باخچێوە بېگەرد
نویستەی: میرزا ئۆلقاڎرو پاوەی
بەشۍ: نەوەڎ و چوارەمە
دمای ئانەی محەمەدش یاونا مەککەی موبارەک، حەلیمۍ ئەڎای دوەمەو محەمەدی، جە پەلەپەلیېنە و شپرزەیېنە، محەمەدش گوم کەرد، پېسە شېتی مەگېڵۍ و مەپەرسۍ، پەرساش کاهینێ، ئاڎییچ ماچۊ بشۊ وە بتخانە، ئەچاگە پەنا بە بە بتی بزورگی، با پەیت ئاشکەرا بکەرۊن، حەلیمەیچ داوە جوابش، ماچۊ: ئەی خەرەفیای بەچە هەر، ئاڎ (بت) تاکو ئیسە چېشش کەدەن پەی وېش، تاکو پەی من بکەرۊش!
ڕاهیبێ پەرسا، ئەی عەورەت چېشەن
تۊ، پەی کۍ، وەیتەور، خاترت ڕېشەن
وات: پەی محەمەد، قوڕەیشی نەسەب
ئیبنی عەبدوڵڵا، موستەفا لەقەب
جە کۊ، چە ساتێ، غافڵم کەردەن
غافڵەن وېم بۊ، نمەز کۍ بەردەن
هەرچن مەگېڵو دیارش نېیەن
وەی، وە یانەم وەی، یە وە کۊ شییەن
ڕاهیب وات: بشۊ، وە بتخانە زوود
پەنا بەر، وە بت، بوزورگ مەعبوود
یەقین، ئەو پەرێت، مەبۊ ڕەهنموون
تەحقیق، مەزانۊ، فرزەندت جە کۊن
حەلیمە وات: ئەی پیر دېوانەی ئەحمەق
خەرەفیای خەر تەبع، بەچە هەرەی ئەزرەق
مەر تۊ، نەزانای جە ڕووی سەرزەمین
جە شەوی مەولود، محەمەد ئەمین
ئەهلی کوفر و شرک، گرد بییەن خجڵ
حوکمی بتخانان، گردبییەن باتڵ
وجوودی پاکش، جەی زەمانەدا
لاوېز، ئاوەردەن، وە بتخانەدا
ئەو چۊی ڕەق و وشک، چېش کەردەن پەی وېش
تاکە من بشۊم، پەنا بەروون پېش.[1]