باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و پەنجا و چوارەمە
نەجاشی پاشاو حەبەشەی کیاستش شۊنەو مېمانە ئاوارەکاش، کاتێ ئاردېشا پەی لاو نەجاشی، ، دمای خېرئامای چن پەرسێش وەنە کەردې، چەربارەو دینە تازەکەیشان، ماچۊ: ئا دینە تازە کە ئامان پەی دلېتا، چېشەن و چەنینەن، ئایا قبووڵتانەن کە دژو ئایینو بابایاتانەن، ئەپی تەرزە:
دەردەم نەجاشیی شاهی خەیر ئەندېش
غەرا نە جەرگەی مەحرەمانی وېش
وات: قەومێ بە من پەنا ئاوەردەن
من جای مەلجە جای ئومېڎ کەرڎەن
چوون مەبۊ سرەوا بەر کەرۊم وە بەر
بدەوشان بە دەست قەومی کینەوەر
نەجاشیی خەشمی فەراهەم ئاوەرد
جەمعی موهاجیر یەکسەر تەڵەب کەرد
ئەرکانی دەوڵەت جە نزیک جە دوور
یەکسەر جە دیوان حازیرەلحزوور
فەوری کیانا ئینجیل ئاوەردەن
ڕەهبانانی دوور گرڎ حازر کەرڎەن
موسوڵمانان وات: چېش بدەیم جواب
ئاخۊ جەو دەمدا، خەیرەن یا سەواب
جە ناگاه جەعفەر حەقق ڕازیی بۊ لېش
بنی ئەبی تالیب پا نییا وە پېش
نەجاشی پەرسا جە یاران خەبەر
قەولی قاسیدان عەبدوڵڵای عومەر
مەواچان ئېوە بەڎ ئامان پېتان
بېزارەن جە دین ئەجدادی وېتان
دینی تازەتان کەرڎەن ئیختیار
مەشغووڵین داییم بە لەیل و نەهار
ئەو دینە چېشەن فایڎەش کامەن
کې واتەن ئاخر سا چېشش نامەن
نەدینی مووسا عەلەیهیسەلام
نە دینی عیسا دایر بو نە عام
تا بزانو فەزڵی ئەو دینە چېشەن
مەعلووم کەن بە من دڵ وە ئەندېشەن. [1]