باخچێوە بېگەرد
نویستەی: میرزا ئۆلقاڎرو پاوەی
بەشۍ: حەفتا و ششەمە
عەبدولموتەلیب باباو پېخامئاوەری، وەختێ وەرمەکەنە بېڎار بیۆ، بە پەلە پەی یانەی پەی لاو (ئامینۍ) ئاماوە، بەرەش پەی کەردۆ، لوا چوەر، بەڵام محەمەد(ص)ش نەڎی.
ئامینە واتش: مەبەر دڵ ئازار
خیلافش نېیەن، وە پەروەردگار
ئەم شەو، فەرزەندی، فرە زانم، دییەن
جە ڕوبعی مەسکوون، ڕەنگی، ئەو نېیەن
گوزەشتە، عەجیب، واقیعاتی شەو
یەکسەر، تەمام گرد، عەرز بکەر، بە ئەو
واتش: تیوورات مەغلووبە، کەردەن
ناگاه، جە لای من، محەمەد، بەردەن
ئینە ساتێوەن، باز ئاوەردشان
دیسان، هەم، وە دەس، من سوپەردشان
ئەو مورغی سفید، مەوینیش، وە چەم
وېش، چوون پەروانە، ئەو کەردەن وە شەم
محەمەد بەردەن، وېنەی قەوم و خوېش
دایېم، مەشغووڵەن، وېش، شیر، مەڎۊ، پېش
وە پارچەی حەریر، پۊشان، سەرتاپاش
نمازۊ، ساتێ، من بشۊم، وە لاش
عەبدولموتەلیب، هیجران کەشیدە
وات: ئیسە چکۊن، ئەو نووری دیدە
دیداری پاکش، بە من بنمانە
هەنی جەی فیشتەر، ماوەر بەهانە
چوون شەخس وە تەشتی زەڕ نیگارەوە
وە یەک دەس، ئیبریق کەس نەدارەوە
محەمەد ئاوەرد خاو، خاوی خەرامان
غەسلش دان، تەمام، جە سەر تا دامان
واتش: تا سێ ڕوژ، نە پەردەی حەرەم
دەیارلبەشەر، نەوینۊش، وە چەم
عەبدولموتەلیب وات، بەزاتی، پاک
ئارۊ، وېم، بە تۊ، مەکەرۊم، هیلاک
ئامینە زاناش، چارش، ناچارەن
عەبدولموتەلیب، دڵ، بېقەرارەن
واتش: جە فڵان حوجرەی، مونەوەر
پېچیان وە سووف، ئاڵای بۊ عەنبەر
بشۊ، فەرزەندت، بوینە وە چەم
خاترت، جەم کەر، دڵ، مەدەر، وە خەم
عەبدولموتەلیب، شاڎیی کەرد، ئاغاز
شیی، قاپی، حوجرە، منوەر، کەرد، واز
ناگا دیش، شەخسێ، خېزا وېنەی شېر
غەڕا، وە هەیبەت، دەستدا، بە شمشېر
وات: جەو زیادتەر، پا مەنیە نە وەر
مەکەرووت شەقشەق، وە مەودای خەتەر
محەمەد مەخلووق، مەلەکووت بییەن
تا سێ ڕوژ مەجال، دیڎەنیش نېیەن
تا مەلایەکان، جە بەشارەتش
گرد، نەبان، فارغ، جە زیارەتش
ڕاگەی کەس نېیەن، مەعلووم بۊ، لېت
بشۊ، دماوە، ساکن بەر پەی وېت.[1]