باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و شەس و یەرەمە
میزا ئۆلقاڎرو پاوەی، ئەچی بەشەنە باس جە ئیمانئاوەردەو عومەرو کوڕو خەتابی مەکەرۊن کە چەنی دمای گۊشگېرتەی پەی قورئانەکەی سوجدەش مەبەرد و واتش بە هەق محەمەڎ ڕاسواچەن، هەرچی ئاڎ بواچۊ پاسەن، ئیتر ئیمانش ئاوەرد:
مەعلوومەن ئەزەڵ تەنیا هەر وېشەن
حوکمی ئەوەڵین، ئاخەرین پېشەن
سوجدەی ستایش لاییق هەر بەوەن
ڕۊشن بەخشی ڕۊ، تار ئەفزای شەوەن
ئوستاد هەفت تاق بەرزی ئەفلاکەن
خوڎای گرڎ ئەشیا ئادەمی و خاکەن
تا حاڵ نە ڕای بەد گوزەر کەردەنم
داییم سوجدەی بت باتڵ بەردەنم
محەمەد ئەمین یاگەی ئەمانەن
یەقین پېخامبەر ئاخر زەمانەن
عوممەر بە خوڎا ئیمانش ئاوەرد
هەم بە نبوەت حەزرەت باوەڕ کەرد
موقربی بە حەقق بە دڵ بە زاهیر
وانا کەلیمەی تەبیبەی تاهیر
اشهد ان لا اله الله
واشهد ان محمد ڕسول الله
تەهانی (جەناب) نە تۊی پەردەوە
قاپی قەهقەهە، زەوقش کەردەوە
چوون ڕەهای ڕوساخ شاڎی نمانا
وە ئاواز بەرز تەکبیرێ وانا
جەناب و سەعید ئامینە و عوممەر
سەڵەوات وە دییەن دیڎەی پېغەمەر
دۊعای حەزرەت بی پەرێ ڕو کەردش
پەنا وە خوڎای لا یەزال بەردش
واتش: یا کەریم، یەک جە عوممەرەین
موسڵمان ببۊ وە بۍ مینا و مین
مەعلووم بۊ وە تۊ یا ئیبنی خەتتاب
حەقق دۊعاش پەی تۊ کەردەن موستەجاب
تاکە ئەبوجەهل گمڕای بن هیشام
با هەر کافر بۊ تا قامەلقیام
عوممەر فەرماوا: آمنت بالله
یا جەناب سەڎجار الحمدلله.[1]