باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و سی و هەشتەمە
بەردەوام جوبرەئیل وەحیە نازڵە کەرې پەی محەمەڎی، هەرچیش پەنەواچې دلې زېڵېشەنە جاگیربې، هیچ حەرفێش ویرنەشې، ماوەو شش ساڵا ڕەبەقی بە پەنهانی پېخامەکەیش مەیاونې بە خەڵکی. ئەچېگەنە محەمەڎ باسو شېوەو جوبرەئیلی مەکەرۊن:
جوبرەئیل هەر ڕۊ، وەحی ئارد پەرېش
ئیزهارش مەکەرد، بە دوستانی وېش
شش ساڵی تەمام، جە مابەین ویەرد
نبوەت، جە لای کەس ئیزهار نەکەرد
سەحیحی موسلیم، هەم، جە بوخارا
عولەمای سییەر، پەی یادگارا
شەرحی ئەحادیس، وەیتەور ئاوەردەن
ڕەوزەتولئەحباب، نەقڵشان کەرڎەن
سوئال کەرد حادیس، یافی بنی هیشام
واتش: یا ڕەسوول سەڎ جار فیدات بام
بە عەشقی ئەو شای بینای بې نیاز
وەحیی مەکتووبەن، یاخۊ، وە ئاواز
جوبرەئیل چېشەن، پەیم واچە کەم کەم
چۊنەن، بې جیسمەن، یاخۊ، موجەسسەم
حەزرەت، فەرماوا: یا ئیبن هیشام
ئامای جوبرەئیل، عەلەیهیسسەلام
گاهێ وېنەی وېش، گاهێ چوون بەشەر
ماوەرۊ، کەلام، دەهەندەی داوەر
داییم چەنی من، وە ڕېزە ڕازان
چوون یاری گیانی، ئاواتە وازان
وەحی، هەر نەوع نەوع، جە لای شای غەففار
بە فرقە فرقە، ماوەرۊ بە وار
داییم جە سامش، تەنگ مەبۊ نەفەس
گاه، سەڎاش بەرزەن، چوون ناڵەی جەڕەس
هەرچی جوبرەئیل، ماوەرۊ بە وار
مەشۊ، نە حیفزم، یەکیەک چوون تومار
نمەشۊ، حەرفش، هەرگیز، جە ویرم
داییم، هەر وەحین، نەقشی زەمیرم.[1]