باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و چل و یەرەمە
سەرەتاو وەستەرەی وەحیې، تەنیا چن کەسێ نزیکې محەمەڎی ئیمانشان ئاوەرد، کە بە پەنجې دەسی مەژماریان، کە ئەبوبەکری سدېق و خەدیجەی هامسەرەش و زەید و بیلال و عەلی مامۊزاش بېنې، چونکوم چا کاتەنە حەزرەتو محەمەڎی بە پەنهانی کۊشش کەرې پەی یاونای پېخامەکەیش:
بە قەولی ناقل دۊعای موستەجاب
ڕاوی ڕیوایەت، ڕەوزەتولئەحباب
ئەوەلین، کەسێ، ئیمانش ئاوەرد
بە قەولی حەزرەت، بە دڵ باوەڕ کەرد
ئەبوبەکر بې، سیدیقی ئەکبەر
تەسدېق کەرد، بە قەول، خوڎا و پېغەمەر
جە قەولی حەزرەت، لانەدا، یەک موو
ڕضی الله، تەعالا عەنهوو
وەسفش جە قورئان، حەقق کەرد ئاشکار
ثانی اثنین، اذ هما فی الغار
ڕاش، کوا، پەی ئەهل فەزڵەت، مەئابان
وېش بی، بەسەر مەشق، ئەهلی سەحابان
هەر ئەو ڕۊ، سدېق، سیدقش نمانا
یەکسەر، سیدقشان، جە سیدیق زانا
یاران، جە مابەین، ئەو تیغی مەودا
ناگاه، یەکیەک شین، وە شۊن ئەودا
فیدای سیدقت بام، شای سیدق و یەقین
سیدقت بیی بە تاج، پەرێ فەرقی دین
بازە هەم بە قەول، خەدیجەی کوبرا
والیدەی حەزرەت، فاتیمەی زەهرا
ئەوەڵ، جە ژەنان، ئەو ئیمان ئاوەرد
بە پېغەمبەری حەزرەت، باوەڕ کەرد
هەم جە مەوالی، زەید بەنی حارېس
ئیمانش ئاوەرد، خاستەر جە وارېس
بەعدەزئان بیلال حەقق ڕازیی بۊ لېش
ئیمانش ئاوەرد، بې پەروا و ئەندېش
جەو دما (عەلی)، شېری کردگار
سواری دڵدڵ، ساحیب ذولفەققار
بەعدەزئان، زوبەید، ئیمامی عوسمان
یەک نە شۊنی یەک ئاوەردەن ئیمان
هەم، عەبدولڕەحمان شەجیعی بې خەوف
مەردی مەیدان گیر، یانی ئیبنی عەوف
فەرموودەی، ئایەت، بە دڵ کەرد قبووڵ
ئیمانش ئاوەرد، بە خوڎا و بە ڕەسووڵ
جەودما سەعید، موتابەعەت کەرد
ئیمان، بە خوڎا و بە ڕەسوول ئاوەرد
تەڵحە، ئیمانش، بە حەقق کەرد حاسڵ
دینی حەزرەتش، قبووڵ، کەرد بە دڵ
موجاهید وەی تەور، ڕیوایەت کەردەن
پەی شاهی مەردان، دەلیل ئاوەردەن
فەزڵی خوداوەند، جە شانی عەلی
ئېڎ بې، مەکرەمەت، خەفیفی و جەلی
ئەوساڵ، جە قوڕەیش، قەحتێ عەزیم بې
نە باد، نە باران، نە شنوی نەسیم بې
چوون ئەبوتالیب ساحیب عەیاڵ بې
پەڕ خەرج و کەم دەخل، وېرانە ماڵ بې
عەبباس، جەو دەمدا، ساحیب دەوڵەت بې
هەم سەدری مەجلیس، گرد مەشوورەت بې
شای خەتمی پەنا، سالاری سەروەر
شەفیعی کوبرا، زەلزەلەی مەحشەر
وات: ئەبو تالیب شەکستە باڵەن
ساحیب کڵفەت و ئەهل و عەیاڵەن
بە حاڵی وېمان، بادا ستەم کەین
هەریەک فەرزەندێ، ئەم ساڵ، وە خەم کەین.[1]