باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و چلەمە
تایەفەو جڼەکا، جە ئاسمان، دمای بەرکریای ئیبلیسی جە ڕەحمو خوڎای، خوفشان وەنە نیشت، هەناسانی سەردشان هۊرمەکېشت، دماتەر ئیبلیس بە چن واتێوە یاونێشەنە کە ئیتر بازارشان کەوتەن کزی.
چوون تایفەی جن، ئەولادی جان بین
گرڎ ئەهلی عیزەت، جە ئاسمان بین
ئەوەڵ گرڎ کېشان چەنی ئاهی سەرد
جە ڕەجمی شەیتان، خۊفشان، نە دڵ بەرد
تەمامی یەک ڕۊ، زەرد و زایېف بین
گرۊی کەم نەسرەت، ئەهلی تایف بین
هەریەک ناقەیێ، یام گۊسفەندێ
مەکەردشان، زەبح بې چوون و چەندێ
نە ڕاگەی بتان، سەرفشان مەکەرد
داییم مەناڵان، چەنی داغ و دەرد
تا، ئەموالشان، گرڎ بەرشیی جە دەس
نەقدی جسشان، بی بە خار و خەس
واتەن، ستاران، هیچ نمەبان کەم
ئەموالی ئېمە، گرڎ شیی بە عەدەم
جەودما، گرڎ تەرک، عادەت کەردشان
بادەی، ڕەزالەت، میحنەت، وەردشان
ئیبلیس، خیتاب کەرد، وە زڕیەتی وېش
وات: ئەمری ڕوودان، نمەز، چېشەن چېش
نوقتەی سەر زەمین، پەشېو مەوینوون
ڕەهبانان، عاجز، بتخانان، مەحزوون
ئەحبابان کیاست، گرڎ وە هۊڵناک
وە هەزار مەعنا، هەریەک، مشتێ خاک
تا، یەک مشت خاک، سارای توهامە
وەشبۊتەر، خەیلێ، جە بۊی شەمامە
ئاوەردن، وە لاش، یەکا یەک بۊ کەرد
مولاحەزەی موڵک، گرو گرو کەرد
بۊ کەردش واتش: یەومەلمەحشەرەن
ئەی بۊ، هەر بۊی پاک، پای پېغەمەرەن
چېش کەروون هانا، هەی داڎ، هەی بې داڎ
کەردم، گرڎ عەبەس، ڕەنجم شیی وە باڎ
دەردم، بې دەرمان، وەی، وە یانەم وەی
نەمامی شاڎیم، جە نۊ، کریان، پەی
توخمی پاشیدەم، جە زەمین بڕیا
بەرگی زەحمەتم، جە لای حەقق دڕیا
مەعزوول بیم، جە تەخت، فەرمان فەرمای دیم
جە تەوقی لەعنەت، بەڎتەر، ئاما پېم
ئەهلی کفر و شیرک، گرڎ مەبان پاماڵ
بتان گرڎ باتڵ، بتخانان بەتاڵ
محەمەد خاتەم، پېغەمەرانەن
سالاری سەرخېڵ، گرڎ سەروەرانەن
مەبعووسی بەر هەقق، جاش جە تهامە
شەفیعی موختار، یەومەلقیامە
تەبەعەی ئەرمەن، وە دەوانی دەو
مەبۊ، گرڎ بشۊ، وە ئیتاعەی ئەو
با، بەحسی شەیتان، بمانۊ جارێ
هەم، بەیان، مەبۊ، با جە کەنارێ.[1]