باخچێوە بېگەرد
ئاماڎەکەرڎەی: ئەسعەد ڕەشید
بەشۍ سەڎ و حەفتا و پەنجەمە
هەر چاگە چن فریشتێ ئامێ خزمەتو حەزرەتی، داواشان وەنەکەرد کە ئەمرە بفەرماوۊن تاکو دژمنانو دینی غەرق بکەران، بەڵام پېخامئاوەر جوابش دێوەو ماچۊ: من پەی ڕەحمەتی ئامانا، نەک پەی زەحمەتی، ئاڎې نادانېنې و مەناشان نمەکەرە، من بە دانایی مەشۊن وە ڕاشان، فېرشان مەکەرون، خوڎای گۆرە هیدایەتشان مڎۊن:
ناگا هەم یۊتەر ئاما جە لاوە
سوجدەی حەزرەت بەرد مدرا وە پاوە
وات: یا محەمەڎ خەیلێ خەمینم
من مەلایکەی ڕووی سەر زەمینم
حەقق ئەمرش کەرڎەن موتیعی تۊ بام
غوڵامی پایەی ڕەفیعی تۊ بام
ئەر مەدەی ڕوخسەت زەمین شەق دەروو
دوشمنانی تۊ سەرنگوون کەروو
جە نۊ هەم یەکێ مەلایەکەی پاک
ئاما سڵام کەرد شای تاجی لەولاک
وات: یا محەمەد من مامووری تۊم
وە ئەمری مەعبوود خزمەتکاری تۊم
ئەگەر مەیلت هەن وە یەک شاخی هەرد
دوشمنانت. گرڎ بکەروون وە گەرد
دیسان پېڎا بیی فریشتەی دەریا
ئاما سەلام کەرد وە شای ئەنبیا
وات: یا محەمەڎ فیدای نامی تۊم
بە فەرموودەی حەقق من غولامی تۊم
ئەر ئیزن داری عەلەم وە پاکەم
تایفەی کوففار غەرقی دەریا کەم
حەزرەت دا جواب ماموورانی حەقق
واتش: خوڎاوەند مەوجود و موتلەق
منش پەی عەزاب مەبعووس نەکەرڎەن
بەڵکە بە ڕەحمەت من ئافەریدەن
جەهالەتەن قین، جەهر نالایېق
تەڕەحوم وەشەن چەنی خەلایېق
ئەوان نادانەن مەکەر مەناشان
من بە دانایی مەشوون نە ڕاشان
بەڵکەم نەباو مەتڵەب وە غایەت
حەقق باوەرۊشان نە ڕای هیدایەت
جوبرەئیل عەرز کەرد واتش: یا ڕەسوول
خەدیجەی کوبرا پەشېوەن مەلوول
مەلائېکەی عەرش گرڎ جە گریەی ئەو
گریانەن یەکسەر وە دەوانی دەو
نیدا بکەر لېش تا بەیۊ وە لات
دیڎەش ڕوش بۊ وە تووتیای پات
وە خاتر جەمی موژدە بدەر پېش
خوڎا وە کەرەم سەلام کەرڎەن لېش
بەشارەتش دان قەسری جە بەهەشت
شیرینتەر جە قەسر قسووری هەر هەشت
خشتێ جە سیمەن، خشتێ هەم جە زەڕ
سازان بە جەوهەر ئاوی تڵای تەڕ
نە خەم نەخەیاڵ نە جای زەحمەتەن
نە پەژارەی کوس نە کدوورەتەن.[1]