باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و شەسس و حۆتەمە
دژمنایەتی قوڕەیشیەکا پەی ئەهلوو ئیسلامی، وەرە وەرە زیاتەر بې، حاڵشان فرە خراب بې، ئەبوبەکر داواش کەرڎە حەزرەتی هەکە پی تەعرە ژیوای زامەتەن، پەوکەی مەشۊم هوررووژم بکەران پەی کابەی و ئەچاگە دینەکەیش بە بانگەوازێ ئاشکەرا بکەران، پېخامئاوەر و ئیسلامی (د.خ) فەرماواش: ئېمە چەمو ئاڎیشانە ژمارەمان کەمەن، ئا کارە خاس نییەن، بەڵام دماتەر عوممەریچ قەناعەتش بە پەیلواکەو ئەبوبەکری ئاوەردەن و
وېشا لوێنې ڕوەو کابەی، چاکە بانگو ئیسلامیشان دان:
گوبەڼەی کەڵەک شەیتانی مەلعوون
دریا وە هەمدا جە ڕووی دەهری دوون
مافر دوورا دوور چوون خوونە خوارە
پەی ئەهلی سەلام مەکەرد نەزارە
هەرکەس جە هەرجا فرسەتش ماوەرد
کافر موسڵمان ئەزیەتش مەکەرد
ئاخر ئەبوبەکر سیدیقی ئەکبەر
ڕوو کەرد نە حەزرەت مدرا وەراوەر
عەرز یا محەمەد فائیدەش نېیەن
قوڕەیشی کافر گرڎ بەدخوو بېیەن
هەرجا ئیسلامێ بوینان وە چەم
یەکیەک بە فرسەت پېش مەدان ستەم
با بشین هوررووژم وە حەرەم بەرین
دینی محەمەد ئاشکرا کەرین
جوابدا حەزرەت شای خەیرولئەنام
فەرما چوون حاڵەن کەم دەسەن ئیسلام
ئېمە ئەندەکین قوەت نەدارین
چوون کەشتی دەریا هەر نادیارین
سیدیقی ئەکبەر چن دەلیل ئاوەرد
خەیلێ پەی حەزرەت موبالەغەش کەرد
چەو دما عوممەر ئومېدی ئیسلام
چەنی چن نەفەر سەحابەی کیرام
حوزوور نەداشتەن حەزرەت تەشریف بەرد
جە بەیتولحەرام مەیلی تاعەت کەرد
چوون ئەبوبەکر سیدیقی ئەکبەر
دەردەم تەشریف بەرد وە بانی مینبەر
بە ئاوازی بەرز خوتبەیێ وانا
حەمدی خوداوەند دانای توانا
هەم بەحس حەزرەت وە مەیان ئاوەرد
بەعد (والسلام) ، مەردم دەعوەت کەرد.[1]