ناونیشان: ژانەسەر و ماتۆڕسکیلەکانی وڵاتی قەرەقوش
نووسەر: #شەماڵ محەمەد محەمەدئەمین#
لەم ڕۆژانەی پێشو هەڵمەتی دەسگیرکردنی ماتۆڕسکیل لە شارەکەم دەستی پێکرد، دەیان و سەدان ماتۆرسکیل گیران و لەناوبران، خەڵکێکی زۆر بێکار و زەرەرمەند بون، دیارە ئەم هەڵمەتە بەهۆی زۆربونی ماتۆرسکیلی بێ ژمارە و لێخوڕینی بێ مۆڵەتەوە بوە.
ئەوەی سەیرە، خەڵک ئامادەن ماتۆرسکیلەکان تۆماربکەن بەڵام حکومەت خۆی تۆماری ناکا بە بیانوی ئەوەی کوالێتییان خراپە!
ئەی بۆچی ڕێگەتان دا بێنە بازاڕ؟
نازانین بە قاچاخ هاتوون!!
ئەی ئێستا بۆچی لەجیاتی سزادانی بازرگانەکان سزای خەڵکی هەژار دەدەن؟
ئاخر بازرگانەکان چەند دانەیەکن، سزادانیان ئاسانتریشە، جگە لەوەی خاوەن ماتۆرسکیلی بەستەزمان گوناهی چییە کە لەبەر نەداری سواری ماتۆرێکی هەراسانکەر و ترسناک دەبێ! ئەی ئەوانەی بژێوییان لەسەر ماتۆرەکانیانە، ئەوان تاوانیان چییە؟
ئایا کۆنترۆلکردنی هاتوچۆ و پاراستنی سەلامەتیی خەڵک بەوە دەبێ کە تەڕ و وشک بەیەکەوە بسوتێنی؟ بۆچی تەنها ئەوانە سزا نادەن کە خەڵک هەراسان دەکەن و کارەسات دەنێنەوە؟
زۆرێک لە فەرمانەکانی ئەم دەڤەرە لە هی قەرەقوش دەچن، دەڵێن قەرەقوش کە فەرمانڕەوایەکی ملهوڕ و نەزان بوە جارێکیان بڕیاری سێدارەی بۆ کەسێک دەرکردوە بەڵام تاوانبار باڵای زۆر بەرزبووە نەیانتوانیوە لە سێدارەی بدەن، فەرمانی کردوە کەسێکی کورت بێنن و لەجیاتی تاوانبارەکە لەسێدارەی بدەن!
کاتێک مرۆڤ قوڵ بیرنەکاتەوە و نەشارەزا بێ ناتوانێ کێشەکان چارەسەر بکا، ئەگەر چارەسەریشیان بکا دیسان سەرهەڵدەدەنەوە چونکە لە ڕەگەوە چارەسەر نەکراون.
من نزیکەی 15 ساڵ بو ژانەسەر بەرۆکی گرتبوم، زۆرم هەوڵدا و دەرمانی جیاجیام بەکارهێنا تا وایلێهات حەبی ژانەسەر کاری تێنەدەکردم، کۆمەڵێک دکتۆرم تاقیکردنەوە لە حەبی ژانەسەر باشتریان پێنەدام. تا دواجار لە چەند دکتۆرێکی بیانی پرسیارم کرد، تێگەیشتم کە من نەخۆش نیم، ژانەسەریش نەخۆشی نییە بەڵکو نیشانەی نەخۆشییە، بەڵام نازانم بۆچی دکتۆرەکانی خۆمان ئەوەیان نەدەزانی!
دوای ئەوەی کە تێگەیشتم نەخۆش نیم و ژانەسەریش نەخۆشی نییە (تەنها لە حاڵەتی تایبەتی وەک شەقیقە نەبێ)، ئێستا زۆرباشم و کەم ژانەسەر دەمگرێ. ئەگەر کێشەکان لە ڕیشەوە چارەسەر نەکرێن هەرگیز بنەبڕ نابن.
ڕۆژانە هەواڵی کارەسات و مەرگی ئازیزان دەبیستین بەهۆی کارەساتی پێکدادانی ئۆتۆمبێل، ڕاستە هەندێک لە ڕێگاکان باش نین و هەندێک لە شۆفێرانیش پابەند نین، بەڵام بۆ کەس ناپرسێ ئەی کوالێتیی ئۆتۆمبێلەکان چۆنن؟
ئایا کوالێتی و مەرجەکانی سەلامەتی لە ئۆتۆمبێل کاریگەرییان نییە لەسەر پاراستنی گیانی سەرنشینەکانی؟
بە سەرنجدان لە ئۆتۆمبێلە مۆدێل نوێکان و بەراوردکردنیان لەگەڵ کۆنەکان بۆت دەردەکەوێ ئەوانەی ئێستا زۆر بێ کوالێتی و ترسناکن، ئەوەی سەیرە بڕیارەکانی حکومەتە، باشترین ئۆتۆمبێلی جیهان کە مێرسیدسە ئەگەر تەمەنی لە 2 ساڵ زیاتر بێت تۆمار ناکرێ بەڵام ئۆتۆمبێلی ئێرانی و چینی و کۆری و هەندێک مۆدیکی ژاپۆنیش کە خراپترین و ناسەلامەتترین ئۆتۆمبێلن تۆمار دەکرێن!
ئاخر توخوا بە لۆجیکی کێ بیجۆی ئێرانی مۆدیل 2022 باشترە لە مێرسیدسی مۆدیل 2015؟
ئەرێ پێتان وایە قەرەقوش مردووە؟ ڕەنگە قەرەقوش لەژیاندا نەمابێ بەڵام بڕیار و فەرمانە جوانەکانی هەر ماون. [1]