باخچێوە بېگەرد
نویستەی: میرزا ئۆلقاڎرو پاوەی
بەشۍ: شەسس و نۊهەمە

میرزا ئۆلقاڎرو پاوەی، باس جە زەمانو دماو حەزرەتو (عیسا)ی کەرۊن، کە چەنی خەڵق جە دینو عیسای لاشادان و شۊنەو هەواو هەوەسی کەوتېنۍ، چەنی خڎېشا دا بت و بتخانەی. میرزا ئۆلقاڎر ئەچېگەنە بت و بتخانەی بە سەگ و سەگخانە وېنامەکەرۊن، ماچۊ هەریۊشان پەی وېش تووتێش مەپەرەست.
سا چوون جە ئەیام، عیسا بن مەریەم
تا، وەقتی زوهوور، ڕەسوولی خاتەم
هەشت سەڎ ساڵ، تەمام، دەور، ویەردە بۍ
دەوران وە مەردم، بازیش، کەردەبۍ
مەردوم، سەر بە خوود، بە سەهوو نسیان
مایېل بین، یەکسەر، بە کفر و عیسیان
عەرەب، تا عەجەم، دنیا و دوون تەمام
بەرشین، جە ئاداب ئایینی ئیسلام
دایېم، ئیتاعەی شەیتان، مەکەردەن
سوجدە، وە سوورەت، بتان مەبەردەن
هەر یەک، بە چېوێ، ئیمانش ماوەرد
هەر کام، ئیتاعەی سەگێوەش، مەکەرد
جە ناگاه، نەسیم، سوبحی سەعادەت
گوشاڎ کەرد، قاپی قەسری هیدایەت
تا، پەی جەهەڼەم، قوفڵش دریاوە
دەروازەی بەهەشت، جە نۊ کریاوە
حۊریان، بیسات، شاڎیی، نیاشان
دەس دەس، ئیستەبرەق، مەلبووس پۊشاشان
غولامان، قەدەح، عەن تەهوورەوە
فریشتان، وە تەشت، پەڕ کافوورەوە
نیدا مەکەردەن، پەیا پەی، وە دەو
مەواتەن، مەولووڎ، ئەحمەدەن ئەم شەو
ئافتاب، جە شەرق، تولووعش مەکەرد
قەمەر، سەر جە بورج، ڕەحمەت، بەر ئاوەرد
غەرەز مەهو ماه، چەنی سەیارات
سەوابت، تەمام، سەقفی سەماوات
عەرش و کورسی، لەوحی، مەلەک ئەفلاک
نوقاتی، مەرکەز، تا، دایەرەی خاک
جە، یومنی، قەدەم، شای خەیرەلئەنام
ڕۊشن بیی، یەکسەر، چوون، ئاینەی جام
مەلایېک تەمام، مەواتەن، یەکسەر
بەبە، مەرحەبا، یا خەیرولبەشەر
حامیلانی عەرش، کە ڕۊ، بی تەمام
مەکەردەن ئاهەنگ، وە هەزار مەقام
خوتبەی وەلادەت، مستەفا، وەندەن
کۊسی ڕیسالەت، ئەحمەدی ژەندەن
قەهقەهەی شاڎیی، بەرز بیی، جە دنیا
مەولووڎنامەی، خاس، محەمەد ونیا
وەحشیات، سوجدەی شوکرانە، بەردەن
حەمد و سەنای حەقق، بە جا، ئاوەردەن
مەواتەن بەخ بەخ، شوکرم دەمادەم
پېڎا بیی، حەزرەت، شای خەیرولقەدەم
شەوێ شەریفتەر، جە لەیلەتولقەدر
سەعیدتەر، جە لەیل، یەوم فەتحولبەدر
دووشەنبە غوڕڕە، جە مەکەی شەریف
جە قەسری بەیزا، مەرتەبەی زەریف
ڕەبیعولئەوەل، جە دواڼزە هەم
پېڎا بیی، حەزرەت، ڕەسوولی خاتەم.[1]