دەقی ڕاگەیەندراوەکەی کۆتایی کۆنگرەی 14ی پارتی ديموکراتی کوردستان:
لە ڕۆژانی 3، 4، 5 و 6ی نۆڤێمبەری 2022، پارتيمان کۆنگرەی 14ی خۆی لە ژێر دروشمی (ئازادی، ديموکراسی، دادپەروەری) لە شاری دهۆک بە بەشداری 1061 ئەندام گرێدا.
کۆنگرە، بەگوێرەی بەرنامەیەکی ڕێکخراو دەستی بە کارەکانی خۆی کرد و دوای چەند ئايەتێک لە قورئانی پيرۆز، سروودی نيشتيمانیی عێراق و سروودی ئەی ڕەقيب پێشکەش کران.
لە دەستپێکدا سەرۆک بارزانی وتارێکی پێشکەشکرد، تییدا ئاماژەی بەوە کرد کە بەهۆی شەری #داعش# و پاراستنی يەکێتی خاکی کوردستان و پەتای کۆڕۆناوە، کۆنگرە دواکەوتووە. هەروەها بە گشتی باسی لە بارودۆخی هەرێمی کوردستان و عێراق و ناوچەکە و جيهان کرد، بە تايبەتی لە وتارەکەيدا تيشکی خستە سەر دوو خاڵ کە جێگەی شانازيی بەڕێزيانن له و سەردەمەی کە پۆستی سەرۆکايەتی هەرێمی کوردستانی هەبووە، يەکەميان؛ ناردنی هێزی پێشمەرگە بۆ پشتيوانیی کۆبانێ بووە، دووەميان؛ ئەنجامدانی ڕیفراندۆم بۆ سەربەخۆیی کوردستان بووە. لە بەشێکی ديکەی وتارەکەیدا سوپاسی خۆڕاگریی هێزی پێشمەرگەی کوردستانی کرد لە بەرگريکردنی قارەمانانەيان لە شەڕی دژی داعش و پاراستنی خاکی کوردستان، هەروەها سوپاسی خەڵکی کوردستانی کرد بۆ خۆڕاگریی و پشتیوانیی پێشمەرگە و دامودەزگا پەیوەنددارەکان لە بەرەنگاربوونەوەیان له و شەڕەدا.
پاشان فیلمێکی ديکۆمێنتاری لەسەر ئه و هەڤاڵانەی سەرکردايەتی کە لەماوەی نێوان کۆنگرەی سێزدە و ئەم کۆنگرەيەدا کۆچی دواييان کردووە نيشاندرا، دواتر دەستەی سەرۆکايەتی کۆنگرە هەڵبژێردرا.
هەر لە دانيشتنی يەکەمدا؛ کۆنگرە بە کۆی دەنگ ڕێزدار سەرۆک بارزانيان بە سەرۆکی پارتی دیموکراتی کوردستان هەڵبژاردەوە، هەروەها کۆنگرە متمانەی بەخشی بە جێگری یەکەم و دووەمی سەرۆک.
دواتر ڕاپۆرتی سياسی ئەنجومەنی سەرکردايەتی پارتی خوێندرايەوە، لە ڕاپۆرتەکەدا هۆکاری دواکەوتنی کۆنگرەی بە ڕوونی خراوەتە ڕوو کە وێڕای ئەوەی لە سەرەوە سەرۆک ئاماژەی پێداون، ڕیفراندۆم و خيانەتی 16ی ئۆکتۆبەر و لێکەوتەکانی، هۆکاربوون بۆ دواکەوتنی کۆنگرە.
له و ڕاپۆرتەدا، پەيوەست بە پارچەکانی ديکەی کوردستان، ئەوەخراوەتە ڕوو کە ئێمە لەگەڵ داوا ڕەواکانیانین لە هەمان کاتدا، داوا لە هێزە سياسييەکانی هەر سێ پارچەکەی کوردستان کراوە سەردەميانە خەباتە مەدەنييەکانيان بەگەڕ بخەن، داواش لە هەر سێ وڵاتی دراوسێ کراوە کە سنووری جوگرافی، قووڵای مێژويی، تێگەيشتنی ديبلۆماسی، بەرژەوەندی هاوبەشی ئابووری و بازرگانی و کولتوری و کۆمەڵايەتيمان پێکەوە هەيە، بە کردەيی بير لە چارەسەری سياسیی پرسی کورد بکەنەوە، چارەسەرێک کە ببێ بە مايەی ئاشتی و سەقامگيری و بوژانەوەی ناوچەکە بە گشتی. لەسەر ئاستی عێراقيشدا هاتووە کە پارتيمان لە ڕێگەی پەرلەمان و حکوومەتی عێراقی فيدراڵ کار دەکات لەسەر ياسادانان و کاراکردن و جێبەجێکردنی کۆمەڵێک ياسای گرنگ و بنچينەيی بۆ پاڵپشتی سيستەمی فيدراڵی و ديموکراسی لە عێراقدا، وەک لە دەستووری عێراقی فيدراڵدا هاتووە.
دواتر دەستەی سەرۆکايەتی کۆنگرە؛ دەرگای پێکهێنانی ليژنەکانی بۆ ئەندامانی کۆنگرە کردەوە و لە ئاکامدا چوار لیژنە لە لايەن کۆنگرەوە ڕەزامەندی لەسەر درا، کە بريتی بوو لە (ليژنەی پەيڕەوی ناوخۆ، ليژنەی پرۆگرام، ليژنەی ڕاپۆرتی سياسی، ليژنەی سکاڵا و پێشنياز).
لە دانيشتنی دووەمی هەمان ڕۆژدا ليژنەکان گفتوگۆی چڕ و ورديان لەسەر ڕاپۆرتەکانيان کرد و بە تێبينی و سەرنجەکانی ئەندامانی کۆنگرە دەوڵەمەند کرا و، لە دانيشتنی يەکەمی ڕۆژی دووەمی کۆنگرەدا، ڕاپۆرتەکان دوای خوێندنەوه، خرانە دەنگدانەوە و لە لايەن کۆنگرەوە پەسەند کران.
هاووڵاتیانی بەڕێز
هەڤاڵانی تێکۆشەر...
کۆنگرە بەپێويستی زانی لەم قۆناخەدا، پێداچوونەوەيەکی ورد بە پەيڕەوی ناوخۆدا بکات، لە ڕووی هەيکەليەت و ڕێکخستن و پەيوەندیی نێوان ئۆرگانەکاندا، بەشێوەيەک کە بگونجێت لەگەڵ واقعيی ئەمڕۆی کاری حزبايەتيدا. لە لايەکی ديکەوە لە پەيڕەوی ناوخۆدا ناوی ئەنجومەنی سەرکردايەتی گۆڕدرا بۆ کۆميتەی ناوەندی، هەروەها گۆڕانکاری لە بەشێک لە هەيکەليەتی حزبدا ئەنجامدرا و ناوی ئەنجومەنی سەرکردایەتیی پارێزگا گۆڕدرا بۆ (مەکتەبی ڕێکخستنی پارێزگا)، هەروا بڕیاری دامەزراندنی ئەنجومەنی باڵای تێکۆشەران درا. يەکێکی ديکە لە گۆڕانکارييەکانی پەيڕه و بريتييە لە بەرزکردنەوەی ڕێژەی بەشداریی ئافرەت لە کۆميتەی ناوەندی بەجۆرێک لە 15% کەمتر نەبێت.
لە ڕۆژی دووەمدا، سەرۆک بارزانی پێشنیاری 10 هەڤاڵی خستە بەردەم کۆنگرە کە، هەر دە هەڤاڵ بە دەنگی ڕاستەوخۆی ئاشکرا بۆ کۆمیتەی ناوەندی هەڵبژێردران.
پاشان، کۆنگرە دەرگای خۆکانديدکردنی بۆ کۆميتەی ناوەندی کردەوە کە (129) هەڤاڵ خۆيان کانديد کرد بۆ 41 ئەندامی کۆميتەی ناوەندی و (9) يەدەک. لە ڕۆژانی سێيەم و چوارەمیشدا پرۆسەی هەڵبژاردنی ئەندامانی کۆميتەی ناوەندی و لێکجیاکردنەوە و خوێندنەوەی دەنگەکان دەستی پێکرد کە لە لايەن کۆميسيۆنی باڵای هەڵبژاردنی عێراق و (7) دادوەری هەرێمی کوردستان بەڕێوەچوو.
ێگای باسە کۆنگرە کۆمەڵێک لە پڕەنسيب و ستراتيژيەتی پارتی لە چەندين بواری جياجيادا پەسەند کرد کە گرينگترينيان بريتييە لە کارکردن لە پێناو بەهێزکردنی سيستەمی پەرلەمانی و بە ديموکراتیزەکردنی سیستمی حوکمڕانی بە پشتبەستن بە پرەنسيبەکانی: گەل سەرچاوەی دەسەڵاتە؛ لێک جيايی و هاوسەنگی دەسەڵاتەکان؛ سەربەخۆيی و کارايی دامەزراوەکان؛ سەروەری ياسا و پاراستنی ماف و ئازادييەکان و مافی ئافرەت؛ هەروەها ڕێزگرتنی مافەکانی مرۆڤ و ئازادييە بنەڕەتييەکان و ڕێزگرتن لە پڕەنسيبی شەفافيەت و لێپرسينەوە و سزا و پاداشت لە حوکمڕانی هەرێم و عێراقدا. لە بەشێکی ديکەدا جەخت لەسەر ئەوە کراوەتەوە کە پێويستە چەسپاندنی مۆدێلی حوکمڕانی باش و وەڵامدەرەوە بۆئەوەی باشترين خزمەتگوزاریی گشتی پێشکەشی گەلی هەرێمی کوردستان بکات.
لەسەر ئاستی مرۆيی و کۆمەڵايەتيدا، پارتيمان کار دەکات بۆ پەرەپێدانی کوولتوریی، کە بە جۆرێک ڕەنگدانەوەی ڕاستەقينەی کۆمەڵگەی کوردستانی بێت و فرەکولتووری و فرەئايينی و يەکترقبووڵکردن و ڕێزگرتن لە جياوازييەکانمان تێيدا بەرجەستە بێت، ئەمەش لە پێناو بەرزرکردنەوەی ئاستی هزری و هۆشياری و نيشتمانی کوردستانيان بێت.
لەسەر ئاستی کوردستاندا، کۆنگرە جەختی لە یەکڕیزی و پەیوەندیی دۆستانە لەگەڵ هەموو لایەنەکان کردەوە و بە پێویستی زانی لاپەڕەیەکی نوێ بۆ پەیوەندییەکان بکرێتەوە و کێشە و گرفتەکان بە دیالۆگ و لێکتێگەیشتن چارەسەر بکرێن.
هەروەها لەسەر ئاستی عێراقیش کۆنگرە جەختی کرد بۆ چارەسەری کێشە هەڵواسراو و چارەسەر نەکراوەکان و، جێبەجێکردنی ڕێککەوتنی سیاسی و دامەزراندنی حکوومەت کە لەگەڵ لایەنە سیاسیەکانی عێراق ئەنجام دراوە.
هاووڵاتيانی بەڕێز
هەڤاڵانی تێکۆشەر..
پارتی ديموکراتی کوردستان سەرکەوتنی کۆنگرەکەی بە سەرکەوتنی خواست و بەرژەوەندیی گەلی کوردستان دەزانێت، به و پێيەی پارتی هەميشە و لەمەودواش ئامرازێکی خەبات و تێکۆشانی جەماوەريی گەلەکەمانە بۆ بەدەستهێنانی مافە ڕەواکانی نەتەوەی کورد و گەلی کوردستان، بۆيە پارتيمان پيرۆزبايی لە خەڵکی کوردستان و هەڤاڵانی تێکۆشەر دەکات و بەڵێن دووپاتدەکاتەوە وەک هەميشە پارێزەری دەستکەوتەکانی گەل و بەدەستهێنەری ماف و پاراستنی دەستکەوتە دەستووری و نيشتمانی و نەتەوەييەکانی بێت کە درێژەدەری ڕێبازی بارزانیی نەمرە.
کۆنگرە بە تێکڕای دەنگ تەخویلی جەنابی سەرۆک بارزانی کرد بۆ دیاریکردنی هەڤاڵێک لە کوردانی ئێزدی بۆ کۆمیتەی ناوەندیی پارتیمان.
سەرکەوتنی کۆنگرەی چوار دەهەمينی پارتی ديموکراتی کوردستان پيرۆز بێت.
ڕوود بۆ گيانی پاکی سەرجەم شەهيدانی کورد و کوردستان و سەروەريان بارزانی نەمر و کاکە ئيدريسی هەميشە زيندوو.
بژی کورد بژی کوردستان
پارتی دیموکراتی کوردستان
6/11/2022[1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!