باخچێوە بېگەرد
نویستەی: میرزا ئۆلقاڎررو پاوەی
بەشۍ سەڎ و حەفتا و حۆتەمە
وەلید کوڕو موغەیرەی، شاعېرێ بە نامبانگ و ئیسلامی بۍ، دەم پاراو، خەتیب. قوڕەیشیەکۍ جە پەلاماردای پېخامئاوەرینە هیچشان سۆز نەکەرد، ڕێوە تەرەشا گېرتە وەر، ڕاو بە درۊ ۋستەیۆ کەلامو خوڎای، پەوکەی پەناشان بەردە لاو وەلید و کوڕو موغەیرەی.
بەڵ چوون وەلیدی پەلیدی ناخار
ئیبنی موغەیرە مەردوودی بەڎکار
عەمووی مەکرەمەی ئەبو جەهل بۍ
موشکیلاتی سەخت جە لاش سەهل بۍ
خەتیب و شاعېر ئەشعار مەبەردەن
تەسحیحی کەلام جە لاش مەکەردەن
جە هەر ئومورێ ئەمرش مانع بۍ
حەرفش چوون حیججە دایېم قاتع بۍ
تا قەومی قوڕەیش گرد جەم بی جە لاش
گرد گوشاڎ کەردەن زوبان وە سەناش
واتش: یا وەلید دەلیلاتمان
تاڵ بېیەن تەمام گرد ئەوقاتمان
دیسان محەمەد کەلامێ جە نۊ
وانای ئەو کەلام کەردەنش وە خۊ
سیحرەن یا ئەفسوون ئەشعاری وېشەن
چونکە دایېم فەنن ساحیریی پېشەن
واتش: ئەی سوئال وېنەی ڕویای شەو
مەندەن تا ڕویەت وە گفتوگۊی ئەو
جەو دما وەلید وەلی گومڕاهان
تاشیی وە حوزوور شای ئەنبیاهان
وات: یا محەمەد وە بۍ بەهانە
فەرموو، شیعری وېت پەی من بوانە
حەزرەت چوون بولبول گوڵباخچەی جنان
بەو نوتقی شیرین موعجیزەی بەیان
وات: (بسم الله الرحمن الرحیم)
خوڎا، بە حەققەن غەفوورەن کەریم
وەلید جە گوفتار ساتێ بی خامۊش
چوون لەفزی ڕەحمان شنەفتش وە گۊش
وات: نامی شەخس مەشهووری عامەن
مەبەری ماواش موڵکی یەمامەن
چوون موسەیلەمەی کەززابەی گۊمڕا
نامش ڕەحمان بۍ جە گرد بەزمگا
حەزرەت وات: ڕەحمان خوڎای کەریمەن
نامش ڕەحمانەن چونکە ڕەحیمەن
چەو دما سوورەی سوجدە پەرېش وەند
وەلید جە هەیبەت دەردەم حەیران مەند
تاکە وە ئایەی مونەوەر یاوا
وەلید مەلەرزان چوون تووڵی ساوا
وەلید ڕاس مدرا موو جە ئەندامش
وە عەبەس بەرشیی خەیاڵی خامش
نزیک بۍ پۊسش جە بەڎەن ڕەقق بۊ
سەرتاپا ئەعزاش تەمام شەقشەق بۊ.[1]