میدیا -ئێسن-ئەڵمانیا:

#غەفوور مەخمووری# سکرتێری گشتیی یەکێتی نەتەوەیی دیموکراتی کوردستان YNDK پەیامێکی ئاڕاستەی مەراسیمی ڕاگەیاندنی کۆمیتەی پەیماننامەی #لۆزان# کردووە، کە ئامادەسازی بۆ کراوە و، ئەمڕۆ 12 / 6 / 2022 لە شاری (ئێسن)ی وڵاتی ئەڵمانیا بەڕێوەدەچێت، لە پەیامەکەیدا ڕایگەیاندووە کەوا لەو کاتەوەی پەیماننامەی (لۆزان) ئیمزاکراو جێبەجێکرا، تا ئێستا ڕۆژهەڵاتی ناوەڕاست و هەموو ناوچەکە هێمنی و ئارامی بەخۆیەوە نەبینیوە و، شەڕ و خوێنڕشتن لە ڕۆژهەڵاتی ناڤیندا درێژەی هەیە، هەروەها دەڵێت: (جێبەجێکردنی پەیماننامەی (لۆزان) فاکتەرێکی سەرەکی بوو بۆ ئەوەی ئاشتی و هێمنی و ئارامی لە ڕۆژهەڵاتی ناڤین و بگرە جیهانیشدا بەرقەرار نەبێت.)، هەر لە پەیامەکەیدا مەخمووری داوای هەڵوەشاندنەوەی پەیماننامەی (لۆزان) دەکات و دەڵێت: (پێویستە هەموو لایەک ئەو ڕاستییە بزانن کە هەڵوەشاندنەوەی پەیماننامەی (لۆزان) و دامەزراندنی دەوڵەتی کوردستان و گەیشتنی گەلی کوردستان بەمافە ڕەواکانی گەورەترین فاکتەری چەسپاندنی هێمنی و ئارامییە لە ڕۆژهەڵاتی ناڤین و، تەنیاوتەنیا لەو ڕێگەیەوە دەتوانرێ ئەو هێمنی و ئارامییەی کە کۆمەڵگەی نێودەوڵەتی دەیخوازێت لەرۆژهەڵاتی ناڤیندا بچەسپێت و دەست بهێنرێت.). ئەمەش دەقی پەیامەکەیە:

بەڕێزان کۆمیتەی پەیماننامەی لۆزان

خوشکان... برایان... ئامادەبووانی بەڕێز

سڵاوی سەرخۆبوون و ئازادیتان لێبێت...

بەڕێزان ؛ ئەمڕۆ ئێوەی بەڕێز کارێکی گرنگ و دیرۆکی ئەنجام دەدەن کە پەیوەستە بەداهاتووی گەلی کوردستان، ئەویش کارکردنە بۆ هەڵوەشاندنەوەی پەیماننامەی لۆزان، کەوا تا ئێستا و دوای سەد ساڵ لەسەر بنەمای ئەو پەیماننامەیە زوڵم لە گەلی کوردستان دەکرێت.

وەکوو خۆتان دەزانن گەلی کوردستان بەدرێژایی مێژوو لە خەبات و تێکۆشان و بەرخوداندا بووە لە پێناو و دەستهێنانی مافە ڕەواکانی خۆیدا و، گەورەترین زوڵمی مێژووییش کە لە گەلی کورد کرابێت ڕێکەوتننامەی (سایکس -پیکۆ) بووە لە ساڵی 1916دا، دوای ئەوەی کوردستان لە ئەنجامی شەڕی چاڵدێران دابەشی سەر هەردوو ئیمراتۆریەتی عوسمانی و سەفەوی کرا، جارێکی دیکە و سەرلەنوێ کوردستان بەپێی ڕێکەوتننامەی (سایکس -پیکۆ) دابەشی سەر (ئێراق و تورکیا و سووریا و ئێران) کرا، ڕاستە ئەو ڕێکەوتننامەیە بۆ داڕشتنەوەی نەخشەی سیاسی ئەو ناوچەیە بوو، بەڵام لە هەمان کاتدا زوڵمیکی گەورەش بوو لە کورد و گەلی کوردستان کرا، بێگومان گەلی کوردستان هەر لە سەرەتاوە ڕێکەوتننامەی (سایکس -پیکۆ)ی ڕەتکردەوەو پێی ڕازی نەبوو.

دوای چوار ساڵ لە ڕێکەوتننامەی (سایکس -پیکۆ) هەوڵێک هاتە ئاراوە کە ئەویش پەیماننامەی (سیڤەر) بوو، بەپێی ئەو پەیماننامەیە لە بەندەکانی (62 و 63 و 64) کۆمەڵێ ماف بۆ گەلی کوردستان دیارکرابوو، بەپێی ئەو پەیماننامەیە دەبوایە دوای ساڵێک گەلی کوردستان وەک هەر گەلێکی دیکەی ناوچەکە خۆی خۆی بەڕێوەببات و، دواتر هەوڵبدات لەسەر خاکی خۆی بینای وڵاتی خۆی بکات، هەوڵبدات وەک چۆن لە ڕابردوودا ڕۆڵێکی کارای هەبووە لە بیناکردنی شارستانییەتی ناوچەکەدا بە هەمان شێوە لە داهاتوودا ڕۆڵێکی کارا ببینێت لە بیناکردنی کۆمەڵگەیەکی مۆدێرن و پێشکەوتوو لە ڕۆژهەڵاتی ناڤیندا، بەڵام بەداخەوە ئەو پەیماننامەیە جێبەجێنەکرا و، ئەوە بوو لە ساڵی 1923 پەیماننامەی لۆزان هاتە پێشەوەو ئەو پەیماننامەیە ئەو خەونەی گەلی کوردستانی لەباربرد کە لە سیڤەردا بەرنامەڕێژی بۆ کرابوو، جارێکی دیکە لە (لۆزان) زوڵم لە گەلی کوردستان کرایەوە، کەمالییەکان زوڵمێکی گەورەیان لەگەڵی کوردستان کرد کە مافی ڕەوای گەلی کوردستانیان نەدا و، نەیانهێشت ویلایەتی موسڵ خۆبەڕێوەبەری ڕابگەیەنێ، دواتر کە ویلایەتی موسڵ لە ساڵی 1925 کە بەئێراقی عەرەبییەوە لکێنرا جارێکی دیکە ئەو خەونەی کورد لەباربرا.

ئێمە ئەگەر تێبینی بکەین لە ماوەی سەد ساڵی ڕابردوودا، کە پەیماننامەی (لۆزان) ئیمزاکراو جێبەجێکرا، ئەوە بووە هۆکاری ئەوەی کە تا ئێستا ڕۆژهەڵاتی ناوەڕاست و هەموو ناوچەکە هێمنی و ئارامی بەخۆیەوە نەبینێت و، شەڕ و خوێنڕشتن لە ڕۆژهەڵاتی ناڤیندا درێژەی هەبێت، جێبەجێکردنی پەیماننامەی (لۆزان) فاکتەرێکی سەرەکی بوو بۆ ئەوەی ئاشتی و هێمنی و ئارامی لە ڕۆژهەڵاتی ناڤین و بگرە جیهانیشدا بەرقەرار نەبێت، بێگومان پێویستە هەموو لایەک ئەو ڕاستییە بزانن کە هەڵوەشاندنەوەی پەیماننامەی (لۆزان) و دامەزراندنی دەوڵەتی کوردستان و گەیشتنی گەلی کوردستان بەمافە ڕەواکانی خۆی گەورەترین فاکتەری چەسپاندنی هێمنی و ئارامییە لە ڕۆژهەڵاتی ناڤین و، تەنیاوتەنیا لەو ڕێگەیەوە دەتوانرێ ئەو هێمنی و ئارامییەی کە کۆمەڵگەی نێودەوڵەتی دەیخوازێت لەرۆژهەڵاتی ناڤیندا بچەسپێت و دەست بهێنرێت، واتە دامەزراندنی دەوڵەتی کوردستان فاکتەری چەسپاندی ئاشتی و ئارامییە لە ڕۆژهەڵاتی ناوەڕاستدا.

ئەگەر ئێمە تێبینی بکەین دەبینین کە ڕێکەوتننامەی گرنگی سیڤەر جێبەجێنەکراوو پەیماننامەی لۆزان جێبەجێکرا، ئەوە بووە هۆکاری سەرەکی کە ناوچەی ڕۆژهەڵاتی ناڤین هێمنی و ئارامی بەخۆیەوە نەبینێت، ئەمەش شەرمەزارییەکی گەورەیە بۆ تەواوی کۆمەڵگەی نێودەوڵەتی کە ئەمڕۆ نەتەوەیەکی زیاتر لە (50) ملیۆن مرۆڤ لە هەموو مافێکی خۆی بێبەشکراوە و، لە لایەن چوار دەوڵەتی ناوچەکە (ئێراق و ئێران و تورکیا و سووریا) دەچەوسێندرێتەوەو مافەکانی پێشێل دەکرێت، بۆیە لەسەر کۆمەڵگەی نێودەوڵەتی پێویستە هاوکاربێت بۆ هەڵوەشاندنەوەی پەیماننامەی لۆزان و، هەوڵبدات بۆ زیندووکردنەوە و کاراکردنەوەی پەیماننامەی سیڤەر و، هاوکاربێت بۆ ئەوەی دەوڵەتی کوردستان دابمەزرێت.

ئامادەبووانی بەڕێز...

بۆ هەڵوەشاندنەوەی پەیماننامەی لۆزان و زیندووکردنەوە و کاراکردنەوەی پەیماننامەی سیڤەر ؛ ئێمە وەکوو گەلی کوردستان پێویستیمان بەوە هەیە بۆردێکی کارکردنمان هەبێت، وەک ئەرکێکی نەتەوەیی و بەپەلە پێویستە (بۆردی هەڵوەشاندنەوەی پەیماننامەی لۆزان و کاراکردنەوەی پەیماننامەی سیڤەر) دابمەزرێنین، بۆ ئەوەی بتوانین لە ڕێگەی ئەو بۆردەوە کاربکەین بۆ هەڵوەشاندنەوەی پەیماننامەی لۆزان و، جارێکی دیکە پەیماننامەی (سیڤەر) زیندووبکەینەوە، بۆ ئەمەش پێویستە هەرسێ ماددەی (62 و 63 و 64)ی پەیماننامەی سیڤەر کارابکەینەوە و بەپێی ئەو ماددانە داوای مافە ڕەواکانی خۆمان بکەین، لەو پێناوەشدا پێویستە هەموو تاکێکی کوردستان بەو ئاڕاستەیە کاربکات، لە هەمان کاتدا پێویستە لەسەر ئاستی نێودەوڵەتیش بزاڤێکی خورت بکەین، بۆ ئەوەی بتوانین کاریگەریمان لەسەر ناوەندە بڕیاربەدەستەکانی ئەمریکا و ئەوروپا و وڵاتانی دیکەش هەبێت، لەم ڕووەوە ڕەڤەندی کورد دەتوانێت ڕۆڵێکی کارا بگێرێت، لێرەوە داوا دەکەین کەوا ڕەڤەندی کورد زیاتر ڕێکبخرێت و بە شێوەیەکی ئۆرگانیزەکراو ئاڕاستەی کار و خەبات بکرێت، هەروەها لە ناوخۆی کوردستانیش پێویستە هەموومان پێکەوە هەوڵبدەین و بەو ئاڕاستەیە کاربکەین، لەبەر ئەوەی هەڵوەشاندنەوەی پەیماننامەی (لۆزان) و زیندووکردنەوەی پەیماننامەی (سیڤەر) هۆکارێکی گرنگ دەبێت بۆ نزیکبوونەوەمان لە گەیشتن بە مافە ڕەواکانمان.

لە کۆتاییدا؛ جارێکی دیکە دەستخۆشیتان لێدەکەین و هیوای سەرکەوتنتان بۆ دەخوازین و هەموو پشتیوانییەکی خۆمانتان پێڕادەگەیەنین، ئومێد دەکەین لە چەند ساڵی داهاتوودا ئێمەیش وەکوو نەتەوەکانی دیکە بە سەربەخۆیی خۆمان بگەین و ببین بە خاوەنی دەوڵەتی نەتەوەیی خۆمان.

بێتەدی هیوا و ئاواتی گەلی کوردستان، بێتەدی کۆماری کوردستان، لەگەڵ ڕێز و خۆشەویستی دووبارەمان بۆ هەموو لایەک.

بژی کورد... بژی کوردستان.


براتان

غەفوور مەخمووری
سکرتێری گشتیی
یەکێتی نەتەوەیی دیموکراتی کوردستان YNDK.[1]