#میرزای لوڕستانی#

ئەوسا دۊمای مەدح یەکتای یەگانە
گۊش دەر وە دەستان دەور زەمانە
بەتاڵ نمەبۊ نوېشتەی تەقدیر
تەقدیر علاجش نېیەن بە تەگبیر
بە ئەمر بېچۇن بەنای بانی سەر
پەرواز نە ئاشېیان کەرد دۇ کەبۇتەر
چەند نە ڕۇی سەما پەروازشان کەرد
چەندێ کۊهساران، دجلەشان پەی کەرد
ئاخر سەرئەنجام نە ئەیوان مەم
هەر دۇ نە پاسار نیشتن خاترجەم
دیشان کە شای مەم نیشتەن و دەماغ
شۊڵەی جەمینش چۇن شۊڵەی چراغ
باڵاش چۇن عەرعەر ساوای زەڕستۇن
گۊناش مەدرۊشیۊ وېنەی لاڵەی کۊن
وستەن چەند فەرشان کار خۆراسان
موتەکا و باڵشت نە هەزار ڕەنگان
ئەساسێ بەی تەور ڕازان ڕېزیان
فەرشان و هەشت جە لاش بېزیان
غوڵامان جە لاش دەست و بان دەست
ئېقامەت کەردەن جە باڵا و پەست
پەڕەندان بەی تەور چۇن دیشان وە چەم
ئەساسێ بەی تەور نادرەی ڕۇی مەم
یەکێشان دەر دەم ئاما وە گوفتار
بڎیە چېشش کەرد چەرخ کەچ ڕەفتار
واتش ئەی یاوەر ڕۇی چەرخ ئەخزەر
وېنەی ئی جەوان پەڕ حوسن و دۊڵبەر
نەدیەنم و چەم نە ڕۇی ڕۊزگار
قەسەم وە بېچۇن دارای جەهاندار
بنازۇن بە سونع قادری وەههاب
بەی تەور سازنان جە یەک قەترە ئاب
وان یەکی هەنێ ئاما بە جواب
واتش ئەی یاوەر با چۇن پەی سەواب
نە جزیر و بۆت خاتۇ زین نامێ
تەڕک و زەرایېف شیرین کەلامێ
باڵا تۇڵ نەی، زەڕستۇن خامێ
دۇ چەشمان سېیە سېیاﮪ بادامێ
پەریزادەیێ، پەری مەقامێ
زۊڵەیخاوارێ نە گولئەندامێ
شیرین خوسرەو هومەیلا کامێ
لەیلا سیفەتێ عەمبەرین جامێ
باش نازداران پڕهۊش فامێ
قەمەر تەلعەتێ ماهی تەمامێ
مەریەمە ئاسا بوڵەند ئەندامێ
شەکەرین ڕازێ تاوس خەرامێ
دۊخت میر ئاودەل نە پەردەی عېسمەت
باش نازداران تەتاران وە بەت
هامشیرەی ئەمیر زەیندین موانان
عەجەب مەردېوەن نە دەور جەهان
شاهان جە سەوداش ڕەها دان عەنان
جە مەشق مەجنۇن جنۇن مەوانان
جۊفت ئەی پسەر زینەن بە ئەوساف
وەر نە نایابەن جە قاف تا بە قاف
ئاما بە گوفتار ئەوەڵ کەبۇتەر
وات بە کەبۇتەر دۇەم ئەی یاوەر
[1]