باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و پەنجەمە
دمای ئانەی عەبدولموتەلیب، محەمەدش ئەسپارا بە ئەبوتالیبی کوڕیش(مامۊ محەمەد)ی، پەی دمایېن جاری ،ڕوەش کەردە محەمەدی و ماچۊ:
دڵوەش بی، خەیلێ، خەندان بی کەمکەم
تا، ڕووی خیتاب کەرد، وە خواجەی عالەم
واتش: ئەی فزەند، نووری دیڎەکەم
ئیبن عەبدوڵڵا، بەر گوزیدەکەم
من، خۊ، وە سۊز، فیراقی تاسەت
جە هیجرانی بۊی، عەتری هەناسەت
وە غوسسەی تۊوە، جەی دنیای فانی
مەشۊم، وە مەنزڵ، جای جاویدانی
بەعد فەوقی من، وە دڵنەوازیی
چەنی کام، عەمۊت، مۊبەت، مەسازیی
تاکە، بە لای ئەو وەسیەت پەی کەروون
ڕەزامەندیی تۊ، وە جا، باوەروون
وات: فەڵەک مەڵهەم، وە زامم شەندەن
سەکەراتی مەوت، تەڵخنی جان کەندەن
ئاسان بی جە لام، بادەی مەوت وەردەن
هیچ باکم نېیەن، هەنی، جە مەردەن
بۊسا، گۊنای پاک، گوڵڕەنگی حەزرەت
وە غونچەی دەهان، قەشەنگی حەزرەت
بۊ نیا، وە بۊی، ئەو سەوڵی ساوا
ئەوەند وەسیەت کەرد، هەر تاکە، تاوا
ڕەختی زیندەگیی، وەجای ئەبەد بەرد
گیان تەحوېڵی دەس، قەبزی قابز، کەرد
ئەو شیی، وەعەدەم، حەزرەت جیا مەند
بەو تەور، ئەو، جە لای ئەبوتالیب مەند
چوون ئەبوتالیب، جە ڕیعایەتش
هیچ نەبی غافڵ، جە حیمایەتش
هەرتاکە قەریب، زەمانەی هیجرەت
جە مەککە بەرشیی، تەشریفی حەزرەت
هەر ئەو ڕۊ، چەنی حەزرەت، شەرتش کەرد
شەرت و وەفای وېش، تەمام وەسەر بەرد.[1]