باخچێوە بېگەرد
ئاماڎەکەرڎەی: ئەسعەد ڕەشید
بەشۍ سەڎ و سېڼزەهەمە
دمای موچیاریەکا بەخېرای پەی ئەبوتالیبی و دماتەر پەی یەهودییەک، مامۊ پېخامئاوەری سەفەرو شامیش وازئاردو گېڵاوە پەی شارو مەککەی، یەهوودییەکېچ گۊشداریشا کەرد و وازشان جە ڕاگیری محەمەڎی ئاوەرد:
یەهوودان خەیاڵ، کەرڎەن فەرامۊش
پەندی (بەخېرا)، گرتشان، نە گۊش
چوون ئەبوتالیب، خەوفش کەرد حاسڵ
ئیرادەی شامش، نە دڵ، کەرد باتڵ
مایەش، جە میسر، یەکسەر فرۊش کەرد
هەم چن بارخانە، مەتاعش ئاوەرد
نەمەند جا، چەنی دوشمەن کاونا
تا حەزرەت، وە شار، مەکە یاونا
عومری شەریفش، یاوا، هەڤڎە ساڵ
پەرێ تجارەت، یەمەن کەرد خەیاڵ
زبێر و عەبباس، هەردوو مونتەخب
فرزەندان سوڵبی عەبدولموتەلیب
تەشریفی خەیرش، بشۊ چەنیشان
بەڵکە فایز، بان، جە مایەی وېشان
جە ئەبوتالیب، ئیلتیماس کەرڎەن
تەشریف، حەزرەتی نەبەوی بەردەن
جەنابی سەید، ئەولادی ئادەم
شەفیعی مەخلووق، سالاری خاتەم
سوار بیی وە زین جام بازەی با پاه
چەنی هەردوو عەم، ڕاهی بیی نە ڕاه
خاک و هەرد و پرد، سەلام مەکەرد لېش
حەزرەت، حەیران بیی جە حاڵاتی وېش
غەرەز، چن خەبەر، چن خەواریقات
چن سیڕڕی عەجیب، هەم چن موعجیزات
یەک یەک، دین وە چەم، جە شای ئەنبیا
جە سەرداری پاک سوپای ئەسفییا
هەر جەو ساڵ، هورمز، بن نەوشیروان
مەعزوول، بیی جە تەخت، حەیاتی دەوران
هەر جە، ئەقاریب، تایەفەی وېشان
نە هەردوو دیڎەش، مەیلی گەرم کېشان
ساڵ نوزدەهەم، عومری پېغەمبەر
خەسرەوی پەروېز، نیشت، نە جای پدەر
جە ساڵی بیستەم، سدیقی ئەکبەر
جە ملازمان، شای خەیرولبەشەر
شیی وە تجارەت، دیسان پەرێ شام
هەم چەنی یاران، سەحابەی نیک نام
جە یەک مەنزڵێ، نزوول کەردشان
ڕەسمی کاروان، واردە وەردشان.[1]