باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و هەشتا و یەرەمە
پېسە واتمان؛ قوڕەیشیەکې بڕواشان بە (عەتبە) ی نەکەرڎە، واتشان دیارەن تۊیچ سیحرت وەنەکریان. دیسان چیلایچۆ ئیسلام توروقینەبې، پەوکەی ئارامشان وەنە بڕیا، دیسان بەرنامەشان نیارە پەی کوشتەی محەمەڎی:
سا وەختێ ئەسحاب چەنی پېغەمەر
مەسروور بین تەمام بە حەمزە و عوممەر
زەمزەمەی تەکبیر سەحابەی گوزین
مەشیی پەی سەمای چەرخی چوارەمین
ئیسلام ڕۊ بە ڕۊ هەر زیاڎ مەبەرد
وېرانان وە دین گرد ئاباد مەکەرد
سا چوون موشریکان دوور جە عەقاید
دیشان ئیسلام گرد، هانە تەزاید
ئایېرەی حەسەد بەرز بی جە لاشان
پەڕبیی جە غەرەز گرد موددەعاشان
دیسان هەم جە نۊ مشوورەت کەرڎەن
پەی قەتلی حەزرەت گرد سوگەند وەردەن
یەکسەر وە هەیهات مەجمووعەی غالیب
تا شین عەرز کەرڎەن وە ئەبو تالیب
واتەن: ئەی سەردار سوپای هەزارە
محەمەد وە دەس ئېمە بسپارە
چوون موخالەفەت وە بەرزی ئەو کۊ
وستەن نەمابەین دینی ئېمە و تۊ
یا کە محەمەد پېمان بسپارە
یا جەی دمای وېت وە چەم مەدارە
بڎیە ئەی گۊمە یە چەند قووڵەن
حازر بەر هەنی قەتڵ و قتووڵەن
یەقین تا زبان برازادەی تۊ
جە سەببی مەعبوود دادە ئېمەی تۊ
نەگېڵو وە شەرت ئیخلاس مەندی خاس
نمەبۊ جە دەس ئېمە ئەو خەلاس
یا بې بەهانە محەمەد بە دەر
یاخۊ پەرێ جەنگ وېت ئاماڎە کەر
ئەی چن کەلیمە خشوونەت ئامېز
واتشان دەردەم کەردشان ئاخېز
جە یانەی تالیب گرد بەرشین وە بەر
پەی قەتڵی حەزرەت بەستشان کەمەر.[1]