باخچێوە بېگەرد
نویستەی: میرزا ئۆلقاڎرو پاوەی
بەشۍ: نەوەڎ و حۆتەمە
دمای ئېستەیۆش، حەلیمە سەعدیە، دیسان محەمەدش پەی لاو وېش بەردۆ، چن جارێ ئاردش پەی مەککەی، یۊ جە کاهینەکا بە نام ونیشان جە دوورۆ محەمەدش ئەشناساوە، ماچۊ: ئانە محەمەدەن، پېخامئاوەرو ئاخر زەمانیەن، دژمەن و بت و بتخانەین، مەشۊم بکوشیۊن.
بەڵۍ، جە مەکتووب، عولەمای سییەر
بە قەولی سەریح وەیتەور دان خەبەر
چوون شەققی سەدر، خیلافش نېیەن
نەک جارێ، سەڎ جار، بەڵ واقیع بېیەن
دیسان، حەلیمە، حیلمی خەیر ئەندېش
هەم حەزرەت بەرد، وە قەبیلەی وېش
بە دیڎە، بە گېیان، خزمەتش مەکەرد
دایېم هەر سوجدە، بەندەگیش مەکەرد
شووهەر کەردەبۍ، بە قاپیوانش
هەردوو فەرزەندان، بین پاسەوانش
گاه گاه، ماوەردش، مەککەی موعەززەم
مەکەردش تەواف، کۊی سەفا و زەمزەم
جەنابی حەزرەت، بەریی جە گرد عەیب
جار جار، جە نەزەر، حەلیم مەبیی غەیب
حەلیمە، جەی باب، دایېم خایف بۍ
غەمگین و غەمبار، زەرد و زایېف بۍ
غەرەز، تا حەزرەت بیی بە پەنج ساڵە
ئەعجازش مەبەرد، کافران، زاڵە
کاهینێ، جە دوور، حەزرەت دیی بە چەم
ناڵا و پېچ وەردش، چوون ماری ئەرقەم
واتش: ئەی عەشرەت، قەومی قوڕەیشی
شاڎیی پەشیمان، گرد جە دەس بەرشیی
ئینە پېخامبەر، ئاخر زەمانەن
خراب کونەندەی، بت و بتخانەن
کەس جە دەستی ئەو بەرنمەشۊ، بەر
ئارۊ، قەتڵش کەر، وە مەودای خەنجەر
عەبدولموتەلیب، قەدەغەن کەردش
پەنها، جە نەزەر، ئەهالی بەردش
قەبیلەی قوڕەیش، قەومی کینەکېش
جە خەوفی حەزرەت، مەکەردەن، ئەندېش
ڕۊ، جە ڕۊ فېشتەر، حەسەد مەبەرۊن
جە شای ئەنبیا حەزەر مەکەرۊن.[1]