نۋیستەی: ئاکۆ مارانی
11و ئەپڕیلو 2017
مانیفێست-کەرڎەو دەسۇرو نۋیستەی یان ڕانۋیسی
بە پېچەۋانەو جۊرو مانیفێست-کەرڎەو دەسۇرو ڕازۋانی، پەنەۋاز ھەن زۋانزانەکۍ گرڎو ناوچە ھۆرامی-زۋانەکا پېۋەرە سەرو ئانەیە ڕېکۍ گنا، کە یەک جۊر ڕانۋیس پەیڕەۋکریۊ، ھەڵبەتە مشیۊ ئېمە ئانەما ۋیرنەشۊ، کە ڕانۋیس یان یەک ڕانۋیسی بە ۋاتاو ئانەیە نېیا، کە مشیۊ گرڎو ھۆرامی زۋانەکا پەی مەبەسېۋی نامېۋە یان ۋاچېۋە بەکاربەرا و دەسبەرڎارو ھامۋاتاکا وېشا با، پا جۊرە کە کەسانېۋ بە ھەڵە چە ڕانۋیسی یۊگېرتەی یاۋێنېنە. نەخێر، یەک ڕانۋیس ۋاتا جۊرو نۋیستەو ۋاچەکا، خاڵبەڼی دېڕ و نیمەدېڕۍ، چنی نۋیستەو ئامرازەکا بەتایبەت ئامرازەکا پەیۋەڼی و پەیۋەڼای ۋاچەکا و نیمەدېڕەکا و دېڕەکا، بەتایبەت چنی نۋیستەو نامە یۊگېرتەکا، یاگەگېرۊ نامۍ| یاگەگېرۍ لکیێ [؟] و یاۋەرنامۍ و یاۋەرنامۍ یۊگېرتۍ و یاۋەرکرڎارۍ و یاۋەرکرڎارۍ یۊگېرتۍ، کرڎارۍ و کرڎارۍ یۊگېرتۍ و دماگېرو نامۍ و یاۋەرنامۍ و یاۋەرکرڎاری و کرڎاری.
ھەڵبەتە بېژگە ئانەیە و چانەیچە فرە گرنگتەر ئانە ھەن، کە مشیۊ کیبۆردۍ ھۆرامییە بە پەنەۋازی گرڎو دیالێکتەکا وەڵام بڎۊۋە و نۋیسەرۍ ھۆرامۍ بە دەسۋەرڎای چە دەنگ|پیتە ھۆرامییەکا و ھەر پاسە بە فاڕاو ۋاچە ھۆرامییەکا ناچارۍ نەبا. ئەر پەی گرڎیما یەک کیبۆردە بۊ، کە بە گرڎو دیالێکتەکا وەڵام بڎۊۋە، ھیچ گرفتېۋۍ درۊسنمەکەرۊ و کریۊ کەسېۋ (واران، خوای، کەرۇوە) بنۋیسۊ و کەسېۋتەر (ۋاران و خۋای، کەرۇۋە) بنۋیسۊ، بەڵام ئەر ئېمە نۋیستەو وېما بە کیبۆردۍ فارسییە یان عەرەبییە و سۆرانییە پابەڼ کەرمۍ، بەشېۋو فرەو ھۆرامی-زۋانەکا، کە خەڵکو جەرگەو ھۆرامانی ھەنۍ، ناچارۍ کەرمۍ و قسەکەرڎەی ئاڎېشا پارېزیاتەرین و ڕەسەنتەرین بەشۊ زۋانی ھۆرامی ھەن، دلېنەبەرمۍ. بەڵام ئەر کیبۆردۍ ھۆرامییە پیتو گرڎو دەنگە ھۆرامییەکاش چنە با، ئا کاتە ھەر کەس بە پەنەۋازی دیالێکتەکەو وېش چە کیبۆردەکۍ کەڵک ھۊرگېرۊ و ھیچ کەس بە ھیچ چېۋېۋ ناچار نمەبۊ و نمەکریۊ.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]