باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و هەشتا و چوارەمە
قوڕەشیەکې دمایین ئینزارشا دا بە ئەبوتالیبی، ئاڎیچ یاوناش بە برازا ئازیزەکەیش (محەمەڎ)، محەمەڎیچ فەرماواش: من تەنیا خوڎام هەن، ئاڎ مەپارېزنۊم:
تا ئەبو تالیب حەزرەت تەڵەب کەرد
واتش: ئەی فەرزەند فەردی بې هامفەرد
واقیقەی قوڕەیش گرد وە موففەسەل
بەیان کەرد پەرېش بې سەهو و خەلەل
زبان کوتا کەر جە کینە کېشان
جە تەعن و جە لەعن مەعبوودی ئېشان
مەتڵەب هەر تۊنی ئەی نووری دیڎەم
خەوفم هەر جە تۊن ئەی بەرگوزیدەم
نەک حەوادیس ڕو ڕو ناغافڵ
داخش تا مەحشەر بمانۊ نە دڵ
مەبادا ناگاه فرسەت باوەران
یانەی من وە مەرگ تۊ وېران کەران
حەزرەت وە خەیاڵ سەودای پاکی وېش
وە نازکی دڵ شەرەفناکی وېش
نەک ئەبو تالیب فەریب وەردەبۊ
دەس جە حیمایەت کوتاە کەردەبۊ
فەرماوا ئەی عەم حەرفێ واچوون پێت
تا خاس حاڵی بای مەعلووم ببۊ لېت
من هەرچیم واتەن یا هەرچیم کەردەن
فەرموودەی خودام بەجاه ئاوەردەن
وەڵڵا کردارم کەردەی وېم نیەن
گرد هەر بە فەرمان ئیلاهیی بیەن
یاخۊ هەر تەشەر ئەقوام بەردەنی
تەرکی حیمایەت ئېمە کەردەنی
مانیع نمەبۊن هەرگیز جەی کارە
جان بداریی من مەترووک بدارە
ئەو جان بداریم مەکەی چوون جاران
یەک شەرت یەک زبان یەک دڵ چوون یاران
عەیبێ نەدارۊ نوورەن عەلا نوور
با ئاشکار بۊ نزیک تا وە دوور
وەرنە حیمایەت فەردی لامەکان
دەهەندە مەدۊ سوپای ئاسمان
پەی من کافییەن بەیۊ جە سەردا
داییم حازرەن ها جە نەزەردا
ئېد وات و خېزا دەردەم تەشریف بەرد
ئەبو تالیب نادم مەجلیس ماتڵ کەرد.[1]