باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و پەنجا و یەکەمە
دمای مۊچیاریەکا حەزرەتی پەی کافرەکا، دیارەن پەنەشان قبووڵ نەکریان، پەوکەی کەوتۍ پەلاماردای حەزرەتی، پی تەرزە:
کافر ناگاه، چوون سەگ هەڵمەت بەرد
بۍ ئەندېش هەڵمەت وە حەزرەت ئاوەرد
نەتەرسا جە قەهر، خوڎای بانی سەر
گرتش، گریبان جامەی پېغەمەر
سیدیقی ئەکبەر ئاخېز کەرد وە جەخت
خەلاس کەرد حەزرەت نە چنگی بەڎبەخت
وات: ئەی شەخس ماچۊ خوڎای لامەکان
خالیقی مەخلووق کوللی ئینس و جان
خوڎای من و ئەو ئېوە خوداتان
قەتڵش واجیبەن مەگەر جەلاتان
هەر ئیبنی عەبباس کەردەن ڕوایەت
زوڵمی زاڵمان یاوا بە غایەت
قەبیلەی قوڕەیش هەم شین ئەو جەبەر
یەککسەر کەردەن قەتڵی پېغەمەر
بە لات و عەززا، سەوگەند وەردشان
سەنادید یەکسەر ئقرار کەردشان
هەر وەخت محەمەد بوینان وە چەم
هوونش بڕېزان پەی نەزمی عالەم
فاتیمەی زەهرا، شنەفتش دەرحاڵ
پەلە پەل خېزا وە خاتر مەلاڵ
عەرزش کەرد قوڕەیش، گومڕای کەم هونەر
پەرێ قەتڵی تۊ گرد بەستەن کەمەر
حەزرەت بە تەوفیق واڎەی خوڎاوەند
ئاوش تەڵەب کەرد دەردەم زوو سەند
تەشریفی خەیرش هەم وە مەسجید بەرد
کافران دیسان جە ئەوان وېیەرد
مەجمووعەن هەریەک تەمام خاس و عام
بە موعجیزە پاک شای خەیرەلئەنام
وشک بین یەکا یەک نە جاگەی وېشان
قوە و حەرەکەت هیچ نەمەند پېشان
حەزرەت مشتێ خاک هۊرگېت نە زەمین
شانا بەو گرووی گومڕای موشریکین
جە عەجزی دەروون نیگاه کەرد وە زشت
ڕووتان هەر زشت بۊ ئەی قەومی نازشت
ئەو خاکە ئەو ڕۊ شانا وە هەر کەس
بادی نەدامەت یانەش کەرد دەربەس
هەرچن بەعزێ حەرف خارج جە عەقڵش
چوون جە عەبدوڵڵا بن عومەر نەقڵش
یەک ڕۊ هەم حەزرەت شای خەیرەلئەنام
جە فەزای کەعبە گرتەبۍ مەقام
ناگاە عەتبە بن موعەیب یاوا
چەنی ئەو حەزرەت دەس کەرد وە داوا
گرووی موشریکین بەری جە گرد دین
دوشی موبارەک حەزرەت گرت بە قین
جامەی موبارەک مەلایک بافش
وستش وە گەردەن بلووری سافش
ئەوەند پېچشدا حەزرەت خەستە کەرد
تاکە ڕای نەفەس حەلقش بەستە کەرد
سیدیقی ئەکبەر حەقق ڕازیی بۊ لېش
ناگاه وە تاجیل چەو دەم یاوا پېش
وە چەند مەرارەت مەعرەکە و نەبەرد
تا حەزرەت جە دەس مەلعوون ڕەها کەرد
وېش کەوت تۊڕدامی ماجەرای کوففار
گردبین نە دەورش قەومی بەڎکردار
پەی پەی مدان لېش هەر کام پەی وېشان
ئەوەند مەحاسین شەریف کېشاشان
جەو مەهلەکەی سەخت تا گېیان بەربەرد
مەدام جەو دەمدا موداع حاسڵ کەرد
وە عەزمی مەسجید نییەت ئاوەردش
فەریزەی ئەو وەقت ئەدا مەکەردش
گرووی قوڕەیشی چوون خونەخوارە
مەکەردەن پەرێ حەزرەت ئیشارە
تازە مەشیمی وشتری نەوجاه
حازر کەوتەبۍ نە ئەو گوزەرگاه
واتشان کەی بۊ ئەی مەشیمەی نەو
بکەرووش نە کۊڵ پەشتی پاڵووی ئەو
عەتبەی بەڎ بەخت، فەوریی ئاخېز کەرد
مەشیمەی قەبیح خوت ئالوودە کەرد
قەهری خوڎاوەند ناوەر ئەو نەزەر
چەسپناش نە پشت پاکی پېغەمەر
حەزرەت جەو دەمدا سوجدە مەبەردش
هەر جە سوجدەدا تەوەقوف کەردش
تاکە فاتیمەی زەهرا یاوا پېش
تاهیر کەرد لیباس پەشتی بابوی وېش
حەزرەت ڕەنجیا لېشان چەو ئانە
جە دمای تاعەت یەکتای یەکانە.
[1]