ئەندامان، لایەنگران و کادر و پێشمەرگەکانی #حیزبی دێموکڕاتی کوردستانی ئێران#!

خەڵکی تێکۆشەری کوردستان!

ئازادیخوازانی ئێران و دۆستانی گەلی کورد!

26ی خەرمانان (17ی سێپتامبر)ی ئەمساڵ 30 ساڵ بەسەر تێرۆری #دوکتور سادق شەڕەفکەندی#، سکرتێری گشتیی حیزبی دێموکڕاتی کوردستانی ئێران، #فەتاح عەبدولی#، ئەندامی کۆمیتەی ناوەندی و نوێنەری حیزب له ئورووپا، هومایون ئەردەڵان، نوێنەری حیزب له ئاڵمان و نووری دێهکوردی تێکۆشەری ئێرانیی دۆستی حیزب تێدەپەڕێ. سێ دەیە لەمەوبەر له و ڕۆژەدا، سکرتێری گشتیی حیزبەکەمان و هاوڕێیانی پاش بەشداری له کۆنگرەی ئەنترناسیۆنال سۆسیالیست له بێرلین و لەحاڵێکدا که لەگەڵ کۆمەڵێک کەسایەتیی سیاسیی ئێرانی لە ڕیستۆرانێکی ئه و شاره بەناوی میکۆنۆس سەبارەت به یەکگرتنی ئۆپۆزیسیۆنی ئێرانی له حاڵی گفتگۆدا بوون، تیمێکی تێرۆریستیی کۆماری ئیسلامی لێیان وەژوور کەوتن و شەهیدیان کردن.

تێرۆری دوکتور شەڕەفکەندی خەسارێکی قورس بوو لەپێشدا له پەیکەری حیزبی دێموکڕات چونکە له ماوەی تەنیا سێ ساڵدا بۆ جاری دووهەم ڕێبەری کارامە و لێوەشاوەی خۆی لەدەست دا و لەپاشان له سەرجەم بزووتنەوەی کورد و ئۆپۆزیسیۆنی ئێرانی کەوت که بەمجۆره بۆ هەمیشه له ڕۆڵی کارساز و کاریگەری خەباتگێڕێکی مەزن بێبەش بوون که خەریک بوو بۆشایی نەمانی دوکتور قاسملووی تا ڕادەیەکی زۆر پڕ بکاتەوە. به و حاڵەش خەسارەتی شەهیدبوونی دوکتور سادقی شەڕەفکەندی لەگەڵ هەموو قورسی و تاڵییەکەی، حیزبی دێموکڕاتی کوردستانی لەپێ نەخست. هەروەک چۆن له سایەی ئیراده و لێزانیی دوکتور شەڕەفکەندی حیزبی دێموکڕات پشتی لەژێر باری قورسی تێرۆری دوکتور قاسملوودا ڕاست کردەوه، لەدوای شەهید بوونی دوکتور شەڕەفکەندییش ڕێبەرایەتیی حیزبی دێموکڕات و کادر و پێشمەرگە قارەمانەکانی ئه و حیزبه، دڵگەرم و پشتقایم به هاودڵی و پشتیوانیی خەڵکی کوردستان، ئاڵای خەباتی نەتەوەکەیان هەروا شەکاوه ڕاگرت و خەباتی ئه و حیزبەیان بەوپەڕی شێلگیری و لەخۆبوردووییەوه درێژە پێ دا و به هەموو ئه و گیروگرفت و ئاستەنگانەی له قۆناغەکانی دواتردا لەسەر ڕێگای ئه و خەباته بوون، کارێکیان کرد که حیزبی دێموکڕات له تاقیکارییەکی سەختی دەورانی پاش ڕێبەرانی شەهید سەربەرز بێته دەر.

لەلایەکی دیکەوه تێرۆری دوکتور شەڕەفکەندی و هاوڕێیانی هەروەک پاش تێرۆری دوکتور قاسملوو شەپۆلێکی بەربڵاو له بێزاریی خەڵکی کوردستان له کۆماری ئیسلامی و هاوپێوەندیی پارچەکانی دیکەی کوردستان و کۆڕ و کۆمەڵه ئێرانی و نێونەتەوەییەکانی لەگەڵ حیزبی دێموکڕات بەدووی خۆیدا هێنا. له هەمووشی گرینگتر، بەپێچەوانەی کەیسی تێرۆری دوکتور قاسملوو که لەودا له ئاکامی فشار و شانتاژەکانی کۆماری ئیسلامی و سیاسەتی سەوداچییانەی دەوڵەتی ئوتریش، لێکۆڵینەوەکانی پۆلیس هیچ ئەنجامێکی قەزایی ڕاستەقینەیان لێ نەکەوتەوه و تێرۆریستەکان ڕادەستی کۆماری ئیسلامی کرانەوه، به ماوەیەکی کەم پاش تێرۆری میکۆنۆس زۆربەی ئەنجامدەرانی ئه و جینایەته دە ستگیر کران و له ئەنجامی لێکۆڵینەوەی ورد و درووستی ئه و جینایەته سامناکه و بەڕێوەبردنی دادگایەکی موعتەبەر و سەربەخۆ که نزیکەی پێنج ساڵی خایاند، دەزگای قەزایی ئاڵمان له حوکمێکی بوێرانەی مێژووییدا که ڕۆژی 21 خاکەلێوەی 1376ی هەتاوی دەرچوو، دەسەڵاتدارانی کۆماری ئیسلامیی ئێرانی له بەرزترین ئاستی خۆیدا به بەرپرسیاری تێرۆری دوکتور شەڕەفکەندی و هاوڕێیانی ناساند. حوکمێک که له ئاستی دیپڵۆماسییشدا لێکەوتەی گرینگ و بێوینەی هەبوو چونکه دەوڵەتانی یەکێتیی ئورووپا بۆ ماوەیەک باڵیۆزەکانیان له ئێران بانگ کردەوه.

دوکتور سادقی شەڕەفکەندی له بنەماڵەیەکی ناسراو و نیشتمانپەروەری ناوچەی موکریان هاتبووه دنیا و لەژێر سایەی مامۆستا هەژاری برا گەورەیدا زۆر زوو به چارەنووسی گەلی کورد ئاشناو و لەگەڵ ڕەوتی خەبات بۆ ئازادیی ئه و گەله تێکەڵ بوو و هەر به و هۆیەش زۆر جار لە لایەن ڕێژیمی پاشایەتییەوە تووشی ئازار و دوورخستنەوه ببوو. ئه و هەر له سەردەمی خوێندکارییەوه بەتایبەتی ئه و کاتەی له پاریس خەریکی وەرگرتنی دوکتوڕای شیمی بوو، لەڕێگای دوکتور قاسملووەوه پەیوەست بە ڕیزەکانی حیزب ببوو و دواتریش کاتێک وەک مامۆستای زانکۆ لە تاران دەستبەکار بوو، به نهێنی ئەرکی پێوەندیی نێوان حیزب و کوردەکانی دانیشتووی تارانی بەڕێوە دەبرد. بەڵام پاش شۆڕشی 1357 و دەستپێکردنی تێکۆشانی ئاشکرای حیزبی دێموکڕات، دوکتور شەڕەفکەندی نیشانی دا که جیا لە شارەزابوونی لە زانست، خەباتگێڕێکی بوێر و بەئیراده، بەڕێوەبەرێکی لێبڕاو و بەبەرنامه و سەرکردەیەکی بەبڕشت و مەیدانی له هەلومەرجه هەرە دژوارەکانیشدایه.

شەڕەفکەندی که له مەودای نێوان سەرکەوتنی شۆڕشی گەلانی ئێران دژ بە نیزامی پاشایەتی هەتا کاتی شەهیدبوونی دوکتور قاسملوو بەرپرسایەتیی زۆر بەرچاو و گرینگی حیزبیی له ئەستۆ بوو و هەر ئه و کاته لە ڕیزەکانی حیزبدا بۆخۆی قوتابخانەیەک بوو بۆ وانەی وره و باوەڕ و پرەنسیپ و مودیرییەت، لەگەڵ شەهید بوونی دوکتور قاسملوو دەمودەست لە جێگه و پێگەی ڕێبەرێکی سیاسیی بەئەزموونی کورددا دەرکەوت و مەشخەڵی دەستی دوکتور قاسملووی پڕشنگدارانه هەڵگرتەوه. لەحاڵێکدا که له بارودۆخێکی زۆر ناهەمواردا حیزبی دێموکڕات گەورەترین و کاریگەرترین کەسی مێژووی خۆی لەپاش پێشەوا واته دوکتور قاسملووی لەدەست دابوو، دوکتور شەڕەفکەندی به مشوور و لێزانیی خۆی و به هاوکاری و پشتیوانیی هاوڕێ و هاوکارانی کارێکی کرد که حیزبی دێموکڕات به باشترین شێوەی مومکین لەم قۆناغە ئەستەمەی مێژووی خۆی تێپەڕ بێ. له و ماوە کەمەدا که بەرپرسایەتیی یەکەمی حیزبی لەسەرشان بوو، شەڕەفکەندی به لێهاتووییەکی تایبەتییەوه جێگە و پێگەی حیزبی دێموکڕاتی لەسەر ئاستی بزوتنەوەی کورد و لەنێو ئۆپۆزیسیۆنی ئێرانی و کۆڕ و کۆمەڵەکانی دەرەوەدا پاراست و پەرەی پێ دا. لە بەجێگەیاندنی ئه و ڕیسالەته سیاسی و خەباتگێڕییەشدا، دوکتور شەڕەفکەندی وێڕای ئەوه که مرۆڤێکی بیرفراوان و خاوەن ڕۆئیای ئینسانی و سێکولار و دادپەروەرانه بوو، ئیمانێکی قووڵی به ئەولەوییە تی پرسی ڕزگاریی نەتەوایەتی هەبوو و لەگەڵ باوەر به پێویستیی هاوکاری و هاوپێوەندی لەئاستی سەراسەریی ئێراندا، بەوپەڕی متمانەبەخۆبوونەوە داکۆکیی له مەوجودییەتی سیاسیی نەتەوەی کورد و هەقانیەتی مافی دیاریکردنی چارەنووسی ئه و گەله دەکرد.

ئێمه ئەمڕۆ له کاتێکدا یادی دوکتور شەڕەفکەندی و هاوڕێیانی بەرز ڕادەگرین و ئه و جینایەتەی کۆماری ئیسلامی وەبیر دەخەینەوە که هەلومەرجی خەباتی گەلان له دنیادا و دۆزی ڕەوای کورد گۆڕانی زۆریان بەسەردا هاتووه و کۆماری ئیسلامیی ئێرانیش لەبەر ماهییەتی دژه ئینسانی و دژه دێموکراتیکی خۆی و بێ باوەڕبوونی بە چارەسەری کێشەکانی وڵات له هەموو کاتێک زیاتر لەگەڵ ڕق و بێزاریی خەڵکی ئێران و پێکهاتەکانی بەرەوڕوو بۆتەوه و بەهۆی سیاسەتی ئاژەوەگێڕانە و تێکدەرانەی له ئاستی دەرەوەدا جێگە و پێگەی ناوچەیی و نێونەتەوەیی له خراپترین دۆخی دایه.

هەروەک چۆن دوکتور شەڕەفکەندی له و باوەڕەدا بوو که لە بارودۆخی ئاماژەپێکراودا دەبێ هێزە سیاسییەکانی نەیاری کۆماری ئیسلامی هان بدا که هەم لەنێو خۆیاندا لەسەر بنەمای دێموکڕاتیک و بەدیتنی واقعیاتی کۆمەڵگای ئێران یەک بگرن و هەم پشت به هێزی هەراوی خەڵک ببەستن، ئەمڕۆش حیزبی دێموکڕاتی کوردستانی ئێران له و باوەڕەدایه که سی ساڵەی تێرۆری میکۆنۆس و بیرەوەریی سەرجەم شەهیدانی ڕێگای ئازادی و دێموکڕاسی له کوردستان و ئێران دەبێ بکرێنه هەوێن و هاندەر بۆ ئەوەی وێڕای ڕیسواکردن و بەرپەرچدانەوەی هەرچی زیاتر و باشتری پیلان و تاوانه دژه مرۆییەکانی کۆماری ئیسلامی له بەرامبەر خەڵک و نەیارانی، زەرفیەت و توانای خەبات بۆ ئاڵوگۆڕی ئازادیخوازانه له ئێران له هەموو بەستێنەکاندا به جۆرێک ڕێک و یەک بخرێ که کۆتایی به تەمەنی نگریسی ئه و ڕێژیمه بێنێ و سەرەنجام زەمینەیەک دروست بێ که لەودا گەلانی ئێران به ئازادی و له پێگەی یەکساندا بۆ دواڕۆژی هاوبەشیان بڕوانن و گەلی کوردیش به مافه ڕەواکانی خۆی بگا. ئەوەش پێویستیی به بەخۆداچوونەوه و مایەلەخۆدانان و مشوور و کاردرووستایی له هەموو ڕەهەند و بازنەکانی هاوخەباتی له ئاستی کوردستان و ئێراندا هەیە.

هەر له و پێناوەدا زۆر جێگای سەربەرزیی حیزبەکەمان و دڵخۆشیی خەلکی کوردستان و دۆستانی گەلی کورده که نزیک به مانگێک لەمەوبەر پرۆسەی یەکگرتنەوەی حیزبی دێموکڕات به ئەنجام گەیشت و درێژەدەرانی ڕێگای دوکتور قاسملوو و دوکتور شەڕەفکەندی توانیان سەرلەنوێ له چوارچێوەی حیزبێکی یەکگرتوودا خەباتی شێلگیرانەی خۆیان درێژە بدەن. حیزبی دێموکڕات به لەبەرچاوگرتنی ڕیسالەتی مێژوویی سەرشانی و چاوەڕوانیی خەڵکی کوردستان ئەم دەسکەوته پیرۆزه و بیرەوەریی سیهەمین ساڵوەگەڕی تێرۆری دوکتور شەڕەفکەندی و شەهیدانی تری خەرمانانی خوێناوی دەکاته دەرفەتێک بۆ نوێکردنەوەی پەیمان و بڕیاری بەردەوامی له خەباتی شێلگیرانه و بەرپرسیارانه هەتا وەدیهێنانی ئامانجی شەهیدان. پەیامی ئێمه بۆ تێکۆشەرانی دێموکڕات؛ پاراستنی یەکڕیزی و هاوهەڵوێستی و ئەرک وەخۆگریی زیاتریانە.[1]