ل سالا 2003، ڕەوشا مەسیحیان ل عیراقێ تێکچوو و مەسیحی ب چو ڕەنگان نەشیان ل عیراقێ بژین و گەلەک ژ وان بەرەڤ هەرێما کوردستانێ هاتن و هندەک ژی چوونە دەرڤەی وەلاتی. هندەک مەسیحی ل تلکێف و ئەلقوش و تلسقوف ئاکنجی ببوون، لێ هاتنا داعش کارتێکرن ل وان کرن و هەموو مەسیحی ژ وان دەڤەران ژی ڕەڤین و بەرەڤ هەرێما کوردستانێ هاتن و داعش بۆ ئەگەر مەسیحی ل عیراقێ بهێنە پاقژکرن و کەس لێ نەمینیت.
مەتران ڕەبان ئەلقاس، مەترانێ زاخۆ و ئامێدیێ ل پارێزگەها دهۆکێ بۆ ئەڤرۆ دیار کر، شەرێ داعش بوو ئەگەر کو نێزیکی هەشت هزار خێزانێن مەسیحیێن عیراقێ بهێنە هەرێما کوردستانێ و هەتا نوکە ب تنێ ئاوارێن مەسیحی یێن ئەلقوش ڤەگەریاینەڤە کو نێزیکی 1500 خێزانانە.
مەتران ڕەبان زێدەتر دبێژیت: ل دویڤ داتایێن سالا 1970، نێزیکی ملیۆنەک و 500 هزار خێزانێن مەسیحیان ل عیراقێ هەبوون، بەلێ نوکە ب تنێ نێزیکی 350 هزار مەسیحیان ل عیراقێ و کوردستانێ ماینە و یێن دی هەمی چووینە دەرڤەی وەلاتی. هەروەسا نها ل بەغدا و بەسرا کێم مەسیحی لێ ماینە و هژمارا وان ناگەهیتە 20 هزار کەسان.
سەبارەت ڕەوشا ئاوارێن مەسیحی ل هەرێما کوردستانێ ڕەبان دا زانین کو ڕەوشا وان ژی وەکو هەر ئاکنجیەکێ هەرێما کوردستانێ یە، چونکو کوردستان ب گشتی یا د ڕەوشەکا نە ئارم و قەیرانێن ئابووری دا و بێگومان ڤێ چەندێ کارتێکرن ل هەمی مەسیحی و ئاوارێن مەسیحی ژی کریە و کا ڕەوشا ئاکنجیێن هەرێمێ و ئاواران یا چاوایە مەسیحی ژی هەر ب وی ڕەنگی نە.
ئەرێ وەلاتەکێ ئورۆپی یان جیهانی هەیە ب ئاشکرا ڕاگەهاند بیت کو هەر ئاوارەکێ مەسیحی بچیتە وەلاتێ وان دێ ئیقامێ و ناسنامێ دەنێ، مەتران ڕەبان دبێژیت: ئەڤ تشتە چ جاران چێنەبوویە و چێنابیت ژی، چونکو قانوونێن ئورۆپی گەلەک ب ئاشکرایی دهێنە جێبەجێکرن و هەمی وەکی ئێک دهێنە هژمارتن، دەمێ مەسیحیەک دچیتە وەلاتەکی وەکو هەر وەلاتیەکێ دی یێ ئاوارە سەرەدەری ل گەل دهێتە کرن و چ جیاوازی ناهێتە کرن، ئاوارێن مەسیحی ژی دەمێ دچنە دەرڤەی وەلاتی پتریا وان دچنە ئەمریکا و کەنەدا و هندەک وەلاتێن دی یێن ئورۆپی.
ناڤهاتی خویاژی کر، دووماهی کۆمبوونا مە یا مەترانێن عیراقێ کو 21 مەتران و پتریاک بوو ل ڕۆما بوو، مە ل وێرێ کۆمبوونا خۆ یا دووماهیێ کر و پشتی هینگی ل گەل ڤاتیکانی ڕوینشتین، بەری ئەم بۆ ڤاتیکانی بەحسێ ڕەوشا مەسیحیێن عیراقێ بکەین، ڤاتیکانی ب خۆ هەمی تشت دزانین و ڕەوشا مەسیحیان ژی هەمی دزانی و دەنگ و باس بۆ وی چو بوون، بەلێ مە ژی یا مایی بۆ گۆت و ڕەوش ب گشتی گەنگەشەکر و مە بزاڤ ژی کرینە ڕەوشا ئاوارێن مەسیحی هێشتا باشتر لێ بهێت.
هەروەسا دیارکر کو بەری سەرەدانا ڕۆما ژی وی وەکو مەتران ب تنێ ژ عیراقێ سەرەدانا ئەمریکا کربوو و ل گەل هندەک ژ نوینەرێن ئەمریکا و ئوبامای کۆم ببوو و بەحسێ ڕەوشا ئاوارێن مەسیحی ل عیراقێ و کوردستانێ کربوو و پشتی ڤەگەریانا وی ژ ئەمریکا و ڕۆما، ل 17/9/2015 ئەو ل گەل سەرۆکێ هەرێما کوردستانێ کۆمببوو و بەحسێ سەرەدانا خۆ بۆ ئەمریکا و ڕۆما کربوو و کا وان ل وان هەردو وەلاتان چ کربوو هەمی بۆ سەرۆکی بەحس کربوو.
مەتران ڕەبان ئەلقاس، مەترانێ زاخۆ و ئامێدیێ یە کو نێزیکی 30 هزا مەسیحیان ل وان دەڤەران دژین. ڕەبان ژ بنەمالا قەشانە، ل 18/3/1949 ژدایک بوویە، خواندنا خۆ یا بنەرەت و ئامادەیی ل ئامێدیێ ب دووماهیک ئینایە و فەلسەفە و لاهوت د زمانێ سریانی ژی ل دهۆکێ تمام کریە، زمانێ کوردی، عەرەبی، سریانی، ئنگلیزی، فرەنسی، ئیتالی باش دزانیت و زمانێ ء ئسپانی ژی تێ دگەهیت و ل سالا 1973 بوویە قەشە و هەتا نوکە ژی ل سەر کارێ خۆ یێ بەردەوامە.[1]