نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ئاژەڵ-دۊسیی و ئاژەڵ-پارېزنای
بەپاو ئانەیە کە ناوچەو ھۆرامانی یۊن چا ناوچا، کە ھەر زۇ خەڵکی چاگە نیشەجا بېیەن و ئاۋەدانش کەرڎەن و کولتۇری تایبەت و گونجېیاش چنی ژیۋارو ناوچەکەی پەڕەپنەدان و پەیڕەۋکەرڎەن، ھەر زۇ چنی ئاژەڵا پەیۋەڼیش گېرتەن و ئاژەڵداریی و پېۋەرە ژیۋای چنی ئاژەڵا بېیەن بە بەشېۋ چە کولتۇرو خەڵکەکەی.
بەڵام بەداخۆ، پا بە پاو ئانەیە، کە خەڵکو ھۆرامانیچ کۆتەن چېرو ھەژمۇن پیشەسازی و پېڎابېیەی چەکە ھامچەرخەکا، مرۊڤەکۍ بېیېنۍ بە مەترسی گۆرە سەرو ئاژەڵا ناوچەکەی و بارکەرڎەی فرەو ئاژەڵا یان دلېنەلۋایشا. ئەر سەردەمېۋەنە ئانە بەشېۋ بېیەبۊ چە کولتۇرو ناچاریی، بەڵام چە ئارۊنە کە مرۊڤەکۍ بە فرە چېۋا تەری ئاشنێ بېیېنۍ و ئاۋرڎەی و کېیاستەی و ئەۋەفاڕای بەروبۇمەکا ئاسان بېیەن و بەرھەمئاۋەری گەنمۍ و یەۋۍ و برنجی و گەنمەشامۍ و تەڕەکاڵی و مېۋەی زېیاڎش کەرڎەن و توانا تەکنۆلۆجییەکۍ کشتکاریی ئاڼە ۋەڵېکۆتېنۍ، کە پەنەۋازیۍ مرۊڤیشا پەی کوشتەی و وارڎەی ئاژەڵا ناستەن و کەڵکھۊرگېرتەی چە پڕۆتینی گیۋاۋی|درەختی تاۋانش پەنەۋازییە ناچارییەکا جەسەو مرۊڤی مسۆگەرۍ کەرۊ و ھیچ پەنەۋازیېۋ بە ڕاۋکەرڎەی و وارڎەی گۊشتو ئاژەڵا نەمەنۊ و بېژگە ئانەیچە زېیانەکۍ گۊشت-وارڎەی زېیاتەر بەرکۆتېنۍ، بەتایبەت یاۋای شڵەژېیای و تۇڕەیی ئاژەڵا چە ڕاو سەرەبڕیەی و کوشتەیشاۋە، کە کاتو گیانداینە چە دما ساتەکا ژیۋاو ئاژەڵانە درۊسبۊ، ھەڵبەتە بېژگە ئانەیە کە وێکەرڎەی پیشەسازییانەو ئاژەڵا و ھەر پاسە سەرەبڕیەی پیشەسازییانەو ئاژەڵا چە ڕاو وارڎەی ئا جۊرە گۊشتاۋە، دەیان نەوەشیۍ ئۆ دلۍ جەسەو مرۊڤی و ونۍ و مەشگیش مېیاۋا، ئانە بېژگە چە نەوەشییە کرمییەکا.
ھەڵبەتە مشیۊ ئانەیچە چە ۋیرنەشۊ، کە سرۇشتی پارېزیا بەس بە بېیەی ھامسەنگیی سرۇشتیی ژیۋای مسۊگەر بۊ و کریۊ و بەبۍ ئا ھامسەنگییە سرۇشتییەیە، ژیۋارو ھەر ناوچېۋی ڕۇبەڕۇ مەترسی و زېیانی بۊۋە. سەرو ئا بنەمێ ئېمەی مرۊڤ پەنەۋازیما بە ھۊشیاریی ژیۋار-پارېزنای کە ئاژەڵ-پارېزنای بەشېۋی گرنگو ئاڎی ھەن و ھامسەنگی مەنەی ھەر یۊ چە ئېمە مرۊڤ و ئاژەڵ و درەخت و گېۋاۋ، بە مەنەی ئەۋی تەریماۋە پەیوەست ھەن. پەی ئا مەبەسەیە کۊمەڵېۋ ھەنگامۍ گرنگېنۍ، کە ئینە چڼ خاڵ و بنەمێۋشانۍ:
- قەڎەخەکەرڎەی چەکی، بەتایبەت چەک و ئامرازۍ ڕاۋکەرڎەی.
- قەڎەخەکەرڎەو ڕاۋۊ باڵدارا و ئاژەڵا و سزادای ڕاۋکەرا.
- ئازاڎکەرڎەو باڵدارا و ئاژەڵا و ئەۋەگېڵنایشا پەی دلۍ ژیۋاری سرۇشتیی وېشا.
- درۊسکەرڎەی تیمە تایبەتەکا پارېزنای ئاژەڵا و وێکەرڎەی ئا جۊرە باڵدار و ئاژەڵا چە یاگۍ تایبەتەنە، کە خەریکا دلېنەملا و بنەچەبڕۍ با.
- ئەۋەکەرڎەی سەنتەرو ئاژەڵپارېزنای و پەرۋەرڎەکەرڎەی زاڕۊڵا بە نزیکایەتی و دۊسایەتی ئاژەڵا.
- ئەۋەکەرڎەی سەنتەرو دژو تڼوتیژی ۋەرانۋەرو ئاژەڵا.
- پېڎاکەرڎەی و ئەسای و ئاۋرڎەی ئا ئاژەڵا، کە ۋەڵتەر چە ھۆرامان بېیېنۍ و ۋەرو ڕاۋکەرڎەی و جەنگی بنەچەبڕۍ بېیېنۍ، یان پەی بەرو ھۆرامانی کۊچشا کەرڎەن.
- تەرخانکەرڎەی یاگۍ تایبەتۍ چە کەشەکانە پەی پارېزنای ئاژەڵا پېسەو ناوچەی پارېزیای؛ ناوچەی پارېزیا، نەک باخچەو زیڼانیکەرڎەو ئاژەڵا.
- پەرەدای و ھاندای کولتۇرو ڕزگارکەرڎەو ئاژەڵا و درۊسکەرڎەو کۊمەڵە ڕۊشنگەرەکا پەی ئاشناکەرڎەیۆو خەڵکی بە مافو ئاژەڵا و مافو ژیۋای پەی ئاژەڵا.
- ئانۍ و ھەر خاڵە و بنەمێۋە تەرە، کە بە پارېزنای ئاژەڵا و پارېزنای ژیۋاری و ھامسەنگی ژیۋای خزمەت کەرا.
- ..... تد.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]